ភ្នំពេញៈ ក្រសួងផែនការបានចាត់មន្ត្រីជំនាញ និងមន្ត្រីតាមមន្ទីរខេត្ត/ក្រុងឲ្យធ្វើអត្តសញ្ញាណកម្មទិន្នន័យគ្រួសារក្រីក្រដែលងាយរងការប៉ះពាល់នៅតាមជនបទឲ្យបានចប់សព្វគ្រប់មុនដំណាច់ខែឧសភា និងតាមតំបន់ទីប្រជុំជនឲ្យបានមុនដំណាច់ខែមិថុនា ឆ្នាំ ២០២០ ដើម្បីរដ្ឋាភិបាលជួយសម្រួលជីវភាព និងកាត់បន្ថយផលប៉ះពាល់ក្នុងអំឡុងពេលរីករាលដាលជំងឺកូវីដ ១៩ នេះ។
លោក ឆាយ ថន រដ្ឋមន្ត្រីក្រសួងផែនការថ្លែងក្នុងកិច្ចប្រជុំបន្ទាន់មួយតាមរយៈវីដេអូ Conference ជាមួយថ្នាក់ដឹកនាំ មន្ត្រីជំនាញទាំង ២៥ ខេត្ត/ក្រុងកាលពីថ្ងៃទី ២៧ មេសា ថារាជរដ្ឋាភិបាលកម្ពុជាកំពុងពិនិត្យផ្តល់អន្តរាគមន៍បន្ទាន់ដល់ប្រជាជនកម្ពុជាទាំងអស់ដែលរងផលប៉ះពាល់នៃជំងឺកូវីដ ១៩។ រដ្ឋាភិបាលប្រើប្រាស់ទិន្នន័យគ្រួសារក្រីក្ររបស់ក្រសួងផែនការ ជាពិសេសគ្រួសារក្រីក្រ និង គ្រួសារទទួលរងប៉ះពាល់ខ្លាំងជាងគេ។
លោកដាក់វិធានការបន្ទាន់មួយចំនួនដល់គ្រប់មន្ទីរផែនការ អង្គភាពជំនាញទាំងអស់ត្រូវរៀបចំធ្វើបច្ចុប្បន្នភាពទិន្នន័យគ្រួសារក្រីក្រតាមតំបន់ជនបទឲ្យបានចប់សព្វគ្រប់មុនដំណាច់ខែឧសភា និងតំបន់ទីប្រជុំជនឲ្យបានមុនដំណាច់ខែមិថុនា ឆ្នាំ ២០២០។ ក្រសួងប្រើយន្តការកំណត់អត្តសញ្ញាណកម្មគ្រួសារក្រីក្រតាមការស្នើសុំ និងត្រូវមានការពិគ្រោះយោបល់ជាមួយភូមិ និងឃុំ ករណីមានការដកចេញចំនួនគ្រួសារណាដែលមានជីវភាពលេចធ្លោ។
លោកបន្ថែមថា ការធ្វើអត្តសញ្ញាណកម្មទិន្នន័យគ្រួសារក្រីក្រនេះ ដើម្បីជួយសម្រួលជីវភាពប្រជាជន និងកាត់បន្ថយផលប៉ះពាល់ដោយសារការរីករាលដាលជំងឺកូវីដ១៩។ រាជរដ្ឋាភិបាលបានសម្រេចជួយឧបត្ថម្ភជាសាច់ប្រាក់សុទ្ធជូនគ្រួសារក្រីក្រដែលមានបណ្ណសមធម៌រួចហើយ និងគ្រួសារក្រីក្រខ្លះដែលបានអវត្តមានតាមជុំនៃការប្រមូលទិន្នន័យ។ រីឯគ្រួសារខ្លះទៀតទើបទទួលរងផលប៉ះពាល់បាត់បង់ចំណូលធ្លាក់ខ្លួនក្រីក្រដោយសារជំងឺកូវីដ ១៩។
លោក ឆាយ ថន បានបញ្ជាក់ថា៖ «នាយកដ្ឋានអត្តសញ្ញាណកម្មគ្រួសារក្រីក្រនៃអគ្គនាយកដ្ឋានផែនការនឹងរៀបចំវគ្គបណ្តុះបណ្តាលនីតិវិធីកំណត់អត្តសញ្ញាណកម្មគ្រួសារក្រីក្រតាមការស្នើសុំក្នុងអំឡុងពេលការរីករាលដាលជំងឺកូវីដ ១៩ ជូនដល់គ្រប់បណ្តាមន្ទីរផែនការខេត្ត/ក្រុងទាំងអស់ក្នុងពេលឆាប់ៗនេះតាមការសម្រេចរបស់ក្រសួងសេដ្ឋកិច្ច និងហិរញ្ញវត្ថុ»។
