.jpg)
លោក ប្រាក់ សុខុន រដ្ឋមន្ត្រីក្រសួងការបរទេស។ ភ្នំពេញ ប៉ុសិ៍្ត
ភ្នំពេញៈ ក្រសួងការបរទេសបានសម្តែងការសោកស្តាយ និងថ្កោលទោស ចំពោះវិទ្យុអាស៊ីសេរីដែលក្រសួងថាមានចេតនាផ្សាយព័ត៌មានមិនពិតក្នុងគោលបំណងបំភាន់សាធារណជនអំពីរបាយការណ៍របស់គណៈកម្មការអឺរ៉ុបពាក់ព័ន្ធនឹងប្រព័ន្ធអនុគ្រោះពន្ធពាណិជ្ជកម្ម «គ្រប់មុខទំនិញលើកលែងសព្វាវុធ EBA» ដោយចោទវិទ្យុនេះថាគ្រាន់តែជាស្ថានីយឃោសនាមួយដែលបម្រើដល់ក្រុមនយោបាយមួយប៉ុណ្ណោះ។
កាលពីសប្តាហ៍មុន វិទ្យុអាស៊ីសេរីអះអាងថា ខ្លួនបានទទួលរបាយការណ៍បឋមស្តីពីការព្យួរការអនុគ្រោះពន្ធ EBA របស់សហភាពអឺរ៉ុបពីប្រភពផ្លូវការ ដែលសុំមិនបញ្ចេញឈ្មោះ។ វិទ្យុមួយនេះផ្សព្វផ្សាយថា បើយោងតាមរបាយការណ៍ដែលខ្លួនបានទទួល បង្ហាញថារដ្ឋាភិបាលកម្ពុជាខកខានមិនបានស្តារសិទ្ធិមនុស្ស និងប្រជាធិបតេយ្យឡើងវិញដែលអាចឱ្យសហភាពអឺរ៉ុបឈានទៅសម្រេចព្យួរប្រព័ន្ធអនុគ្រោះពន្ធ EBA ពីកម្ពុជា។
ប៉ុន្តែបើយោងតាមសេចក្តីថ្លែងការណ៍របស់អ្នកនាំពាក្យក្រសួងការបរទេស និងសហប្រតិបត្តិការអន្តរជាតិកាលពីថ្ងៃទី ១៥ ខែវិច្ឆិកា បានឲ្យដឹងថា ការផ្សព្វផ្សាយរបស់វិទ្យុអាស៊ីសេរីដោយយកចេញពីរបាយការណ៍របស់គណៈកម្មការអឺរ៉ុបគឺមិនត្រឹមត្រូវតាមខ្លឹមសារដើមឡើយ។
ក្រសួងការបរទេសបញ្ជាក់ថា៖ «ដោយអនុលោមតាមការប្រតិបត្តិតាមផ្លូវការទូត និងលក្ខខណ្ឌនានារបស់គណៈកម្មការអឺរ៉ុប របាយការណ៍នេះត្រូវបានចាត់ទុកជាការសម្ងាត់។ រាជរដ្ឋាភិបាលកម្ពុជាមានការសោកស្តាយ និងថ្កោលទោសចំពោះវិទ្យុអាស៊ីសេរីដែលមានចេតនាផ្សាយព័ត៌មានមិនពិតក្នុងគោលបំណងបំភាន់សាធារណជនអំពីរបាយការណ៍របស់គណៈកម្មការអឺរ៉ុប»។
ក្រសួងការបរទេសបន្តថា៖ «យោងទៅលើពាក្យពេចន៍ និងកថាខណ្ឌដែលបានដកស្រង់យកមកផ្សព្វផ្សាយដោយយកចេញពីរបាយការណ៍នេះមិនត្រឹមត្រូវតាមខ្លឹមសារដើមឡើយ។ ព័ត៌មានមិនពិតដូចនេះ បានបង្កើតនូវក្ដីបារម្ភមិនគួរមានដែលពាក់ព័ន្ធដល់កម្មកររាប់ម៉ឺននាក់ ធ្វើឱ្យសាធារណជនភាន់ច្រឡំ និងធ្វើឱ្យអាប់ឱនដល់កេរ្តិ៍ឈ្មោះមន្ត្រីរាជរដ្ឋាភិបាលដែលវិទ្យុអាស៊ីសេរីអះអាងថា បានធ្វើឱ្យបែកធ្លាយឯកសារ»។
