ភ្នំពេញៈ ក្រសួងការបរទេស និងសហប្រតិបត្តិការអន្តរជាតិកម្ពុជារៀបចំវេទិកា ASEM Day នៅថ្ងៃទី ១០ ខែមីនានេះនៅបរិវេណខាងមុខវត្តបទុមវតីរាជធានីភ្នំពេញ ដើម្បីផ្សព្វផ្សាយដល់សាធារណជនជាតិ និងអន្តរជាតិអំពីការត្រៀមរៀបចំកិច្ចប្រជុំកំពូលអាស៊ី-អឺរ៉ុបលើកទី ១៣ និងព្រឹតិ្តការណ៍ក្រៅកិច្ចប្រជុំ ASEM ១៣ ដែលកម្ពុជាត្រូវធ្វើជាម្ចាស់ផ្ទះ។
សេចក្ដីជូនដំណឹងរបស់ក្រសួងព័ត៌មានចុះផ្សាយថ្ងៃទី ៩ មីនា ឲ្យដឹងថាព្រឹតិ្តការណ៍នេះមានកិច្ចប្រជុំភាពជាដៃគូសភាអាស៊ី-អឺរ៉ុប កិច្ចប្រជុំកំពូលនៃអ្នកដឹកនាំវ័យក្មេងនៃមូលនិធិអាស៊ី-អឺរ៉ុប វេទិកាប្រជាជនអាស៊ី-អឺរ៉ុបបុណ្យវប្បធម៌អាស៊ី-អឺរ៉ុប វេទិកាសេដ្ឋកិច្ច និងធុរកិច្ចអាស៊ី-អឺរ៉ុប វេទិកាការងារអាស៊ី-អឺរ៉ុប និងកិច្ចពិភាក្សាតុមូលក្រុមនិពន្ធសារព័ត៌មាននៃមូលនិធិអាស៊ី-អឺរ៉ុប។
សេចក្ដីជូនដំណឹងបន្តថា ចំពោះវេទិកា ASEM Day ប្រារព្ធឡើងចាប់ផ្ដើមពីម៉ោង ៧ និង ៣០ នាទីព្រឹករហូតដល់ម៉ោង ៨ និង ២០ នាទីយប់នេះ។ វេទិកានេះមានការចូលរួមពីក្រសួងស្ថាប័នពាក់ព័ន្ធតំណាងស្ថានទូតប្រចាំនៅកម្ពុជា សិស្សនិស្សិត និងការបើកទូលាយឱ្យសាធារណជនបានចូលទស្សនា ដើម្បីស្វែងយល់អំពីព្រឹត្តិការណ៍នេះអមជាមួយនឹងការទស្សនាស្ដង់ពិព័រណ៍ ការសម្ដែងសៀក ការថតរូប និងសុំហត្ថលេខាពីកីឡាករឆ្នើម និងការសម្ដែងតន្ត្រីផងដែរ៕