.jpg)
ម៉ូតូកង់ ៣ កំពុងបើកបរ នៅតាមផ្លូវព្រះមុនីវង្ស កាលពីម្សិលមិញ។ ហុង មិនា
ភ្នំពេញៈ ក្រសួងសាធារណការ និងដឹកជញ្ជូនគ្រោងនឹងពន្យារពេលថ្ងៃឱសានវាទ សម្រាប់ចូលរៀនច្បាប់ចរាចរណ៍ និងប្រឡងយកប័ណ្ណបើកបរ ដល់ក្រុមអ្នកបើកបរម៉ូតូសណ្ដោងរ៉ឺម៉ក និងម៉ូតូកង់ ៣ រហូតដល់ជាងពាក់កណ្ដាលខែសីហា ២០១៩ ដើម្បីផ្ដល់ឱកាសឲ្យពួកគេបានចូលរៀនឲ្យបានគ្រប់គ្នា។
លោក ឈួន វ៉ន់ អគ្គនាយក នៃអគ្គនាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូន បានប្រាប់ភ្នំពេញប៉ុស្តិ៍ កាលពីម្សិលមិញថា គម្រោងពន្យារពេលដាក់ឱសានវាទ សម្រាប់ការចាត់វិធានការផាកពិន័យអ្នកបើកបរម៉ូតូសណ្ដោងរ៉ឺម៉ក និងត្រីចក្រយានយន្តគ្រប់ប្រភេទ ដែលមិនទាន់មានប័ណ្ណបើកបរ បានធ្វើឡើងបន្ទាប់ពីក្រុមអ្នកបើកបរម៉ូតូសណ្ដោងរ៉ឺម៉ក និងត្រីចក្រយានយន្តភាគច្រើន បានត្អូញត្អែរអំពីការលំបាកក្នុងការចូលរួមប្រឡងយកប័ណ្ណបើកបរ ដោយសារតែមិនចេះអក្សរ និងសូមឲ្យក្រសួង មន្ទីរពាក់ព័ន្ធ ជួយអន្តរាគមន៍ ធ្វើយ៉ាងណារៀបចំមេរៀនសម្រាប់ប្រឡងលើវិញ្ញាសាទ្រឹស្ដី ទាក់ទងច្បាប់ និងស្លាកសញ្ញាចរាចរណ៍ ឲ្យមានលក្ខណៈងាយស្រួល ដល់ពួកគាត់។
លោក វ៉ន់ ថ្លែងថា៖ «នៅពេលនេះ ក្រសួងបានរៀបចំមេរៀនដែលផ្ដោតសំខាន់ទៅលើទ្រឹស្តីនៃវិធានបើកបរ ដោយដាក់បញ្ចូលនូវមាត្រាសំខាន់ៗ នៃច្បាប់ចរាចរណ៍ និងមានដាក់បញ្ចូលនូវគំនូស និងស្លាកសញ្ញាចរាចរណ៍ ដើម្បីឲ្យពួកគាត់ងាយយល់ និងងាយចងចាំ»។
លោកបន្តថា កាលពីថ្ងៃទី ១៧ ខែ ឧសភា ក្រសួងបានផ្ដល់សៀវភៅមេរៀនទាំងនោះ ទៅឲ្យមន្ទីរសាធារណការ និងដឹកជញ្ជូន និងអង្គភាពពាក់ព័ន្ធទាំងអស់ នៅគ្រប់តាមបណ្ដារាជធានី-ខេត្ត ទូទាំងប្រទេសយកទៅបង្រៀនពួកគាត់ដោយរំពឹងថា ពួកគាត់នឹងចូលរួមរៀនសូត្រ និងប្រឡងយកប័ណ្ណបើកបរទាំងអស់គ្នា។
កាលពីថ្ងៃទី ៩ ខែ មេសា ឆ្នាំ ២០១៩ លោកទេសរដ្ឋមន្ត្រី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន បានប្រកាសទុករយៈពេល ៣ ខែ ដោយដាក់ឱសានវាទត្រឹមថ្ងៃទី ៩ ខែ កក្កដា ឆ្នាំ ២០១៩ សម្រាប់អ្នកបើកបរម៉ូតូកង់ ៣ ទាំងអស់ទៅរៀនបើកបរ និងច្បាប់ចរាចរណ៍ ដើម្បីប្រឡងយកប័ណ្ណបើកបរម៉ូតូកង់ ៣ ដោយលោកលើកឡើងថា ៩៨ ភាគរយ នៃអ្នកបើកម៉ូតូកង់ ៣ គឺ «ខ្វះការយល់ដឹងអំពីច្បាប់ចរាចរណ៍ និងគ្មានប័ណ្ណបើកបរ»។
លោកបានព្រមានថា ផុតថ្ងៃឱសានវាទ (ថ្ងៃទី ៩ ខែ កក្កដា ២០១៩) នេះទៅ ក្រសួងនឹងចាប់ផ្ដើមរឹតបន្តឹងការអនុវត្តច្បាប់ ចាប់ផាកពិន័យដោយបង្ខំ និងដោយគ្មានការលើកលែងជាដាច់ខាត ចំពោះអ្នកបើកបរម៉ូតូកង់ ៣ ទាំងឡាយណាដែលគ្មានប័ណ្ណបើកបរ។
