.jpg)
កិច្ចប្រជុំក្រុមមន្ត្រីជំនាញរបស់ក្រសួងការពារជាតិនៅថ្ងៃទី ១៤ ខែកុម្ភៈ។ រូបថត ហ្វេសប៊ុក
ភ្នំពេញៈ ក្រសួងការពារជាតិ នៅថ្ងៃទី ១៤ ខែកុម្ភៈ ឆ្នាំ ២០១៨ បានឲ្យដឹងថា ខ្លួនបានដោះស្រាយពាក្យបណ្តឹង និងមតិយោបល់បានជិត ១៤០ ករណី ពាក់ព័ន្ធនឹងកងទ័ព ដែលករណីទាំងនោះ ត្រូវបានលើកឡើង ដោយអ្នកប្រើប្រាស់ហ្វេសប៊ុក កាលពីឆ្នាំមុន ដែលជាគំនិតផ្តួចផ្តើមថ្មីមួយទៀត របស់លោកនាយករដ្ឋមន្ត្រី ហ៊ុន សែន។
អ្នកនាំពាក្យក្រសួងការពារជាតិ លោក ឈុំ សុជាតិ បានថ្លែងថា មន្ត្រីបានត្រួតពិនិត្យ និងរកឃើញបណ្តឹង មតិយោបល់ សំណើ និងសំណូមពរ នៅក្នុងហ្វេសប៊ុករបស់ក្រសួង និងហ្វេសប៊ុក របស់លោកនាយករដ្ឋមន្ត្រីហ៊ុន សែន។
លោក សុជាតិ ថ្លែងថា៖ «ប្រសិនបើវាជាបញ្ហាដែលយើងអាចដោះស្រាយបាន យើងនឹងដោះស្រាយ។ ប៉ុន្តែបើបញ្ហាដែលយើងមិនអាចដោះស្រាយបាន នោះយើងនឹងផ្ទេរទៅអាជ្ញាធរមានសមត្ថកិច្ច»។
បើតាមលោកសុជាតិ បណ្តឹងទាំងនោះភាគច្រើន គឺពាក់ព័ន្ធទៅនឹងរឿងប្រាក់ខែ ការដំឡើងឋានន្តរស័ក្តិ និងវិវាទដីធ្លី។
លោកបញ្ជាក់ថា បួនករណីទាក់ទងទៅនឹងការចោទប្រកាន់ថា ទាហានបានចាប់យកដីពីអ្នកស្រុកគឺមាននៅក្នុងខេត្តព្រះសីហនុ ខេត្តសៀមរាប និងខេត្តបាត់ដំបង ហើយករណីទាំងនេះ បានបញ្ជូនទៅតុលាការ ប៉ុន្តែនៅមិនទាន់ត្រូវបានដោះស្រាយទេ។
លោក សុជាតិ ក៏បានព្រមានអ្នកប្រើប្រាស់បណ្តាញសង្គមកុំ «ផ្សព្វផ្សាយព័ត៌មានមិនពិត» ដែលអាចបង្កឱ្យមាន «ចលាចល ការយល់ច្រឡំ ការញុះញង់ឬសកម្មភាពណាដែលនាំឲ្យមានការបែកបាក់ជាតិ»។
ក្រុមការពារសិទិ្ធមនុស្ស បានលើកឡើងពីកង្វល់មួយចំនួន អំពីការឃ្លាំមើលបណ្តាញផ្សព្វផ្សាយសង្គមរបស់រដ្ឋាភិបាល ដោយពួកគេបានចង្អុលបង្ហាញទៅដល់វិធានការផ្លូវច្បាប់ ដែលបានធ្វើឡើងប្រឆាំងនឹងមនុស្សមួយចំនួន ដែលបានបញ្ចេញទស្សនៈរបស់ពួកគេ តាមបណ្តាញសង្គម។
កាលពីខែសីហាកន្លងទៅ អតីតមេដឹកនាំគណបក្សអំណាចខ្មែរ លោកសួន សេរីរដ្ឋា ត្រូវបានកាត់ទោសឱ្យជាប់ពន្ធនាគាររយៈពេលប្រាំឆ្នាំ ដោយសាតែគាត់បានបង្ហោះពាក្យប្រមាថកងទ័ព នៅលើទំព័រហ្វេសប៊ុក។
ក្រុមតំណាងរាស្ត្រក៏កំពុងធ្វើច្បាប់ដែលអាចនាំឲ្យមានការផ្តន្ទាទោសដល់អ្នកប្រើប្រាស់បណ្តាញសង្គមផងដែរពីបទ«វាយប្រហារទៅលើបុគ្គលសាធារណៈដោយខុសច្បាប់នឹងដោយគ្មានភ័ស្តុតាង»និងពីបទញុះញង់ឲ្យមានបដិវត្តពណ៌ នេះបើយោងតាមតំណាងរាស្ត្រគណបក្សកាន់អំណាចថ្លែងកាលពីថ្ងៃអង្គារ។
លោក សុខ សំអឿន ដែលជាមេធាវីរបស់លោក សេរី រដ្ឋា បានថ្លែងថា ការផ្តួចផ្តើមរបស់ក្រសួងនេះ អាចមានឥទ្ធិពលអវិជ្ជមាន ដល់សេរីភាពបញ្ចេញមតិ។
លោក សំអឿន បញ្ជាក់ថា៖«ផ្អែកលើករណីរបស់លោកសួន សេរីរដ្ឋា ប្រជាពលរដ្ឋ ត្រូវតែមានការប្រុងប្រយ័ត្ន ឲ្យបានខ្លាំងក្លា នៅពេលដែលពួកគេបង្ហោះអ្វីមួយដែលសំខាន់»។
ទោះជាយ៉ាងណា លោកសុជាតិ បានអះអាងថា ករណីរបស់លោក សេរីរដ្ឋា គឺគ្រាន់តែរឿង«នយោបាយ»ប៉ុណ្ណោះ។
លោកមានប្រសាសន៍ថា៖«នេះគឺនិយាយអំពីប្រជាពលរដ្ឋដែលបានលើកឡើងអំពីផលវិបាករបស់ពួកគាត់ ដូច្នេះហើយ យើងត្រូវដោះស្រាយបញ្ហាទាំងនោះជូនពួកគាត់។ ប៉ុន្តែលោកសួន សេរីរដ្ឋា បានចោទប្រកាន់និងបង្ខូចឈ្មោះយើង វាគឺជាបញ្ហាផ្សេងគ្នា»។
លោក សុជាតិ បានបន្ថែមថា ក្រុមមួយផ្សេងទៀតគឺទទួលបន្ទុកស៊ើបអង្កេតការបង្ហោះលើបណ្ដាញសង្គម ដែលពាក់ព័ន្ធនឹងកងកម្លាំងប្រដាប់អាវុធ។ លោកមានប្រសាសន៍ថា៖ «យើងនៅមិនទាន់បានប្រជុំជាមួយក្រុមនេះនៅឡើយទេ»៕ NS
