.jpg)
គល់ឈើក្នុងតំបន់ព្រៃឡង់ ក្នុងខេត្តកំពង់ធំ។ សហគមន៍ព្រៃឡង់
សហគមន៍ព្រៃឡង់: ក្រុមបណ្ដាញសហគមន៍ព្រៃឡង់នៅក្នុងខេត្តចំនួន ៤ បានរួមគ្នាបង្ហាញរបាយការណ៍កាប់បំផ្លាញព្រៃឈើកាលពីដើមខែមករាបានឲ្យដឹងថា គល់ឈើដែលគេកាត់រួចចំនួន ៤១ ភាគរយនៃដែនជម្រកសត្វព្រៃ ព្រៃឡង់ទាំងមូលត្រូវបានគេរកឃើញក្នុងរយៈពេល ២ ឆ្នាំចុងក្រោយ។
ប៉ុន្តែអ្នកនាំពាក្យនៃក្រសួងបរិស្ថានបានចាត់ទុករបាយការណ៍នេះជាការបំពុលព័ត៌មានក្រោមការរៀបចំរបស់អង្គការអន្តរជាតិមួយចំនួន។
យោងតាមសេចក្ដីថ្លែងការណ៍អំពីរបាយការណ៍ឃ្លាំមើលពីបច្ចុប្បន្នភាពព្រៃឡង់លើកទី ៧ ដែលបណ្ដាញសហគមន៍ព្រៃឡង់បានប្រមូលទិន្នន័យពីសកម្មភាពកាប់ឈើខុសច្បាប់និងធនធានធម្មជាតិដែលមាននៅក្នុងព្រៃឡង់ដោយប្រើប្រាស់កម្មវិធីទូរស័ព្ទដៃវៃឆ្លាតដែលហៅថា ព្រៃឡង់អេបចាប់ពីថ្ងៃទី ១ ខែកញ្ញា ឆ្នាំ ២០១៧ ដល់ថ្ងៃទី ៣១ ខែឧសភា ឆ្នាំ ២០១៨ បានឲ្យដឹងថា ការកាប់ឈើខុសច្បាប់មានចំនួន ៩៩ ភាគរយនៃសកម្មភាពទាំងអស់ ក្នុងនោះគេឃើញគល់ឈើដែលកាត់រួចចំនួន ៤១ ភាគរយ និងគំនរឈើត្រូវបានជនល្មើសប្រមូលយកចេញ និងការដឹកជញ្ជូនមានចំនួន ២៤ ភាគរយនៃទិន្នន័យសរុប ខណៈតំបន់ដែលបានកាប់ឆ្ការមានចំនួន ១១ ភាគរយនៃទិន្នន័យសរុប។
របាយការណ៍របស់សមកម្មជនបណ្តាញសហគមន៍ព្រៃឡង់បានប្រមូលចេញពីខេត្តចំនួន ៤ គឺខេត្តក្រចេះ កំពង់ធំ ព្រះវិហារ និងខេត្តស្ទឹងត្រែង។
របាយការណ៍ដដែលនេះឲ្យដឹងថា សកម្មភាពកាប់ឈើខុសច្បាប់នៅតែបន្តកើតមាន និងមានការកើនឡើងនៅប៉ុន្មានឆ្នាំចុងក្រោយនេះ ការតម្រូវឱ្យសហគមន៍សុំច្បាប់អនុញ្ញាតមុននឹងចុះល្បាត ខណៈអ្នកកាប់ឈើខុសច្បាប់អាចចូលព្រៃកាប់ឈើដោយមិនចាំបាច់មានការអនុញ្ញាត និងផ្លូវជាច្រើនដែលជាកត្តាជំរុញដ៏ធំមួយដែលធ្វើឱ្យបាត់បង់ជម្រកសត្វនិងធ្វើឱ្យបាត់បង់ព្រៃឈើ។
សេចក្ដីថ្លែងការណ៍បានឲ្យដឹងថា៖ «ការកាប់ឈើខុសច្បាប់កំពុងកើតឡើងក្នុងអត្រាគួរឲ្យព្រួយបារម្ភនៅដែនជម្រកសត្វព្រៃ ព្រៃឡង់ និងទេសភាពជុំវិញ»។
