.jpg)
គ្រូកំពុងវាស់កម្ដៅឱ្យកូនសិស្សពេលរៀបចូលថ្នាក់នៅភ្នំពេញកាលពីឆ្នាំមុន។ ហុង មិនា
ភ្នំពេញៈ ក្រសួងអប់រំ យុវជន និងកីឡាបានប្រជុំកំណត់រួចជាស្រេចនូវយុទ្ធសាស្ត្រត្រៀមបើកសាលារៀនឡើងវិញ ក្រោយការប្រកាសបិទព្រឹត្តិការណ៍សហគមន៍ ២០ កុម្ភៈ។ ប៉ុន្ដែដំណើរការបើកសាលានាពេលនេះគឺត្រូវផ្តោតលើគោលការណ៍សុវត្ថិភាពសុខភាព ស្របតាមវិធានការសុខាភិបាល និងគន្លងជីវិតថ្មីក្នុងវិស័យអប់រំ។ នេះបើតាមអ្នកនាំពាក្យក្រសួងនេះ។
លោក រស់ សុវាចា អ្នកនាំពាក្យក្រសួងអប់រំបានឱ្យដឹងពីថ្ងៃទី ២២ ឧសភា ថា ក្រសួងអប់រំ បានប្រជុំកំណត់រួចជាស្រេចនូវយុទ្ធសាស្ត្រត្រៀមបើកសាលារៀនឡើងវិញក្រោយការប្រកាសបិទបញ្ចប់ព្រឹត្តិការណ៍សហគមន៍ ២០ កុម្ភៈ។
លោកបានថ្លែងថា៖ «ជារួមការបើកសាលារៀនឡើងវិញនាពេលណាមួយខាងមុខនេះផ្តោតលើគោលការណ៍សុវត្ថិភាពសុខភាព ស្របនឹងវិធានការសុខាភិបាល ដើម្បីលើកកម្ពស់គន្លងជីវិតថ្មីក្នុងវិស័យអប់រំ»។
លោកបានបញ្ជាក់ថា៖ «ក្រសួងអប់រំយុវជន និងកីឡានឹងជម្រាបជូនសាធារណជននាពេលក្រោយស្តីពីព័ត៌មានពាក់ព័ន្ធនឹងការបើកសាលារៀនឡើងវិញ និងទិដ្ឋភាពពាក់ព័ន្ធ»។
បើតាមលោក សុវាចា មកទល់ពេលនេះបុគ្គលិកអប់រំ និងលោកគ្រូអ្នកគ្រូចំនួន ៨៥ ភាគរយនៃចំនួនសរុប ១៥៨ ០០០ នាក់ នៅទូទាំងប្រទេសបានទទួលការចាក់វ៉ាក់សាំងរួចរាល់។
លោកថ្លែងថា ចំពោះមុខនេះសិស្សានុសិស្សនៅទូទាំង ២៥ ខេត្ត-រាជធានីត្រូវបន្តអនុវត្តវិធានការ៣ការពារ ៣កុំ និងអាចបន្តការសិក្សាតាមអនឡាញបានតាមរយៈមាតិកាឌីជីថលរបស់ក្រសួងអប់រំ យុវជន និងកីឡា។
លោកបង្ហាញមាតិកាឌីជីថលទាំងនោះរួមមាន កម្មវិធីស្វ័យសិក្សា MoEYS E-Learning ជាវីដេអូពីថ្នាក់ទី ១ ដល់ថ្នាក់ទី ១២ សៀវភៅសិក្សាអេឡិចត្រូនិក ដូចជា សៀវភៅកំណែអំណានទូទៅ ចំណេះដឹងសកលរឿងនិទាន កម្មវិធីតេស្តសមត្ថភាពសិស្ស និងទំព័រព័ត៌មានអប់រំ។
អ្នកសិក្សាក៏អាចទាញយកកម្មវិធី ស្វ័យសិក្សានេះពី App Store, Google Play និង App Gallery រួចអានតាមសេចក្តីណែនាំបច្ចេកទេសដែលមានស្រាប់នៅក្នុងកម្មវិធីសិក្សាទាំងនោះ។