របាយការណ៍បន្ថែមថា៖ «ម្យ៉ាងវិញទៀតសកម្មភាពរបស់វិទ្យុអាស៊ីសេរីបញ្ជាក់យ៉ាងច្បាស់ថា វិទ្យុនេះមិនមែនជាប្រភពព័ត៌មានដែលគួរឱ្យទុកចិត្តបាន។ ប៉ុន្តែគ្រាន់តែជាស្ថានីយឃោសនាមួយដែលបម្រើដល់ក្រុមនយោបាយមួយប៉ុណ្ណោះ»។
ក្រសួងការបរទេសឲ្យដឹងដែរថា អនុលោមតាមនីតិវិធី គណៈកម្មការអឺរ៉ុបបានបញ្ជូនមករាជរដ្ឋាភិបាលកម្ពុជាកាលពីថ្ងៃទី ១២ ខែវិច្ឆិកា ឆ្នាំ ២០១៩ នូវរបាយការណ៍បឋមរបស់ខ្លួនអំពីការវាយតម្លៃពាក់ព័ន្ធនឹងប្រព័ន្ធអនុគ្រោះពន្ធពាណិជ្ជកម្ម «គ្រប់មុខទំនិញលើកលែងសព្វាវុធ-EBA» ដែលរាជរដ្ឋាភិបាលកម្ពុជានឹងត្រូវផ្តល់យោបល់ទៅលើរបាយការណ៍នេះក្នុងអំឡុងពេល ១ ខែ។
ក្រសួងស្ថាប័នពាក់ព័ន្ធនឹងធ្វើការពិនិត្យរបាយការណ៍នេះទាំងមូល ហើយនឹងផ្តល់ការឆ្លើយតបសមស្របមួយតាមពេលវេលាកំណត់ដែលនឹងឆ្លុះបញ្ចាំងពីបច្ចុប្បន្នភាពនៃការវិវឌ្ឍថ្មីៗនៅក្នុងចំណុចដែលជាការព្រួយបារម្ភរបស់គណៈកម្មការអឺរ៉ុប។ តាមការរំពឹងទុក គណៈកម្មការអឺរ៉ុបនឹងធ្វើសេចក្តីសម្រេចនៅ ខែ កុម្ភៈ ឆ្នាំ ២០២០ ខាងមុខ ថាតើនឹងត្រូវដកប្រព័ន្ធអនុគ្រោះពន្ធពាណិជ្ជកម្មឬយ៉ាងណា?។
លោក ឯម សុវណ្ណារ៉ា អ្នកវិភាគនយោបាយបានថ្លែងកាលពីថ្ងៃម្សិលមិញថានៅពេលរដ្ឋាភិបាល ឬអាជ្ញាធរមានសមត្ថកិច្ច រិះគន់ថាវិទ្យុអាស៊ីសេរីបានផ្សព្វផ្សាយមិនត្រឹមត្រូវតាមខ្លឹមសារដើម គឺវិទ្យុអាស៊ីសេរីអាចធ្វើការកែតម្រូវរបស់ខ្លួន។ ប៉ុន្តែបើខ្លួនមានភ័ស្តុតាងគ្រប់គ្រាន់ ខ្លួនអាចបង្ហាញទៅសាធារណជនដើម្បីចៀសវាងការចោទប្រកាន់ណាមួយថា ខ្លួនបម្រើដល់ក្រុមនយោបាយមួយ។
លោកបានថ្លែងថា៖ «នៅពេលដែលរដ្ឋាភិបាល ឬអាជ្ញាធរមានសមត្ថកិច្ចថា មិនត្រឹមត្រូវទេ អ្នកសារព័ត៌មានក្នុងស្រុក ឬក្រៅស្រុកក៏ដោយ គួរតែធ្វើការកែតម្រូវទៅ វាមិនមានអ្វីខុសឆ្គងទេ។ (អាស៊ីសេរី) អាចបង្ហាញថា ការលើកឡើងរបស់ខ្លួនមានទឡ្ហីករណ៍គ្រប់គ្រាន់ដើម្បីបង្ហាញទៅសាធារណជនទូទៅចៀសវាងគេចោទប្រកាន់ថា វិទ្យុនេះឈរជំហរណាមួយឬក៏ដាក់បន្ទុកទៅលើរដ្ឋាភិបាល»។
ភ្នំពេញប៉ុស្ដិ៍បានទាក់ទងវិទ្យុអាស៊ីសេរីកាលពីថ្ងៃម្សិលមិញដើម្បីសុំការបកស្រាយ ប៉ុន្ដែមិនមានការឆើ្លយតបនោះទេ៕
វីដេអូ៖