បន្ទាប់ពីមានការប្រកាសនោះ បាន ២ សប្ដាហ៍ ក្រុមអ្នកបើកបរម៉ូតូសណ្ដោងរ៉ឺម៉ក និងត្រីចក្រយានយន្តជាង ៣ ០០០ នាក់ នៅទូទាំងប្រទេស បានចូលរៀនច្បាប់ចរាចរណ៍ហើយសិក្ខាកាមជាង ១ ០០០ នាក់ ក្នុងចំណោមអ្នកទាំងនោះ បានប្រឡងជាប់និងទទួលបានប័ណ្ណបើកបរម៉ូតូកង់ ៣ ពីស្ថាប័នជំនាញ។
ទោះជាបែបណាចំនួននេះ នៅមានកម្រិតទាបនៅឡើយ បើប្រៀបធៀបទៅនឹងចំនួនអ្នកប្រើប្រាស់ម៉ូតូសណ្ដោងរ៉ឺម៉ក និងត្រីចក្រយានយន្តនៅលើដងផ្លូវសាធារណៈ ដែលក្រសួងបានឲ្យដឹងថា មានរហូតដល់ជាង ៣០ ០០០ គ្រឿង។
អ្នកបើកបរត្រីចក្រយានយន្ត (Tuk Tuk) ម្នាក់ក្នុងចំណោមអ្នកដែលនៅមិនទាន់ទទួលប័ណ្ណបើកបររាប់ម៉ឺននាក់ទៀត លោក ស៊ុន នី អាយុ ៤៥ ឆ្នាំ មានទីលំនៅក្នុងសង្កាត់ព្រែកឯង ខណ្ឌច្បារអំពៅ រាជធានីភ្នំពេញ បាន ប្រាប់ភ្នំពេញប៉ុស្តិ៍ថា លោកបានទៅចុះឈ្មោះចូលរៀនច្បាប់ចរាចរណ៍ម្ដងរួចមកហើយកាលពីខែមុន ប៉ុន្តែលោកមិនបានចុះឈ្មោះចូលរួមការប្រឡងយកប័ណ្ណបើកបរនោះទេដោយសារតែលោកមិនចេះអក្សរ។
លោក ស៊ុន នី បាននិយាយថា៖ «ខ្ញុំពិតជាចង់ចូលរួមប្រឡងយកប័ណ្ណបើកបរត្រីចក្រយានយន្ត ឬ Tuk Tuk ណាស់ ព្រោះខ្ញុំជាអ្នករកស៊ីលើវិស័យដឹកជញ្ជូននេះ។ ប៉ុន្តែខ្ញុំមិនចេះអក្សរ ដែលមិនអាចចូលរួមប្រឡងលើវិញ្ញាសាទ្រឹស្តីបាន។ ខ្ញុំចង់ឲ្យមានការសម្របសម្រួលសម្រាប់អ្នកមិនចេះអក្សរ បានចូលរួមប្រឡងយកប័ណ្ណបើកបរ ដូចអ្នកដទៃទៀតបាន»។
បើតាម លោក ឈួន វ៉ន់ កម្មវិធីមេរៀនសម្រាប់ការបណ្ដុះបណ្ដាល និងសម្រាប់ការប្រឡងលើវិញ្ញាសាទ្រឹស្ដីថ្មីនេះ មានបញ្ចូលសំឡេងសម្រាប់ជាជំនួយដល់អ្នកដែលមិនចេះអក្សរ អាចឆ្លើយបាន ដោយគ្រាន់តែពិនិត្យទៅលើស្លាកសញ្ញា ឬគំនូសសញ្ញាចរាចរណ៍ឲ្យបានច្បាស់ ដើម្បីគូសទៅក្នុងប្រអប់ចម្លើយឲ្យបានត្រឹមត្រូវជាការស្រេច។
ដោយផ្អែកតាមកម្មវិធីថ្មីនេះ លោក ឃួង ស្រេង អភិបាលរាជធានីភ្នំពេញ កាលពីថ្ងៃទី ១៦ ខែ ឧសភា បានចេញសេចក្ដីជូនដំណឹងមួយ ស្ដីពីការបន្តបើកវគ្គបណ្ដុះបណ្ដាលច្បាប់ចរាចរណ៍ ផ្លូវគោក ចំនួន ៣ ខែបន្ថែមទៀតដល់អ្នកបើកបរម៉ូតូសណ្ដោងរ៉ឺម៉ក ត្រីចក្រយានយន្ត និងទោចក្រយានយន្ត ដែលមានទំហំស៊ីឡាំងលើសពី ១២៥ CC ឡើងទៅឬម៉ូតូដែលប្រើថាមពលអគ្គិសនីលើសពី ១១KW ដើម្បីឲ្យពួកគេបានចូលរួមរៀនប្រឡងយកប័ណ្ណបើកបរឲ្យបានគ្រប់គ្នា។
យោងតាមលិខិតជូនដំណឹងនោះ មន្ទីរសាធារណការ និងដឹកជញ្ជូនរាជធានីភ្នំពេញបានបើកវគ្គ បណ្ដុះ បណ្ដាលចំនួន ៩ វគ្គរួចមកហើយ និងមានសិក្ខាកាមចូលរួមសរុប ៦ ៤៣៥ នាក់ស្មើនឹង ៣០ ភាគរយ នៃចំនួនអ្នកបើកបរត្រីចក្រយានយន្ត ក្នុងរាជធានីភ្នំពេញ៕
