.jpg)
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងថា ទោះបីជាជំងឺគ្រុនចាញ់ថយចុះខ្លាំងក៏ដោយ ក៏កម្ពុជាមិនត្រូវស្កប់ស្កល់នឹងជោគជ័យនេះដែរ។ សហការី
ភ្នំពេញៈ ក្រសួងសុខាភិបាលបានជំរុញការងារលុបបំបាត់ជំងឺគ្រុនចាញ់ប្រភេទហ្វាល់ស៊ីប៉ារ៉ូម (គ្រុនសន្ធំ) សម្រាប់ជំហានចុងក្រោយនៃគោលដៅឆ្នាំ ២០២០ នេះ ដើម្បីឈានទៅលុបបំបាត់ជំងឺគ្រុនចាញ់ទាំងស្រុងតាមផែនការយុទ្ធសាស្ត្រនៅឆ្នាំ ២០២៥ បើទោះជាជំងឺគ្រុនចាញ់មានការចុះថយយ៉ាងគំហុកក៏ដោយ។
ការប្រកាសជំរុញបែបនេះបានធ្វើឡើងនៅក្នុងអង្គប្រជុំមួយកាលថ្ងៃទី ៦ ខែតុលា ដែលរៀបចំដោយមជ្ឈមណ្ឌលជាតិប្រយុទ្ធនឹងជំងឺគ្រុនចាញ់ ប៉ារ៉ាស៊ីតសាស្ត្រ និងបាណកសាស្ត្រ (ម.គ.ច) ដោយមានការចូលរួមពីមន្ត្រីបច្ចេកទេស និងថ្នាក់ដឹកនាំ ម.គ.ច រួមទាំងលោកប្រធានមន្ទីរសុខាភិបាលខេត្តកំពង់ស្ពឺ កំពង់ឆ្នាំង និងពោធិ៍សាត់ និងមន្ត្រីជំនាញ អង្គការសុខភាពពិភពលោក (WHO) ជិត ២០ នាក់ ។
លោក ហ៊ុយ រ៉េកុល ប្រធាន ម.គ.ច បានថ្លែងថា អង្គប្រជុំបានពិនិត្យ និងពិភាក្សាលើលទ្ធភាព និងសកម្មភាពសំខាន់ៗសំដៅកំណត់យុទ្ធសាស្ត្របន្ថែមលើកិច្ចការលុបបំបាត់ជំងឺគ្រុនចាញ់ក្នុងខេត្តដែលនៅមានអត្រាឈឺនៅឡើយ។
លោកបន្តថា ក្រោយការពិនិត្យ និងពិភាក្សាគ្នាយ៉ាងផុលផុសពីគ្រប់ភាគី កិច្ចប្រជុំនេះបានកំណត់នូវចំណុចសំខាន់ៗសម្រាប់ដាក់ជូនរដ្ឋមន្ត្រីក្រសួងសុខាភិបាលក្នុងនោះរួមមាន ត្រូវកំណត់ចំនួនខេត្តដែលនៅមានជំងឺគ្រុនចាញ់ ផ្តល់ជំនួយបច្ចេកទេសបន្ថែមពីអង្គការសុខភាពពិភពលោកត្រូវធានាឱ្យមានលក្ខណៈបច្ចេកទេសសមស្រប ដើម្បីជំរុញឱ្យមានលទ្ធផលល្អប្រសើរសម្រាប់សម្រេចគោលដៅលុបបំបាត់ជំងឺគ្រុនចាញ់។
តាមរបាយការណ៍ក្រសួងសុខាភិបាលពីខែកក្កដាឱ្យដឹងថា ក្នុងរយៈពេល ៦ ខែដើមឆ្នាំនេះកម្ពុជាមានជំងឺគ្រុនចាញ់សរុប ៤៥៤ ករណី ថយចុះ ៧០ ភាគរយបើធៀបនឹងរយៈពេលដូចគ្នានៅឆ្នាំមុន តែពុំមានអ្នកស្លាប់ដោយសារជំងឺនេះទេ។
