.jpg)
សកម្មភាពសាងសង់អគារ ១ កន្លែងនៅក្នុងខណ្ឌចំការមន រាជធានីភ្នំពេញនាពេលបច្ចុប្បន្ន។ ហុង មិនា
ភ្នំពេញៈ មួយថ្ងៃបន្ទាប់ពីបានចាត់តាំងមន្ដ្រីឲ្យត្រួតពិនិត្យសំណង់នៅទូទាំងប្រទេសក្រសួងរៀបចំដែនដី នគរូបនីយកម្ម និងសំណង់បានចេញសេចក្តីណែនាំថ្មី ១ ទៀតដល់អាជ្ញាធរមានសមត្ថកិច្ចក្នុងវិស័យសំណង់ រាជធានី-ខេត្ដ ទាំងអស់ត្រូវពង្រឹងការអនុវត្ដច្បាប់ស្ដីពីសំណង់ និងលិខិតបទដ្ឋានគតិយុត្ដនានាដែលចូលជាធរមានឱ្យមានប្រសិទ្ធភាពខ្ពស់ ។
តាមសេចក្តីណែនាំថ្មីដែលចេញកាលពីថ្ងៃសុក្រសប្ដាហ៍មុន ក្រសួងបានតម្រូវឲ្យអាជ្ញាធរមានសមត្ថកិច្ចក្នុងវិស័យសំណង់ត្រួតពិនិត្យ និងហាមអនុវត្ដការងារមួយចំនួនក្នុងវិស័យសំណង់ រួមមាន ហាមដាច់ខាត ការសាងសង់សំណង់ដែលគ្មានលិខិតអនុញ្ញាតសាងសង់ ជួសជុល ឬរុះរើ និងលិខិតអនុញ្ញាតបើកការដ្ឋានសំណង់។
ការអនុវត្តការងារសាងសង់ ឬរុះរើដោយអ្នកសាងសង់គ្មានអាជ្ញាប័ណ្ណ ឬវិញ្ញាបនបត្របញ្ជាក់ការអនុញ្ញាតឱ្យប្រកបអាជីវកម្មផ្ដល់ដោយក្រសួងរៀបចំដែនដីនគរូបនីយកម្ម និងសំណង់។ ការដ្ឋានសំណង់ដែលដំណើរការសាងសង់ ឬរុះរើដោយគ្មានវិស្វករប្រចាំការដ្ឋានជាអ្នកទទួលខុសត្រូវ។
ក្រសួងបានហាមដាច់ខាតចំពោះ «ការស្នាក់នៅក្នុងអគារដែលកំពុងសាងសង់ ទោះបីជាលក្ខណៈបណ្តោះអាសន្នក៏ដោយ និងហាមដាច់ខាតអ្នកគ្មានភារកិច្ចចូលក្នុងការដ្ឋានសំណង់។
ហាមការប្រើប្រាស់សំណង់គ្រប់ប្រភេទដោយគ្មានវិញ្ញាបនបត្រប្រើប្រាស់សំណង់ ឬលិខិតបិទការដ្ឋានផ្តល់ដោយអាជ្ញាធរមានសមត្ថកិច្ច»។
ក្រសួងបញ្ជាក់ថា ក្នុងករណីពិនិត្យឃើញអំពើល្មើសនឹងបម្រាមខាងលើ អាជ្ញាធរមានសមត្ថកិច្ចត្រូវចេញលិខិតផ្អាកការសាងសង់ជាបន្ទាន់ ហើយបើនៅតែបន្តត្រូវកសាងសំណុំរឿងបញ្ជូនទៅតុលាការតាមនីតិវិធីជាធរមាន។
ទាក់ទងនឹងការធានាសន្ដិសុខ និងសុវត្ថិភាពនៃការដ្ឋានសំណង់ ក្រសួងនេះបានឲ្យសមត្ថកិច្ចយកចិត្ដទុកដាក់អនុវត្ដគោលការណ៍ និងវិធានការមួយចំនួនទៀតក្នុងនោះមានពិនិត្យលិខិតអនុញ្ញាតសាងសង់ ជួសជុល និងរុះរើ, លិខិតអនុញ្ញាតបើកការដ្ឋានសំណង់,ការរៀបចំការដ្ឋាន, ដំណើរការដ្ឋានសាងសង់ និងការងារត្រួតពិនិត្យ និងបញ្ជាក់សំណង់ផងដែរ។
