ភ្នំពេញៈ ក្រសួងសេដ្ឋកិច្ច និងក្រសួងសាធារណការសម្រេចបញ្ចុះតម្លៃស្ទើរតែ ៥០ ភាគរយសម្រាប់សេវាសាធារណៈផ្នែកដឹកជញ្ជូនផ្លូវគោកឲ្យថោកជាងមុនរួមមានការធ្វើប័ណ្ណបើកបររថយន្តពន្យារ និងត្រួតពិនិត្យលក្ខណៈបច្ចេកទេសដែលការកែប្រែតម្លៃនេះមានការសាទរពីសង្គមស៊ីវិលតែជំរុញឲ្យក្រសួងជួយសម្រួលដល់អ្នកដែលទៅធ្វើប័ណ្ណឲ្យមានលក្ខណៈងាយស្រួលជាងមុន។
សេចក្តីសម្រេចចុះថ្ងៃទី ២១ ខែមករាឲ្យដឹងថាក្រសួងទាំងពីរបានកែប្រែតម្លៃថ្មីសម្រាប់ការប្រឡងយកប័ណ្ណបើកបរពន្យារ ប្តូរ និងតម្លៃត្រួតពិនិត្យលក្ខណៈបច្ចេកទេសយានយន្តជាដើម។
ក្រសួងទាំងពីរសម្រេចថា ចំពោះការប្រឡងយកប័ណ្ណបើករថយន្តប្រភេទ (ខ) រថយន្ត ៤ កៅអីជាលក្ខណៈគ្រួសារមានតម្លៃ ៩ ម៉ឺនរៀលដែលពីមុន ១៨ ម៉ឺនរៀលមានសុពលភាព ១០ ឆ្នាំរយៈពេលផ្តល់សេវា ១០ ថ្ងៃ (គិតតែថ្ងៃធ្វើការ)។ ចំណែកឯការប្រឡងយកប័ណ្ណបើកបររថយន្តប្រភេទ (គ) រថយន្តដឹកទំនិញធុនធំ និង( ឃ) រថយន្តដឹកអ្នកដំណើរធុនធំ ២០ កៅអីឡើងតម្លៃ ៩៥ ០០០ រៀល និងប្រភេទ ( ង) រថយន្តដឹកទំនិញធុនធំតែមានសណ្តោងតម្លៃ ១០ ម៉ឺនរៀលរយៈពេលនៃការផ្ដល់សេវា ១០ ថ្ងៃ និងសុពលភាព ៥ ឆ្នាំដូចគ្នា។
ចំពោះការប្រឡងយកប័ណ្ណបើកបរម៉ូតូប្រភេទ (ក) ចាប់ពី ១២៦ CC ឡើងទៅតម្លៃ ៣ ម៉ឺនរៀលមានសុពលភាព ១០ ឆ្នាំរយៈពេលផ្តល់សេវា ១០ ថ្ងៃ (គិតតែថ្ងៃធ្វើការ ) ចំណែកការប្តូរ ពន្យារ ប័ណ្ណបើកបរ ទោចក្រយានយន្តប្រភេទ (ក) ដដែលមានតម្លៃ ២ ម៉ឺនរៀលរយៈពេលផ្តល់សេវា ១០ ថ្ងៃដូចគ្នា។
ចំពោះការប្តូរ និងពន្យារប័ណ្ណបើកបររថយន្តគ្រប់ប្រភេទមានតម្លៃ ៣ ម៉ឺនរៀលរយៈពេលផ្តល់សេវា ១០ ថ្ងៃនៃថ្ងៃធ្វើការ និងការបញ្ជាក់ប័ណ្ណបើកបរជាភាសាបរទេសតម្លៃ ២៥ ០០០ រៀលរយៈពេលផ្តល់សេវា ៣ ថ្ងៃ។
ប្រធាននាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូនលោក ព្រាប ច័ន្ទវិបុល ប្រាប់ភ្នំពេញប៉ុស្តិ៍ពីម្សិលមិញបន្ថែមថាការចេញតារាងតម្លៃថ្មីលើផ្នែកដឹកជញ្ជូនផ្លូវគោកភាគច្រើនបញ្ចុះតម្លៃស្ទើរ ៥០ ភាគរយនៃតម្លៃទាំងអស់លើកលែងតែតម្លៃត្រួតពិនិត្យលក្ខណៈបច្ចេកទេសយានយន្ត (ឈៀក) និងការធ្វើស្លាកលេខដែលចុះតម្លៃ ៤០ ភាគរយ។
លោកបន្តថារាល់តម្លៃនេះនឹងចាប់ផ្តើមអនុវត្តនៅថ្ងៃចន្ទនេះតែការផាកពិន័យនឹងចាប់ផ្តើមនៅពាក់កណ្តាលខែមីនា ។
លោកថា៖ «បញ្ចុះតម្លៃប័ណ្ណបើកបរ ៥០ ភាគរយ ឈៀក ហើយនឹងចុះបញ្ជីធ្វើស្លាកលេខ ៤០ ភាគរយលើកលែងតែប័ណ្ណបើកបរម៉ូតូ ៥០ ភាគរយដែរ»។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ បានគាំទ្រតម្លៃថ្មីនេះ និងថាជាការលើកទឹកចិត្តឲ្យពលរដ្ឋរួមគ្នាពង្រឹងច្បាប់ចរាចរណ៍ និងអាចកាត់បន្ថយគ្រោះថ្នាក់ផងដែរ។
