ភ្នំពេញៈ ក្រសួងការងារនិងបណ្ដុះបណ្ដាលវិជ្ជាជីវៈ បានប្រាប់ឲ្យកម្មកររោងចក្រនៃអតីតក្រុមហ៊ុនលីដា (ខេមបូឌា )ហ្គាមិន ដែលមានទីតាំងនៅភូមិទ្រា១សង្កាត់ស្ទឹងមានជ័យ ១ ខណ្ឌមានជ័យ រាជធានីភ្នំពេញ ទៅបើកប្រាក់ខែដោយផ្ទាល់ ចាប់ពីថ្ងៃទី ៥ ខែតុលា ឆ្នាំនេះ នៅទីតាំងក្រុមហ៊ុនតែម្ដង បន្ទាប់ពីក្រុមហ៊ុននេះបានគេចវេះមិនទទួលខុសត្រូវ។ នេះបើតាមសេចក្ដីជូនដំណឹងចុះថ្ងៃទី ៣ ខែតុលា។
សេចក្ដីជូនដំណឹងបានសរសេរថា ប្អូនកម្មករនិយោជិតទាំងអស់នៃអតីតក្រុមហ៊ុនលីដា(ខេមបូឌា) ហ្កាមិន សូមមេត្ដាពិនិត្យបញ្ជីបើកផ្ដល់បុរេប្រទានរបស់រាជរដ្ឋាភិបាល បន្ទាប់ពីថៅកែអតីតក្រុមហ៊ុនលីដា(ខេមបូឌា)ហ្គាមិន មិនទទួលខុសត្រូវដោយថៅកែរត់ចោល។
សេចក្ដីបានបន្ដថា ក្រុមការងារក្រសួងនឹងបើកថវិកាជូនបងប្អូនកម្មករដែលប្រើកិច្ចសន្យាមានថេរវេលាមិនកំណត់និងកំណត់ដោយផ្ទាល់ដៃដល់សាមីខ្លួនចាប់ពីម៉ោង ៨:០០ នាទីព្រឹកដល់ម៉ោង ១១:៣០ នាទីព្រឹក។
ជាមួយគ្នានេះ ក្រសួងក៏បានតម្រូវឱ្យកម្មករនិយោជិតយកមកជាមួយនូវឯកសារដូចជា១-កាតសម្គាល់ខ្លួន (ច្បាប់ដើម) និង សៀវភៅការងារឬប័ណ្ណបេឡាជាតិរបបសន្ដិសុខសង្គមឬអត្ដសញ្ញាណបណ្ណសញ្ជាតិខ្មែរឬលិខិតឆ្លងដែន ឬកិច្ចសន្យាការងារ ២-ប័ណ្ណបើកប្រាក់ឈ្នួលប្រចាំខែរបស់កម្មករនិយោជិតម្នាក់ៗ (បើមាន)។
ពេលកន្លងមករដ្ឋាភិបាលកម្ពុជាបានចំណាយថវិកាបុរេប្រទានជាង៤លានដុល្លារសម្រាប់បើកប្រាក់ខែឲ្យកម្មកររោងចក្រជាង៤ពាន់នាក់ដែលត្រូវបានថៅកែរត់ចោល។
លោកនាយករដ្ឋមន្ត្រី ហ៊ុន សែន ធ្លាប់បានបញ្ជាឲ្យរដ្ឋមន្ត្រីក្រសួងការងារ លោក អ៊ិត សំហេង ប្រើប្រាស់ថវិកាទាំងនេះ ដោះស្រាយបញ្ហាដើម្បីកុំឲ្យប៉ះពាល់ជីវភាពរបស់និយោជិត។
ទន្ទឹមនឹងនេះលោកក៏បានឲ្យលោក អ៊ិត សំហេង ជួយដោះស្រាយរកការងារឲ្យកម្មករទៀតផងដែរ ជាមួយនឹងការជំរុញឲ្យក្រសួងការងារបង្កើតយន្តការបន្ថែមដើម្បីទប់ស្កាត់ករណីថៅកែរោងចក្ររត់ចោល។
តាមការឲ្យដឹងពីរបាយការណ៍ក្រសួងការងារនាពេលថ្មីៗនេះ មានរោងចក្រចំនួន៩បានបិទទ្វារដែលនាំឲ្យកម្មកររោងចក្រជាង៤ពាន់នាក់បានបាត់បង់ការងារហើយមិនទទួលបានប្រាក់ខែពីថៅកែរោងចក្រ។
ក្រសួងការងារធ្លាប់បានចេញសេចក្ដីជូនដំណឹងកាលពីថ្ងៃទី ១ ខែ មីនា ឆ្នាំ ២០១៨ ថា នឹងចាត់វិធានការក្តៅរឹបអូសទ្រព្យសម្បតិ្តរោងចក្រណាដែលដួលរលំហើយគ្មានប្រាក់សម្រាប់ដោះស្រាយជាមួយកម្មករ-កម្មការិនី។
សេចក្ដីជូនដំណឹងបានបញ្ជាក់ថា«នៅមានវត្តមានត្រូវតែដោះស្រាយជាមួយកម្មករនិយោជិក។ ប៉ុន្តែប្រសិនបើម្ចាស់ឬតំណាងនោះពុំមានថវិកាសម្រាប់ដោះស្រាយក្រសួងការងារនឹងអនុវត្តតាមនីតិវិធីរបស់តុលាការ។ ម្យ៉ាងទៀតក្រសួងការងារក៏ព្រមានអនុវត្តតាមនីតិវិធីរបស់តុលាការដែរក្នុងករណីក្រុមហ៊ុនឬរោងចក្រដួលរលំដោយម្ចាស់ឬតំណាង រត់គេចខ្លួន»។
តាមរយៈសេចក្តីជូនដំណឹងក្រសួងការងារលើកឡើងថាប្រាក់ដែលទទួលបានពីការលក់នូវទ្រព្យសម្បត្តិរបស់រោងចក្រណាមួយគឺត្រូវយកទៅបើកប្រាក់ខែឲ្យកម្មករ-កម្មការិនី៕