ភ្នំពេញ៖ ក្រសួងកិច្ចការនារី បង្កើតកម្មវិធីប្រកួតប្រជែងរចនារូបភាព និងសារចំនួន ១៥ឃ្លា ក្នុងន័យបញ្ឈប់អំពើហិង្សាលើស្រ្តី ដែលជាផ្នែកមួយនៃព្រឹត្តិការណ៍យុទ្ធនាការ ១៦ ថ្ងៃរបស់ពិភពលោក ដើម្បីអបអរទិវាអន្តរជាតិបំបាត់អំពើហិង្សាលើស្ត្រី ក្នុងឆ្នាំនេះ ហើយដែលយុទ្ធនាការនេះ បានចាប់ផ្តើមតាំងពីថ្ងៃទី ២៥ វិច្ឆិកា និងបន្តដល់ថ្ងៃទី ១០ ធ្នូ ២០២០។
តាមសេចក្តីប្រកាសព័ត៌មានរបស់ក្រសួងកិច្ចការនារីកាលពីចុងខែមុន កម្មវិធីការប្រកួតប្រជែងរចនារូបភាព និងសារក្នុងព្រឹត្តិការណ៍យុទ្ធនាការ ១៦ថ្ងៃ ដើម្បីបញ្ឈប់អំពើហិង្សាលើស្រ្តីនេះរៀបចំឡើងតាមរយៈកម្មវិធីដំណើរឆ្ពោះទៅមុខ ដើម្បីសមភាពយេនឌ័ររបស់ក្រសួងកិច្ចការនារី និងគាំទ្រដោយស្ថានទូតស៊ុយអ៊ែតប្រចាំកម្ពុជា និង UNDP Cambodia ។
ក្រសួងកិច្ចការនារី បានឲ្យដឹងថា បេក្ខជនដែលចូលរួមប្រកួតប្រជែង អាចឈ្នះរង្វាន់ជាទឹកប្រាក់ចាប់ពី ១៥០ ដុល្លារ ដល់ ៣៥០ ដុល្លារ និងរង្វាន់លើកទឹកចិត្តផ្សេងទៀត ដោយគ្រាន់តែចូលរួមបង្ហោះរូបភាពដែលបានរចនាហើយជាមួយនឹងសារអប់រំផ្ញើមកកាន់ទំព័រហ្វេសប៊ុករបស់ក្រសួង។
ក្រសួងកិច្ចការនារីបញ្ជាក់ថា៖ «កម្មវិធីប្រកួតប្រជែងនេះ ក្រុមការងារនឹងបង្ហោះរូបភាពដែលបានរចនាពីថ្ងៃទី១ដល់ថ្ងៃទី៦ ខែធ្នូ ឆ្នាំ២០២០ ហើយកម្មវិធី នឹងជ្រើសរើស រូបភាពដែលទទួលបានការចូលចិត្ត (Like) ច្រើន ចំនួន ៥ នាក់ សម្រាប់ជយលាភី»។
លោកស្រី ស ស៊ីណែត អនុប្រធាននាយកដ្ឋានការពារផ្លូវច្បាប់នៃក្រសួងកិច្ចការនារី បានអំពាវនាវឱ្យសាធារណជន ចូលរួមយុទ្ធនាការ ១៦ថ្ងៃ បញ្ឈប់អំពើហិង្សាលើស្រ្តី ដោយការចុច like លើរូបភាពដែលអ្នកពេញចិត្ត និងដើម្បីឱ្យម្ចាស់រូបឈ្នះរង្វាន់ក្នុងការប្រកួតប្រជែង។
លោកស្រីបញ្ជាក់ថា៖«សូមចែករំលែកបន្ត (Share) ដើម្បីឱ្យមិត្តរបស់អ្នកចូលរួមក្នុងកម្មវិធីនេះផង។ បញ្ជាក់ក្រុមការងាររាប់ចំនួន like ដែលច្រើនជាងគេតែលើរូបភាពដើមក្នុងផេកក្រសួងដែលបង្ហោះនេះប៉ុណ្ណោះ ។ ដោយគិតត្រឹមថ្ងៃទី៦ ខែធ្នូ ឆ្នាំ២០២០ ម៉ោង ៥ ល្ងាច។ ក្រុមការងារសូមថ្លែងអំណរគុណដល់លោកអ្នក ដែលបានផ្ញើរូបភាពក្នុងការចូលរួមកម្មវិធីនេះ»។