តែលោកនៅមើលឃើញថា ទោះជាតម្លៃថោកជាងមុនតែពលរដ្ឋនៅតែចំណាយថវិកាច្រើនដោយលើកឧទាហរណ៍ថា «សេវាឈៀករថយន្តមួយជាក់ស្តែងពីមុន ២០ ដុល្លារតែពេលពលរដ្ឋទៅរកសេវាហ្នឹងគឺមិនបានបង់ប៉ុណ្ណឹងទេដោយសារការិយាធិបតេយ្យស្មុគស្មាញពេកដូច្នេះពលរដ្ឋទៅរកអ្នករត់ការត្រូវចំណាយអស់ ១០ ដុល្លារបន្ថែមទៀត»។ លោកជំរុញឲ្យកែសម្រួលនីតិវិធីនៃការដាក់ពាក្យពង្រឹងឥរិយាបថអ្នកផ្តល់សេវា និងលុបចោលអ្នករត់ការ (អ្នកគួកជេ) ជាដើម។
លោកបន្ថែមថាមួយវិញទៀតរដ្ឋគួរបើកសាលាបង្រៀនបើកបរខ្លួនឯងដើម្បីឲ្យពលរដ្ឋទៅទទួលសេវានោះដែលមានតម្លៃសមរម្យព្រោះតម្លៃឯកជននៅខ្ពស់ដដែល។
លោកថា៖ «តម្លៃរដ្ឋប៉ុណ្ណឹងប៉ុន្តែអ្នកទៅរៀន និងប្រឡងយកប័ណ្ណបើកបរនៅតែថ្លៃព្រោះរដ្ឋគ្មានលទ្ធភាពច្រើនក្នុងការផ្តល់សេវាបង្រៀនប្រឡងយកប័ណ្ណបើកបរទេហើយភាគច្រើនទៅរៀននៅសាលាឯកជន។ រដ្ឋគ្មានសិទ្ធិគ្រប់គ្រងលើតម្លៃសាលាឯកជនទេអ៊ីចឹងហើយអ្វីដែលយើងឃើញលុយចូលរដ្ឋតិចតែពលរដ្ឋនៅតែចំណាយច្រើនសម្រាប់ទទួលបានប័ណ្ណបើកបរដោយសារសាលាឯកជនគេកំណត់តម្លៃតាមចិត្តគេ»។
ទាក់ទងនឹងបញ្ហានេះលោក ព្រាប ច័ន្ទវិបុល លើកឡើងថារដ្ឋពុំមានបំណងបើកសាលាបង្រៀនបើកបរទេដោយទុកឲ្យឯកជនប្រកួតប្រជែងគ្នា។
តែលោកសង្កេតឃើញថាការរៀនបើកបរបច្ចុប្បន្នតម្លៃខ្លះមានការចុះថោក និងពេលខ្លះឡើងពេលមានការប្រកួតដេញជើងគ្នា។ លោកថា៖ «ថ្លៃពេលម្តងៗទេតែជាទូទៅគេដេញជើងគ្នាចុះថោកតែចុះថោកខ្លាំងពេកការហាត់បើកបរបានតិចម៉ោងឧទាហរណ៍ ៣០ ម៉ោងនៅសល់ ៥ ឬ ៦ ម៉ោងខ្លះសល់ ១០ ម៉ោងអ៊ីចឹងវាអត់រួចថ្លៃសាំងបោះគេអ៊ីចឹងយើងឲ្យគេប្រកួតប្រជែងគ្នាទៅ»។
ប៉ុន្តែលោកទទួលស្គាល់ថាពិតជាមានការិយាធិបតេយ្យនៅកន្លែងផ្តល់សេវាមួយចំនួនពោលគឺពិតជាមានអ្នករត់ការឯកសារ។ ប៉ុន្តែលោកថា ករណីនេះខាងក្រសួងមានគ្រោងលុបបំបាត់តាំងពីឆ្នាំ ១៩៩០ មកម្ល៉េះតែធ្វើមិនបានដោយសារអ្នករត់ការទាំងនោះរួមចំណែកធ្វើឲ្យនីតិវិធីផ្តល់ឯកសារដល់ពលរដ្ឋលឿនជាងមុនពោលគឺពលរដ្ឋខ្លះមិនដឹងត្រូវបំពេញអ្វីខ្លះ និងចំណាយពេលច្រើន។
ទោះបែបនេះក្តីលោកសង្កត់ធ្ងន់ថាបើមិនចង់រកសេវាអ្នករត់ការគឺអាចធ្វើខ្លួនឯងបានគ្មានបង្ខំទេ។
ក្នុងតារាងថ្មីនេះក៏បានកំណត់តម្លៃនៃការត្រួតពិនិត្យលក្ខណៈបច្ចេកទេសយានយន្ត (ឈៀក) រថយន្តគ្រួសារ ៤ កៅអីតម្លៃ ៤២ ០០០ រៀល និងរថយន្តទេសចរណ៍លក្ខណៈគ្រួសារពី ៥ ទៅ ៩ នាក់តម្លៃ ៤៨ ០០០ រៀលរយៈពេលផ្តល់សេវា ១ ម៉ោង និងមានសុពលភាព ២ ឆ្នាំដូចគ្នា។ ចំណែករថយន្តទេសចរណ៍ (តាក់ស៊ី ) ផ្ទុកមនុស្សពី ៥ នាក់ ដល់ ៩ នាក់ឡើងតម្លៃ ៤៨ ០០០ រៀលរយៈពេលផ្តល់សេវា ១ ម៉ោង និងមានសុពលភាព ១ ឆ្នាំ។ រីឯរថយន្តដឹកអ្នកដំណើរ ដឹកទំនិញធ្វើអាជីវកម្មប្រភេទរថយន្តធំៗផ្ទុកចាប់ពី ១០ នាក់ឡើងមានតម្លៃចាប់ពី ៣ ម៉ឺនរៀលរហូតដល់តម្លៃខ្ពស់បំផុត ៦៦ ០០០ រៀលប៉ុណ្ណោះ៕
