ភ្នំពេញៈ គណៈកម្មការជ្រើសរើសយុវជនស្ម័គ្រចិត្ដបំពេញក្របខ័ណ្ឌឲ្យកងទ័ពជើងគោកនៃក្រសួងការពារជាតិកាលពីសប្ដាហ៍មុនបានជូនដំណឹងដល់សាធារណជន ពិសេសយុវជនកុំចាញ់បោកជនខិលខូច ចំពោះការប្រឡងចូលក្របខ័ណ្ឌកងទ័ពដោយការសូកប៉ាន់ជាថ្នូរនឹងការប្រឡងជាប់ ហើយបើមានករណីបែបនេះត្រូវផ្ដល់ព័ត៌មានដល់សមត្ថកិច្ចដើម្បីចាត់ការតាមច្បាប់។
សេចក្ដីជូនដំណឹងរបស់គណៈកម្មការស្ដីពី «ការទប់ស្កាត់ភាពមិនប្រក្រតីនៅក្នុងដំណើរការជ្រើសរើសយុវជនស្ម័គ្រចិត្ដ ចូលបម្រើកងយោធពលខេមរភូមិន្ទបំពេញក្របខ័ណ្ឌឲ្យកងទ័ពជើងគោក» នេះបានប្រាប់ទៅសាធារណជន ជាពិសេសយុវជនមានបំណងបម្រើការងារជាយោធិនឲ្យសហការផ្ដល់ព័ត៌មានជាបន្ទាន់ ប្រសិនបើមានបុគ្គលណាទារលុយ ឬតម្រូវឲ្យបង់ប្រាក់ជាថ្នូរនឹងការទទួលបានក្របខ័ណ្ឌនេះ។
សេចក្ដីជូនដំណឹងបញ្ជាក់ថា៖ «ដើម្បីផ្ដល់ឱកាសប្រកបដោយតម្លាភាព និងយុត្តិធម៌ដល់យុវជនទូទៅក្នុងការដាក់ពាក្យចូលបម្រើកងយោធពលខេមរភូមិន្ទជាពិសេសចូលរួមទប់ស្កាត់ក្នុងករណីមានបុគ្គលមួយចំនួនឆ្លៀតឱកាសកេងចំណេញ តាមរយៈការធ្វើសកម្មភាពសូកប៉ាន់ផ្សេងៗប្រាសចាក គោលការណ៍កំណត់របស់រាជរដ្ឋាភិបាល និងក្រសួងការពារជាតិ គណៈកម្មការសូមអំពាវនាវដល់សាធារណជន អាណាព្យាបាល និងបេក្ខជនទាំងអស់សហការផ្ដល់ព័ត៌មានជាបន្ទាន់ក្នុងករណីមានបុគ្គលណាទារលុយ ឬតម្រូវឲ្យបង់ប្រាក់ជាថ្នូរនឹងការចែកពាក្យ ទទួលពាក្យដើម្បីទទួលបានក្របខ័ណ្ឌ»។
គណៈកម្មការបញ្ជាក់ថា៖ «រាល់ការស្ម័គ្រចិត្តដាក់ពាក្យសុំបម្រើការងារក្នុងក្របខ័ណ្ឌកងទ័ពជើងគោក គឺមិនតម្រូវឱ្យបេក្ខជនបង់ប្រាក់ឡើយ។ រាល់បុគ្គលដែលប្រព្រឹត្តខុសនឹងគោលការណ៍ខាងលើនេះត្រូវទទួលខុសត្រូវចំពោះមុខច្បាប់ជាធរមាន»។
សេចក្ដីជូនដំណឹងដដែលប្រាប់ថា ករណីមានបុគ្គលឆ្លៀតឱកាសដូចព័ត៌មានខាងលើសាធារណជន អាណាព្យាបាល និងបេក្ខជនទាំងអស់ត្រូវសហការផ្តល់ព័ត៌មានដល់ក្រុមការងារគណៈកម្មការជ្រើសរើសបេក្ខជនដោយផ្ទាល់តាមទូរស័ព្ទលេខ៖០៨១ ៣១៩ ៦៦២/០៨១ ៣១៩ ៦៨៨/០៩៩ ២៥៣ ៦៧៧/០៩៧ ៥ ៩២០ ៤២០/០៩៧ ៥ ៩២០ ១៨៩។