ជុំវិញបញ្ហាសំណង់នេះដែរកាលពីថ្ងៃ ៩ ខែមករា ពោលគឺ ១ ថ្ងៃ មុនពេលចេញសេចក្ដីជូនដំណឹងថ្មីនេះ ក្រសួងរៀបចំដែនដីបានចេញសេចក្ដីសម្រេចចាត់តាំងមន្ដ្រីត្រួតពិនិត្យសំណង់តាមបណ្ដារាជធានី-ខេត្ដទាំងអស់ផងដែរ ដោយក្រសួងបានចាត់ទុកការសម្រេចនេះថា ជាការចាំបាច់បន្ទាប់ពីមានករណីបាក់រំលំអគារជាបន្តបន្ទាប់ ។
នៅក្នុងសេចក្ដីសម្រេចនោះបានចាត់តាំងលោក ទេព ធន រដ្ឋលេខាធិការក្រសួងរៀបចំដែនដី នគរូបនីយកម្ម និងសំណង់ជាប្រធាន លោក ឡៅ ទិព្វសីហា រដ្ឋលេខាធិការ និងលោក លាង មុនីរិទ្ធ រដ្ឋលេខាធិការ ជាអនុប្រធានត្រួតពិនិត្យសំណង់ដោយទទួលបន្ទុកការងាររួម។
លោក សេង ឡូត អ្នកនាំពាក្យក្រសួងរៀបចំដែនដី នគរូបនីយកម្ម និងសំណង់មិនអាចសុំការបកស្រាយបន្ថែមជុំវិញការជូនដំណឹង និងការចាត់តាំងមន្ដ្រីត្រួតពិនិត្យសំណង់នេះបន្ថែមបានទេកាលពីម្សិលមិញ ដោយទូរស័ព្ទចូល ប៉ុន្ដែលោកមិនបានឆ្លើយតប។
លោក សុខ គីន ប្រធានសហព័ន្ធសហជីពសំណង់ និងព្រៃឈើកម្ពុជាបានគាំទ្រចំពោះចំណាត់ការបន្ថែមរបស់រាជរដ្ឋាភិបាល និងក្រសួងពាក់ព័ន្ធក្នុងវិស័យសំណង់លើការពង្រឹងការអនុវត្ដច្បាប់ស្ដីពីសំណង់ និងការពង្រឹងការត្រួតពិនិត្យគុណភាពសំណង់តាមរាជធានី-ខេត្ដនេះ។ ប៉ុន្តែលោកស្នើឱ្យមានការអនុវត្ដលើសេចក្ដីជូនដំណឹងនេះឱ្យបានហ្មត់ចត់។
លោកថ្លែងថា៖ «ខ្ញុំសង្កេតឃើញថា សមត្ថកិច្ចបានចាប់ផ្ដើមផ្អាកអគារដែលគ្មានគុណភាពមួយចំនួននៅតាមខេត្ដដូចជាអគាររោងចក្រនៅខេត្ដកំពង់ស្ពឺ និងសណ្ឋាគារកម្ពស់ ១១ ជាន់នៅខេត្ដបន្ទាយមានជ័យក្នុងពេលថ្មីៗជាដើម។ សកម្មភាពរបស់អាជ្ញាធរមានសមត្ថកិច្ចពេលនេះមានការផ្លាស់ប្ដូរ និងកំពុងបំពេញចន្លោះកន្លែងដែលខ្វះខាតក្នុងវិស័យសំណង់នេះកាលពីពេលកន្លងមក»។
ទោះជាយ៉ាងណាលោក សុខ គីន បានអះអាងថាលោកនៅមិនទាន់មានជំនឿ ១០០ ភាគរយលើចំណាត់ការ និងសេចក្ដីជូនដំណឹងនេះទេ ព្រោះកន្លងមកក៏ធ្លាប់មានការជូនដំណឹងបែបនេះដែរ ប៉ុន្ដែនៅខ្វះចន្លោះចំពោះការអនុវត្ដរបស់មន្ដ្រី ៕
