.jpg)
ការប្រគល់បណ្ណបញ្ជាក់ការសិក្សាដល់គ្រូបង្គោលថ្មីៗនេះ។ រូប ក្រសួងកិច្ចការនារី
ភ្នំពេញៈ ក្រសួងកិច្ចការនារីបាននិងកំពុងបន្តបណ្ដុះបណ្ដាលគ្រូបង្គោលថ្នាក់តំបន់ជំហានទី ១ ស្តីពីបទដ្ឋានអប្បបរមាសម្រាប់ការផ្តល់ប្រឹក្សាជាមូលដ្ឋានដល់ស្ត្រី និងក្មេងស្រីរងគ្រោះដោយអំពើហិង្សា ខណៈការងារនេះទើបធ្វើបានចំនួន ៨ ខេត្តក្នុងចំណោមគម្រោង ២៥ ខេត្តស្របតាមគោលនយោបាយរាជរដ្ឋាភិបាលក្នុងការផ្ទេរធនធានមនុស្ស និងថវិកាទៅថ្នាក់ក្រោមជាតិ។
លោកស្រី ស ស៊ីណែត អ្នកនាំពាក្យ និងជាអនុប្រធាននាយកដ្ឋានការពារផ្លូវច្បាប់នៃក្រសួងកិច្ចការនារីបានថ្លែងប្រាប់ភ្នំពេញប៉ុស្ដិ៍កាលពីម្សិលមិញថា កាលពីថ្ងៃសុក្រទី ៥ ខែមិថុនា ក្រសួងបានបញ្ចប់វគ្គបណ្តុះបណ្តាលគ្រូបង្គោលដល់មន្ត្រី/ភ្នាក់ងារនគរបាលយុត្តិធម៌ថ្នាក់ក្រោមជាតិរបស់ក្រសួងចំនួន ២៥ នាក់ ប្រុស ៦ នាក់ មកពីខេត្ដចំនួន ៨ ក្នុងគម្រោង ២៥ រាជធានី ខេត្ត។
លោកស្រីថ្លែងថា៖ «តាមផែនការរបស់ក្រសួងសម្រាប់ជំហានទី ១ នេះ យើងនឹងបណ្ដុះបណ្ដាលគ្រូបង្គោលទាំង ២៥ រាជធានី-ខេត្ដ ស្តីពីបទដ្ឋានអប្បបរមាសម្រាប់ការផ្តល់ប្រឹក្សាជាមូលដ្ឋានដល់ស្ត្រី និងក្មេងស្រីជាជនរងគ្រោះដោយអំពើហិង្សាទាក់ទងនឹងយេនឌ័រ...ដោយចាប់ផ្ដើមពីខែមិថុនានេះរហូតដល់ខែសីហា»។
លោកស្រីថ្លែងថា វគ្គបណ្ដុះបណ្ដាលជំហានដំបូងនេះក្រសួងកិច្ចការនារី ចង់ឲ្យមន្ដ្រីនៅថ្នាក់ក្រោមជាតិ ក្លាយជាអ្នកផ្ដល់សេវាល្អដល់ស្ត្រី និងក្មេងស្រីជាជនងាយរងគ្រោះ ដោយអំពើហិង្សាទាក់ទងនឹងយេនឌ័រ។ ហេតុនេះមន្ត្រីចាំបាច់ត្រូវពង្រឹងសមត្ថភាពចំណេះដឹង និងការស្វែងយល់លើវិធីសាស្ដ្រផ្លូវចិត្ដសម្រាប់ជួយដល់ក្រុមជនងាយរងគ្រោះ។
លោកស្រីបញ្ជាក់ថា៖ «ក្រោយទទួលបានការបណ្ដុះបណ្ដាលនេះមន្ដ្រីរបស់យើងក៏អាចយកចំណេះដឹងទៅបញ្ជ្រាបបន្ថែមដល់មន្ដ្រី និងអ្នកពាក់ព័ន្ធនៅថ្នាក់ក្រោមជាតិ ព្រោះគោលដៅរបស់ក្រសួង ក៏ចង់ពង្រីកធនធានមនុស្សក្នុងការផ្ដល់សេវានេះឲ្យដល់មូលដ្ឋាន ព្រោះមន្ដ្រីជំនាញនៅក្រសួងកិច្ចការនារីមិនអាចចុះទៅដល់មូលដ្ឋានគ្រប់ខេត្ដក្រុង បានគ្រប់ពេលវេលាឡើយ»។