ជាមួយគ្នានេះ បើតាមលោកស្រី ការប្រកួតប្រជែងនេះ គឺជាផ្នែកនៃយុទ្ធនាការរបស់ពិភពលោក ដើម្បីបញ្ឈប់អំពើហិង្សាលើស្ត្រី និងក្មេងស្រី បន្ទាប់ពីមើលឃើញថា បញ្ហានេះ មានការកើនឡើងក្នុងអំឡុងវិបត្តកូវីដ១៩។
ក្រៅពីកម្មវិធីនេះ លោកស្រីអះអាងថា កម្ពុជាបានដាក់ចេញនូវវិធានការ យុទ្ធនាការ និងសកម្មភាពជាច្រើន ដើម្បីចូលរួមលុបបំបាត់អំពើហិង្សាលើស្ត្រី និងក្មេងស្រី។ ធ្វើយ៉ាងណាឱ្យប្រាកដថា ជនរងគ្រោះទទួលបានការជួយសង្រ្គោះទាន់ពេលវេលា ហើយប្រជាពលរដ្ឋទូទៅ មានការយល់ដឹងអំពីបញ្ហានេះ។
កញ្ញាចិត្ត កញ្ចនា អ្នកចម្រៀង និងអ្នកនិពន្ធចម្រៀងឯករាជ្យ ដែលបានចូលរួមយុទ្ធនាការ១៦ថ្ងៃ បញ្ឈប់អំពើហិង្សាលើស្រ្តីជាមួយក្រសួងកិច្ចការនារី និងពលរដ្ឋខ្មែរដទៃទៀត បាននិយាយថា មានស្ត្រី និងក្មេងស្រីជាច្រើននាក់ ដែលត្រូវបានគេបំពានដោយពាក្យសម្តី និងកាយវិការ។ កញ្ញារំពឹងថា ជនរងគ្រោះពីការប្រើអំពើហិង្សាលើស្ត្រី និងក្មេងស្រី ត្រូវតែហ៊ាននិយាយវា ចេញជាសាធារណៈ។
កញ្ញាកញ្ចនា និយាយថា៖«ខ្ញុំសូមចែករំលែកបទពិសោធផ្ទាល់ខ្លួន ដែលនាងខ្ញុំត្រូវបានគេបំពានដោយការប្រើពាក្យសម្តីមិនសមរម្យ នៅពេលខ្ញុំជិះម៉ូតូពីផ្ទះ ទៅកាន់កន្លែងហាត់ប្រាណ។ អារម្មណ៍ពេលហ្នឹងភ័យ និងខ្លាច ហើយខឹងដែរ ប៉ុន្តែមិនបានតបតទៅកាន់គាត់វិញទេ»។
កញ្ញាបន្តថា៖«សូមអ្នកទាំងអស់គ្នាគិតឡើងវិញ ចំពោះការប្រើពាក្យសម្តី និងការប្រើសកម្មភាពដែលអាចបៀតបៀនទៅកាន់អ្នកដទៃ»។
យុទ្ធនាការ១៦ថ្ងៃ ដើម្បីបញ្ឈប់អំពើហិង្សាលើស្រ្តី ត្រូវបានចាប់ផ្តើមតាំងពីថ្ងៃទី២៥ វិច្ឆិកា រហូតដល់ទិវាសិទ្ធិមនុស្សថ្ងៃទី១០ ខែធ្នូ ឆ្នាំ២០២០ ដើម្បីរួមគ្នាបញ្ចប់អំពើហិង្សាទាក់ទងនឹងយែនឌ័រ និងហិង្សាតាមគ្រប់រូបភាពមកលើស្ត្រី និងក្មេងស្រីតាមរយៈបង្កើតជាកម្មវិធីនានា និងផ្សព្វផ្សាយពាក្យស្លោក។ យុទ្ធនាការនេះ មានអង្គការជាតិ អន្តរជាតិ និងស្ថាប័នរដ្ឋជាច្រើននៅក្នុងប្រទេសកម្ពុជា បានប្រកាសចូលរួម៕