លោកស្រី ឱ វណ្ណឌីន អ្នកនាំពាក្យក្រសួងសុខាភិបាលបានថ្លែងថា ទោះបីជាជំងឺគ្រុនចាញ់ថយចុះខ្លាំងក៏ដោយ ក៏កម្ពុជាមិនត្រូវស្កប់ស្កល់នឹងជោគជ័យនេះដែរ។
លោកស្រីថា កម្ពុជាត្រូវតែធ្វើការងារឱ្យបានខ្លាំងក្លាថែមទៀតក្នុងជំហានចុងក្រោយនៃឆ្នាំ ២០២០ នេះសំដៅលុបបំបាត់ជំងឺគ្រុនចាញ់តាមគោលដៅដែលបានកំណត់ក្នុងផែនការយុទ្ធសាស្ត្រជាតិលុបបំបាត់ជំងឺគ្រុនចាញ់ឆ្នាំ ២០១៦-២០២៥។
លោកស្រីបានសង្កត់ធ្ងន់ថា៖ «យើងត្រូវពិនិត្យ ពិភាក្សា និងកំណត់នូវយុទ្ធសាស្ត្រថ្មីដែលមានប្រសិទ្ធភាពបន្ថែមទៀត ដោយត្រូវពិនិត្យឱ្យបានគ្រប់ជ្រុងជ្រោយទាំងបច្ចេកទេស និងការអនុវត្តជាក់ស្តែងដើម្បីចៀសវាងមានបញ្ហា និងការយល់ច្រឡំ»។
ជាមួយគ្នានេះលោកស្រីបានជំរុញឱ្យពិចារណាដោយលក្ខណៈបច្ចេកទេសក្នុងការប្រើវិធីសាស្ត្រលេបថ្នាំការពារ និងព្យាបាលប៉ារ៉ាស៊ីត គ្រុនចាញ់ជាមុន បន្ថែមលើការប្រើមុង និងថ្នាំលាបការពារមូស មុននឹងបុគ្គលធ្វើដំណើរទៅកាន់កន្លែងមានហានិភ័យឆ្លងជំងឺគ្រុនចាញ់។
លោកស្រី លី អាយលែន តំណាងអង្គការសុខភាពពិភពលោកប្រចាំកម្ពុជាបានគាំទ្រដល់កម្មវិធីប្រយុទ្ធនឹងជំងឺគ្រុនចាញ់នេះដោយលោកស្រីបានជំរុញឱ្យបន្តប្រឹងប្រែងបន្ថែមទៀត ពិសេសតាមខេត្តដែលនៅមានករណីគ្រុនចាញ់។
លោកស្រីបានបញ្ជាក់ថា៖ «ជំហានចុងក្រោយនេះដោយត្រូវមានភាពច្បាស់លាស់ទាំងបច្ចេកទេសកម្រិតហានិភ័យ បញ្ហា ដែលនឹងអាចជួបប្រទះនាពេលខាងមុខ និងធនធានថវិកាគឺអាចនឹងកៀរគរជំនួយថវិកាបន្ថែមទៀត ប្រសិនបើអាចកំណត់បានច្បាស់នូវសកម្មភាពចាំបាច់ដែលត្រូវធ្វើក្នុងត្រីមាសទី ៤ នៃឆ្នាំ ២០២០ ដើម្បីសម្រេចបាននូវគោលដៅលុបបំបាត់ជំងឺគ្រុនចាញ់ប្រភេទសន្ធំនាដំណាច់ឆ្នាំ ២០២០ នេះ» ។
បើតាមក្រសួងសុខាភិបាលខេត្តដែលនៅប្រឈមជំងឺគ្រុនចាញ់រួមមាន ខេត្តកំពង់ស្ពឺ មណ្ឌលគិរី រតនគិរី ពោធិ៍សាត់ និងខេត្តស្ទឹងត្រែងដោយភាគច្រើននៅក្នុងភូមិសាស្ត្រដែលជាតំបន់មានព្រៃ និងភ្នំ៕