នាយករងខុទ្ទកាល័យផែនការនៃក្រសួងផែនការលោក ណុប កនណាវុឌ្ឍ ថ្លែងពីម្សិលមិញថា នីតិវិធីធ្វើអត្តសញ្ញាណកម្មគ្រួសារក្រីក្រនេះធ្វើឡើងក្នុងអំឡុងពេលនៃការរីករាលដាលជំងឺកូវីដ ១៩។ នីតិវិធីក្នុងការធ្វើគឺតម្រូវឲ្យប្រជាពលរដ្ឋរងគ្រោះផ្ទាល់ដាក់ពាក្យស្នើសុំទៅអាជ្ញាធរភូមិ ឃុំតាមមូលដ្ឋាន ប្រសិនបើពួកគាត់ពិតជាពលរដ្ឋដែលកំពុងរងគ្រោះ បាត់បង់ចំណូល និងធ្លាក់ចុះនៃជីវភាពគ្រួសារក្នុងអំឡុងពេលជំងឺកូវីដ ១៩។
បន្ទាប់ពីអាជ្ញាធរបានឯកភាព និងពិនិត្យឃើញថា ពួកគាត់ពិតជាអ្នកងាយរងគ្រោះពិតប្រាកដមែន មន្ត្រីជំនាញនៃមន្ទីរផែនការនឹងចេញបណ្ណសមធម៌ជូនពួកគាត់ ហើយពួកគាត់អាចទទួលជំនួយជាសាច់ប្រាក់ពីរដ្ឋាភិបាលសម្រាប់ផ្គត់ផ្គង់ជីវភាពគ្រួសារ។
លោកបន្ថែមថា៖ «នៅគ្រប់មន្ទីរតាមរាជធានីខេត្តទាំងអស់ចាប់ផ្ដើមធ្វើទិន្នន័យគ្រួសារក្រីក្រតាមការកំណត់របស់ក្រសួងផែនការជាកំហិតដោយចាប់ផ្ដើមការងាររបស់ខ្លួនចាប់ពីខែឧសភាតទៅរហូតដល់ថ្ងៃកំណត់ ដើម្បីយើងដឹងពីចំនួនគ្រួសារងាយរងគ្រោះ និងកំណត់ទំហំទឹកប្រាក់ដែលត្រូវផ្ដល់ជូនពួកគាត់។ កន្លងមកនេះយើងបានចែកប័ណ្ណចំនួន ៤ ម៉ឺនប័ណ្ណ ជូនពលរដ្ឋក្រីក្រដើម្បីប្រើប្រាស់ សេវាសាធារណៈមួយចំនួន»។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមកម្ពុជា (ANSA) គាំទ្រការធ្វើអត្តសញ្ញាណកម្មគ្រួសារក្រីក្រដែលងាយរងគ្រោះនេះ។ ប៉ុន្ដែលោកចង់ឲ្យអាជ្ញាធរមូលដ្ឋាន និងមន្ត្រីថ្នាក់ជាតិបង្ហាញចំនួន ឬទិន្នន័យគ្រួសារក្រីក្រឲ្យបានទូលំទូលាយ តម្លាភាព ដើម្បីឲ្យរដ្ឋាភិបាលរិះរកមធ្យោបាយជួយដោះស្រាយជីវភាពពួកគាត់ក្នុងអំឡុងពេលរីករាលដាលនៃជំងឺកូវីដ ១៩ នេះ។
លោកថា កន្លងមកមានការសង្ស័យថា អាជ្ញាធរលាក់បាំងព័ត៌មានទាក់ទងនឹងអត្តសញ្ញាណគ្រួសារក្រីក្រក្នុងមូលដ្ឋានខ្លួន។ ព្រោះពួកគាត់ខ្លាចមានការស្ដីបន្ទោសពីមន្ត្រីថ្នាក់ជាតិ ឬរដ្ឋាភិបាលដែលថាពួកគាត់មិនសូវយកចិត្តទុកដាក់លើកស្ទួយជីវភាពពលរដ្ឋក្នុងមូលដ្ឋានខ្លួន។
លោក សន ជ័យ ថ្លែងថា៖ «ភាពក្រីក្រមួយចំនួនមិនមែនមកពីមនុស្សទេ តែវាអាចមកពីកាលៈទេសៈ ឬកិច្ចការសាធារណៈមិនអាចជួយពួកគាត់បាន។ អ៊ីចឹងយើងគួរតែរកមធ្យោបាយជួយអ្នកដែលងាយរងគ្រោះជាងគេហ្នឹង។ ដូចខ្ញុំបានលើកឡើងខាងដើមអ៊ីចឹងគឺបើមានការលាក់បាំង ព័ត៌មានពីគ្រួសារក្រីក្រគឺជាកំហុសមួយធំ ដែលមិនអាចជួយពលរដ្ឋក្រីក្របានគ្រប់ជ្រុងជ្រោយ»៕