លោក ឈុំ សុជាត អ្នកនាំពាក្យក្រសួងការពារជាតិបានបញ្ជាក់កាលពីថ្ងៃទី ៣ វិច្ឆិកា ថាការជូនដំណឹងនេះក៏ជា ការទប់ស្កាត់ជាមុនកុំឲ្យសាធារណជនចាញ់បោកជនខិលខូចតាមរយៈការសូកប៉ាន់ផ្សេងៗ ស្របពេលដែលឆ្នាំ ២០១៩ នេះក្រសួងការពារជាតិបានជ្រើសរើសកងកម្លាំងយោធិនក្របខ័ណ្ឌថ្មី។
លោកបានថ្លែងថា៖ «ឆ្នាំនេះយើងរើសកងកម្លាំងចូលក្របខ័ណ្ឌប្រមាណជាង ២០០០ នាក់ ដើម្បីយកមកបំពេញក្របខ័ណ្ឌយោធិនដែលត្រូវចូលនិវត្តន៍។ ក្នុងនោះមានជ្រើសរើសនាយទាហានសកម្ម នាយទាហានបន្តវេន និងនាយទាហានជើងគោកជាច្រើននាក់ទៀត។ ដូច្នេះដើម្បីការពារកុំឲ្យមានអ្នកដែលខិលខូចយកឱកាសនេះទៅបន្លំយកលុយគេ ដើម្បីចូលក្របខ័ណ្ឌកងទ័ព ទើបយើងប្រាប់ជាមុនបែបនេះ»។
មន្ត្រីនាំពាក្យរូបនេះបានបញ្ជាក់ថា បច្ចុប្បន្នក្រសួងការពារជាតិបានបង្កើតគណៈកម្មការជាច្រើនថ្នាក់ក្នុងការជ្រើសរើសបេក្ខជនប្រឡងចូលក្របខ័ណ្ឌកងទ័ពនេះ។ ដូច្នេះមិនអាចឲ្យមានបេក្ខជនណាម្នាក់ជាប់ក្របខ័ណ្ឌតាមរយៈផ្លូវកាត់បានទេ។ សូមសាធារណជនជ្រាប និងកុំចាញ់បោកជនខិលខូចឲ្យសោះ។
លោកបានបញ្ជាក់ថា៖ «ទោះជាយ៉ាងណាក៏ដោយ លើកនេះយើងនឹងការពារមិនឲ្យមានជនខិលខូច មិនឲ្យមានការបោកប្រាស់ការសូកប៉ាន់ទេ គឺត្រូវតែមានតម្លាភាពត្រូវតែមានការប្រឡងត្រឹមត្រូវទើបអាចចូលក្របខ័ណ្ឌបាន»។
លោក ឈុំ សុជាត ឲ្យដឹងដែរថា ក្រោយពីក្រសួងបានប្រកាសជ្រើសរើសបេក្ខជនជាបន្តបន្ទាប់ បច្ចុប្បន្នមានបេក្ខជនដាក់ពាក្យចូលប្រឡងកើនឡើងលើសចំនួន ១០ ដងនៃចំនួនដែលត្រូវការ ខណៈការប្រឡងចូលនឹងចាប់ផ្តើមនៅចុងឆ្នាំ ២០១៩ នេះ។
បើតាមលោក ព្រាប កុល ប្រធាន អង្គការតម្លាភាពកម្ពុជាលោកបានកត់សម្គាល់ឃើញថា កន្លងមកធ្លាប់មានជនឱកាសនិយមរៀបចំឲ្យមានការសូកប៉ាន់ ទើបក្រសួងការពារជាតិមានការព្រួយបារម្ភចំពោះការប្រឡងជ្រើសរើសបេក្ខជនលើកនេះ។
លោកថ្លែងថា៖ «កន្លងមកធ្លាប់មានមន្ត្រី ឬជនឱកាសនិយមព្យាយាមរៀបចំឱ្យមានការសូកលុយដោយសន្យាជួយរកការងារក្នុងជួរកងទ័ព។ ហេតុនេះ ហើយទើបមានការព្រួយបារម្ភ។ ដើម្បីបញ្ចៀសបញ្ហានេះ គឺតម្រូវឱ្យការដាក់ពាក្យប្រឡង ប្រកួតប្រជែងប្រកបដោយតម្លាភាព ក្រោមការចាត់ចែងរបស់គណៈកម្មការជ្រើសរើសដែលមានសមាសភាពចម្រុះ»៕