លោក ហឿន សុភាព សមាជិកគណៈកម្មការសម្របសម្រួលបណ្តាញសហគមន៍ព្រៃឡង់ប្រចាំខេត្តកំពង់ធំបានថ្លែងថា របាយការណ៍នេះ ត្រូវបានក្រុមបណ្ដាញសកម្មជនព្រៃឡង់ទាំង ៤ ខេត្តរាយការណ៍មកពីខេត្តនីមួយៗ តាមរយៈការចុះល្បាតផ្ទាល់ ហើយពួកគាត់បានកត់ត្រាទុកសម្រាប់បូកសរុបរាល់ ២ ឆ្នាំម្ដងឬ ១ ឆ្នាំម្ដង។
លោកអះអាងថា នៅប៉ុន្មានខែចុងក្រោយនេះបណ្ដាញសហគមន៍ព្រៃឡង់ និងសាកលវិទ្យាល័យ ខូបផែនហាហ្គែនបានសហការគ្នាបង្កើតអែប (App) ដើម្បីប្រមូលទិន្នន័យពាក់ព័ន្ធនឹងបទល្មើសព្រៃឈើ ការបរបាញ់សត្វព្រៃ និងការកាប់ឆ្ការទន្ទ្រានដីព្រៃ។
លោក ឯក សុវណ្ណា សមាជិកគណៈកម្មការសម្របសម្រួលបណ្តាញសហគមន៍ព្រៃឡង់ខេត្តក្រចេះបានថ្លែងថា ក្រៅពីដើមឈើប្រណីតផ្សេងទៀតដែលត្រូវបានគេកាប់បំផ្លាញ ក្នុងនោះដើមច្បោះជ័រ ក៏មានសារៈសំខាន់ខ្លាំងណាស់សម្រាប់ជីវភាពរស់នៅរបស់សមាជិកសហគមន៍នៅក្នុងតំបន់ខេត្តក្រចេះ។
លោកស្រី ថី សមាជិកគណៈកម្មការសម្របសម្រួលបណ្តាញសហគមន៍ព្រៃឡង់ខេត្តព្រះវិហារថ្លែងដោយបានបង្ហាញការព្រួយបារម្ភយ៉ាងខ្លាំងពីភាពខ្សោយនៃការអនុវត្តច្បាប់នៅតំបន់ព្រៃឡង់។
លោកថ្លែងថា៖ «យើងឃើញស្ទើរតែរៀងរាល់ថ្ងៃដែលអ្នកកាប់ឈើខុសច្បាប់បានកាប់ដើមឈើ នៅក្នុងដែនជម្រកសត្វព្រៃព្រៃឡង់ ប៉ុន្តែពួកគេមិនដែលត្រូវបានដាក់ទណ្ឌកម្មដោយអាជ្ញាធរទេ។ យើងចង់ឱ្យរដ្ឋាភិបាលពង្រឹងការអនុវត្តច្បាប់ និងធានាថាអ្នកកាប់ឈើខុសច្បាប់នាពេលអនាគត ត្រូវបានគេដាក់ទោសទណ្ឌចំពោះសកម្មភាពកាប់បំផ្លាញព្រៃឈើទាំងនោះ»។
លោក ខេង ខូ សមាជិកបណ្តាញសហគមន៍ព្រៃឡង់ខេត្តស្ទឹងត្រែងក៏បានបង្ហាញផងដែរពីកង្វល់ ចំពោះស្ថានភាពការកាប់ឈើនៅតែបន្តកើតមានព្រោះតែមានផ្លូវខ្វាត់ខ្វែងជាច្រើនបានសម្រួលដល់ការកាប់និងដឹកជញ្ជូនឈើចេញពីព្រៃឡង់ និងមន្ត្រីបើកដៃឱ្យអ្នកកាប់ឈើ និងជាអ្នកនៅពីក្រោយខ្នងការកាប់និងដឹកឈើទាំងនោះ និងឃុបឃិតគ្នាលក់ដីព្រៃផងដែរ។
