ភ្នំពេញៈ ក្រសួងការពារជាតិប្រកាសបើកយុទ្ធនាការចាក់វ៉ាក់សាំងនៅក្នុងតំបន់ក្រហមជាលក្ខណៈទ្រង់ទ្រាយធំក្នុងរយៈពេល ៣០ ថ្ងៃ ដោយដំណើរការចាក់វ៉ាក់សាំងដូសទី ១ ចាប់ផ្ដើមពីថ្ងៃទី ១ ដល់ថ្ងៃទី ១៥ ឧសភា ក្នុងគោលដៅសម្រេចចាក់ជូនពលរដ្ឋឱ្យបាន ៤៥ ម៉ឺននាក់។
ការប្រកាសពីយុទ្ធនាការនេះបានធ្វើឡើងក្នុងវេទិកាពិសេសរបស់ទូរទស្សន៍ជាតិកម្ពុជា ស្តីពីសកម្មភាព និងលទ្ធផលនៃការអនុវត្តរបស់ក្រសួង ស្ថាប័នពាក់ព័ន្ធក្នុងការទប់ស្កាត់ការឆ្លងរាលដាលនៃជំងឺកូវីដ១៩ ក្នុងប្រទេសកម្ពុជា នៅព្រឹកថ្ងៃទី ២៩ ខែមេសានេះរបស់លោក ឥត សារ៉ាត់ អគ្គមេបញ្ជាការរង និងជានាយសេនាធិការចម្រុះនៃកងយោធពលខេមរភូមិន្ទ។
លោក ឥត សារ៉ាត់ បានបញ្ជាក់ថា៖ «ថ្ងៃទី ១ ដល់ថ្ងៃទី ១៥ ខែឧសភា ២០២១ គឺយើងប្តេជ្ញាចិត្តចាក់វ៉ាក់សាំងកូវីដ១៩ ដូសទី ១ ឱ្យហើយនៅក្នុងចំណោមប្រជាពលរដ្ឋ ៤៥ ម៉ឺននាក់។ នៅក្នុងថ្ងៃទី ១៦ ដល់ថ្ងៃទី ៣១ ខែឧសភា យើងនឹងចាក់វ៉ាក់សាំងដូសទី ២ បញ្ចប់ទាំងអស់»។
លោកបានបន្តថា យុទ្ធនាការនេះគឺជាគោលការណ៍របស់ក្រសួងការពារជាតិដែលបានរៀបចំផែនការក្រោមការណែនាំពីលោកនាយករដ្ឋមន្ត្រី ហ៊ុន សែន ដើម្បីឱ្យការចម្លងជំងឺកូវីដ ១៩ ក្នុងតំបន់ប្រឈមខ្លាំងនេះ មានភាពស៊ាំពីមនុស្សម្នាក់ទៅមនុស្សម្នាក់ ឈានទៅរកការកាត់ផ្តាច់ការចម្លង។
លោកបានបញ្ជាក់ថា៖ «ចំពោះតំបន់ដែលយើងបានរៀបចំចាក់វ៉ាក់សាំងនេះ យើងខ្ញុំក៏កំពុងតែរៀបចំជាតារាងមួយ ដើម្បីឱ្យដឹងថានៅខណ្ឌនីមួយៗមានប៉ុន្មានទីតាំង ដែលអាចផ្តល់កន្លែងចាក់វ៉ាក់សាំងឱ្យជិតប្រជាពលរដ្ឋ ជាពិសេសនៅក្នុងតំបន់ក្រហម»។
បើតាមលោក ឥត សារ៉ាត់ យុទ្ធនាការនេះនឹងផ្តល់ជូនចំពោះពលរដ្ឋទូទៅចាប់ពីអាយុ ១៨ ឆ្នាំឡើងទៅក្នុងតំបន់ក្រហម ដោយមិនមានការរើសអើងនោះទេ។ និយាយរួមឱ្យតែបុគ្គលនោះទទួលបានការអនុញ្ញាតពីគ្រូពេទ្យដោយមិនមានមូលហេតុនៃការប្រតិកម្មចំណុចណាមួយនៃវ៉ាក់សាំង ហើយក៏មានការផ្តល់អំណោយជាគ្រឿងបរិភោគដល់ជនក្រីក្រនៅពេលកំពុងមកទទួលវ៉ាក់សាំងផងដែរ។
លោកបានបញ្ជាក់បន្ថែមថា៖ «ទីតាំងចាក់ យើងនឹងប្រកាសនៅពេលឆាប់ៗ ដោយមានបញ្ជាក់ពីរបៀបណែនាំត្រឹមត្រូវចៀសវាងពួកគាត់ សម្រុកមកចាក់ព្រមគ្នាច្រើន។ នៅថ្ងៃទី ៣០ នេះ យើងប្រកាសបើកយុទ្ធនាការ ហើយនៅថ្ងៃ ១ យើងនឹងចាប់ផ្តើមនូវគោលដៅទាំង ៩០ ហ្នឹង យើងនឹងទៅទាំងអស់។ ដូច្នេះប្រជាពលរដ្ឋទាំងអស់ត្រូវមានឆន្ទៈក្នុងការចូលរួមចាក់វ៉ាក់សាំងនេះ ដើម្បីវិលមកស្ថានភាពសុខសប្បាយវិញ»។
លោក ហែន ភារៈ វេជ្ជបណ្ឌិតផ្នែកផ្លូវដង្ហើម ដែលមានបទពិសោធជាង ២០ ឆ្នាំ បានប្រាប់ភ្នំពេញប៉ុស្តិ៍ថា វិធានការនៃការសម្រុកចាក់វ៉ាក់សាំងក្នុងតំបន់ដែលប្រឈមនឹងហានិភ័យខ្ពស់នេះគឺជាការត្រឹមត្រូវក្នុងការកាត់ផ្តាច់ការឆ្លងរីករាលដាល ខណៈប្រទេសជាច្រើនក្នុងពិភពលោកអនុវត្តបានជោគជ័យ។
លោកបានបន្តថា នៅពេលតំបន់ណាមួយដែលឆ្លងរីករាលដាលលឿន នោះការធ្វើឱ្យពលរដ្ឋមានភាពស៊ាំនឹងជំងឺកាន់តែរហ័ស គឺកាន់តែល្អ ហើយក្រៅពីវ៉ាក់សាំង ការដែលជំរុញឱ្យពលរដ្ឋមានភាពស៊ាំពីធម្មជាតិ តាមរយៈការបរិភោគអាហារូបត្ថម្ភគ្រប់គ្រាន់ ក៏ជារឿងមួយដែលចាំបាច់ផងដែរ។
លោកបានបញ្ជាក់ថា៖ «ខ្ញុំជឿថា រដ្ឋាភិបាលអាចធ្វើបាន (ការផ្តល់អាហារូបត្ថម្ភ) ព្រោះកាលណា យើងមានការកំណត់តំបន់ ដែលមានការប្រមូលផ្តុំតូចអ៊ីចឹង គឺការចំណាយអស់តិចជាងការចែកអំណោយមិនចំគោលដៅ ដែលវាជារឿងពិបាក។ បើយើងកំណត់គោលដៅបានច្បាស់លាស់ ជាតំបន់ក្រហមនេះ គឺការបញ្ជូនបន្លែស្រស់ និងត្រីសាច់នេះ គឺត្រូវតែបញ្ជូនឱ្យពួកគាត់»៕