លោកស្រីថា ដូច្នេះក្រសួងបានឲ្យមន្ដ្រីឡើងមកពីទាំង ២៥ រាជធានី ខេត្ដ ដើម្បទទួលការបណ្ដុះបណ្ដាលឲ្យក្លាយទៅជាគ្រូបង្គោល។ ការបណ្ដុះបណ្ដាលនេះគឺជាជំហានទី ១ តែក្រសួងកិច្ចការនារីនៅមានជំហានបន្តបន្ទាប់ទៀត។
លោកស្រី ញាណ សុចិត្រា អគ្គនាយកនៃអគ្គនាយកដ្ឋានអភិវឌ្ឍន៍សង្គមក្រសួងកិច្ចការនារីកាលពីថ្ងៃទី ៥ ខែមិថុនា បានចូលរួមធ្វើជាអធិបតីក្នុងពិធីបិទវគ្គបណ្តុះបណ្តាលដល់គ្រូបង្គោលទាំង ២៥ នាក់ ដែលមកពីខេត្ដចំនួន ៨ នេះ បន្ទាប់ពីពួកគាត់បានបញ្ចប់វគ្គរយៈពេល ៣ ថ្ងៃ ប្រកបដោយជោគជ័យតាមការគ្រោងទុក។
លោកស្រីថ្លែងថា៖ «ជាលទ្ធផលនៃវគ្គបណ្ដុះបណ្ដាលមន្ត្រី/ភ្នាក់ងារនគរបាលយុត្តិធម៌សិក្ខាកាមបានយល់ដឹងអំពីបទដ្ឋានអប្បបរមាសម្រាប់ការផ្តល់សេវាជាមូលដ្ឋានដល់ស្ត្រី និងក្មេងស្រីជាជនរងគ្រោះដោយអំពើហិង្សាដែលទាក់ទងនឹងយេនឌ័រ និងសិទ្ធិជាមូលដ្ឋានរបស់ជនរងគ្រោះនៅក្នុងបទដ្ឋានអប្បបរមា និងរបៀបថែទាំខ្លួនឯងក្នុងនាមជាអ្នកផ្តល់សេវា»។
លោកស្រីថ្លែងដែរថា តាមរយៈវគ្គបណ្តុះបណ្តាលនេះដែរសិក្ខាកាមបានអនុវត្តការសាកល្បងបង្រៀនអំពីមេរៀនបទដ្ឋានអប្បបរមាដើម្បីពង្រឹងសម្ថភាពរបស់ខ្លួនក្នុងការក្លាយខ្លួនជាអ្នកបណ្តុះបណ្តាលបន្តទៅអ្នកផ្តល់សេវានៅថ្នាក់ក្រោមជាតិ។
លោក អំ សំអាត អ្នកឃ្លាំមើលបញ្ហាសិទ្ធិមនុស្សនៃអង្គការលីកាដូបានលើកឡើងថា កន្លងមករាជរដ្ឋាភិបាលក៏ដូចជាក្រសួងកិច្ចការនារីបានធ្វើការងារមួយចំនួនហើយលើការផ្សព្វផ្សាយពីអំពើហិង្សាទាក់ទងនឹងយេនឌ័រចំពោះស្ដ្រី និងកុមារនេះ តែហាក់មិនទាន់ទូលំទូលាយ។
លោកថា៖ «អ្វីដែលសំខាន់ ការផ្សព្វផ្សាយនោះវាអត់ទាន់គ្រប់ជ្រុងជ្រោយទេ។ យើងគាំទ្រចំពោះការបើកវគ្គបណ្ដុះបណ្ដាលបែបនេះដល់មន្ដ្រីរាជធានីខេត្ដនេះក្នុងការផ្ដល់សេវាអំពីកិច្ចការពារស្ត្រី និងកុមារ។ ពលរដ្ឋមួយចំនួនពួកគាត់មិនទាន់បានយល់ច្បាស់អំពីទីកន្លែងទទួលសេវា និងការផ្ដល់សេវារបស់មន្ដ្រីនៅថ្នាក់ក្រោមជាតិនេះ»។
លោក សំអាត បានបន្តថាករណីអំពើហិង្សា និងការរំលោភបំពានលើស្ត្រី និងកុមារនៅតែជាការគួរឲ្យព្រួយបារម្ភ។ ដូចជាបញ្ហារំលោភសេពសន្ថវៈគឺនៅស្ថិតក្នុងស្ថានភាពកាន់តែឃោរឃៅដោយមានទាំងករណីរំលោភសម្លាប់ ឪពុករំលោភកូនខ្លួនឯង ឬតារំលោភចៅជាដើម៕