លោក នេត្រ ភក្ត្រា អ្នកនាំពាក្យក្រសួងបរិស្ថានបានថ្លែងឲ្យដឹងកាលពីថ្ងៃម្សិលមិញថា ក្រុមបណ្តាញសហគមន៍ព្រៃឡង់បាននិងកំពុងបំពុលព័ត៌មានក្រោមការរៀបចំរបស់អង្គការអន្តរជាតិខ្លះ ដើម្បីគ្រាន់តែស្វះស្វែងរកមូលនិធិបន្តគម្រោងរបស់ខ្លួន និងរកការងារឱ្យខ្លួនឯងសម្រាប់ឆ្នាំ ២០១៩ នេះតែប៉ុណ្ណោះ។ ពួកគេបានយកទិន្នន័យចាស់មកធ្វើជាបច្ចុប្បន្នភាពនិងយកតែចំណុចអវិជ្ជមានមកធ្វើជារបាយការណ៍វាយតម្លៃទូទៅលើស្ថានភាពព្រៃឡង់ទាំងមូល ក្នុងចេតនាទុច្ចរិតមួយដើម្បីបំផ្លាញទំនុកចិត្តរបស់ប្រជាពលរដ្ឋមកលើរាជរដ្ឋាភិបាលក៏ដូចជាក្រសួងបរិស្ថានជុំវិញការការពារ និងអភិរក្សធនធានធម្មជាតិនៅកម្ពុជា។ អង្គការអន្តរជាតិមួយចំនួនបានខ្ចីដៃបណ្តាញសហគមន៍ព្រៃឡង់ដើម្បីបម្រើផលប្រយោជន៍របស់ខ្លួនគឺការបន្តទទួលបាននូវការគាំទ្រផ្នែកថវិកាសម្រាប់អង្គការរបស់ខ្លួន។ នេះគឺជាការជួយដោយមិនស្មោះត្រង់ និងបង្កប់ដោយភាពពិសពុលផ្នែកនយោបាយ។
លោកបន្តថា រាជរដ្ឋាភិបាលកម្ពុជា ក៏ដូចជាក្រសួងបរិស្ថានបានចាត់វិធានការយ៉ាងតឹងរ៊ឹងបំផុតប្រឆាំងនឹងបទល្មើសព្រៃឈើ និងសត្វព្រៃ ហើយធនធានធម្មជាតិរបស់កម្ពុជាត្រូវបានការពារនៅឆ្នាំ ២០១៨ បទល្មើសព្រៃឈើមានការធ្លាក់ចុះប្រមាណ ៣០ ភាគរយបើប្រៀបធៀបនឹងឆ្នាំ ២០១៧។
លោក ភក្ត្រា ថ្លែងថា៖ «សមត្ថកិច្ចរបស់ក្រសួងបរិស្ថាននៅតំបន់ដែនជម្រកសត្វព្រៃព្រៃឡង់ទាំង ៤ ខេត្ត រួមមានព្រះវិហារ ស្ទឹងត្រែង ក្រចេះ កំពង់ធំ បានផ្តល់កិច្ចសហការជាមួយបណ្តាញព្រៃឡង់ ដើម្បីដើរល្បាតរួមគ្នាព្រមទាំងជួយសម្រួលដល់ការលំបាក និងការពារសុវត្ថិភាពជូនដល់ពួកគាត់ទៀតផង នៅអំឡុងពេលល្បាតព្រោះពេលខ្លះ ជនល្មើសមានប្រើប្រាស់អាវុធ»។
លោកបន្ថែមថា បណ្តាញសហគមន៍ព្រៃឡង់ឃើញផ្លូវជាច្រើននៅក្នុងតំបន់នោះ គ្រាន់តែជាទស្សនៈចង្អៀតចង្អល់ប្រឆាំងនឹងការអភិវឌ្ឍប៉ុណ្ណោះ។ រាជរដ្ឋាភិបាល និងក្រសួងបរិស្ថានពិតជាបានយល់ច្បាស់រវាងការអភិរក្ស និងការអភិវឌ្ឍ ហើយក្រសួងបាននិងកំពុងបន្តអនុវត្តផែនការអភិរក្សធនធានធម្មជាតិដែលកម្ពុជាមានឱ្យបានគង់វង្សដោយមានការចូលរួមពីគ្រប់ភាគីទាំងអស់។
តាមអនុក្រឹត្យចុះថ្ងៃទី៩ ខែឧសភា ឆ្នាំ ២០១៦ រដ្ឋាភិបាលបានសម្រេចបង្កើតដែនជម្រកសត្វព្រៃ “ព្រៃឡង់” ចំនួន ៤៣១- ៦៨៣ ហិកតា ដើម្បីធានាឲ្យមានការថែទាំទីជម្រកសត្វព្រៃ និងប្រព័ន្ធអេកូឡូស៊ី៕