បើតាមលោក សុវាចា អ្នកសិក្សាក៏អាចចូលសិក្សាតាមមាតិកាឌីជីថលដូចជា មជ្ឈមណ្ឌលសិក្សាតាមរយៈអេឡិចត្រូនិក elearning.moeys.gov.kh, បណ្តាញ Youtube ផ្លូវការ youtube.com/moeyscambodia, ហ្វេសប៊ុកផ្លូវការ facebook.com/moeys.gov.kh, ការអប់រំកុមារតូច youtube.com/eccdcambodia,ប៉ុស្តិ៍ទូរទស្សន៍អប់រំថ្មី "ទទក២" របស់ក្រសួងព័ត៌មាន, App ក្រសួងប្រៃសណីយ៍ និងទូរគមនាគមន៍, កម្មវិធីអប់រំតាមវិទ្យុជួយសិស្សជនជាតិដើម បន្តរៀនសូត្រ, App វិស័យឯកជននានាដូចជា E-School Cambodia ជាដើម ។
លោក ប៉ិច បូឡែន ប្រធានសហព័ន្ធសេវាអប់រំនៅកម្ពុជា និងជាអគ្គនាយកបណ្តាញអប់រំ Westline Education Group បានថ្លែងពីម្សិលមិញថា គ្រឹះស្ថានអប់រំឯកជន គាំទ្រតាមសេចក្ដីណែនាំរបស់ក្រសួងអប់រំនេះ ដោយសារអាយុជីវិតមនុស្សគឺសំខាន់ជាងអ្វីៗទាំងអស់ក្នុងពេលនេះ។
លោកថា៖ «អ្វីដែលយើងរំពឹងសម្រាប់វិស័យឯកជន បន្ទាប់ពីស្ថានភាពនៃការរីករាលដាលជំងឺកូវីដ ១៩ នៃព្រឹត្ដិការណ៍ ២០ កុម្ភៈនេះ អាចគ្រប់គ្រងបានហើយ សាលាឯកជនអាចបើកឡើងវិញនៅអំឡុងខែសីហា ឬខែកញ្ញាខាងមុខបាននោះ គឺល្អណាស់ សម្រាប់និរន្តរភាពគ្រឹះស្ថានឯកជន»។
លោកបានបន្តថា ប្រហែល ២ ឆ្នាំមកនេះសាលារៀនឯកជនក៏ដូចវិស័យដទៃទៀតបានរងផលប៉ះពាល់ដូចគ្នាលើការផ្តល់សេវាកម្ម និងនិរន្តរភាពសេដ្ឋកិច្ច។ មកទល់ពេលនេះសាលារៀនឯកជនតាមខេត្តភាគច្រើនជាពិសេសសាលាភាសា និងអប់រំកុមារតូចបានផ្អាកការបង្រៀន ដោយសារកត្តាចម្បង២ គឺផលលំបាកនៃការបង្រៀនតាមអនឡាញ និងកង្វះថវិកាបន្ត។ រីឯសាលាដែលអាចនៅដំណើរការបានគឺអប់រំតាមអនឡាញ ជាពិសេសនៅកម្រិតឧត្តមសិក្សា និងសាលាអប់រំដល់គ្រួសារមានជីវភាពបង្គួរ និងខ្ពស់។
លោកថា៖ «ពីពេលនេះទៅមុខសាលារៀនឯកជនទាំងអស់ត្រូវបែរមកជជែកគ្នារកដំណោះស្រាយរួមគ្នាវិនិយោគរួមគ្នា ដើម្បីអភិវឌ្ឍប្រព័ន្ធអប់រំមួយនេះ។សាលារៀនណាដែលបាននិងកំពុងវិនិយោគលើបច្ចេកវិទ្យាអប់រំរៀនសូត្រវិធីសាស្ត្របង្រៀនថ្មី គ្រូបង្រៀនយល់គាំទ្រ និងអភិវឌ្ឍខ្លួនតាមគន្លងថ្មីនៃវិស័យអប់រំសាលានោះនឹងឆ្លងផុតគ្រាលំបាកនេះ ហើយអាចនឹងរីកចម្រើនជាងមុន។ ឯសាលាណាដែលធ្វើមិនដឹងមិនឮ មិនសង្វាតស្វែងយល់ពីរបត់ថ្មីនៃការអប់រំនេះនឹងអន់ថយទៅៗហើយឈានទៅបិទទ្វារតែម្តង»៕
