ភ្នំពេញៈ ក្រសួងសង្គមកិច្ចអតីតយុទ្ធជន និងយុវនីតិសម្បទាបានដាក់ទិសដៅលុបបំបាត់ភាពរាំងស្ទះដល់អ្នកមានបញ្ហាអូទីស្សឹម និងដោនសាំងដ្រូម ឬហៅថាជនខ្សោយសតិបញ្ញា ដើម្បីឲ្យពួកគេក្លាយទៅជាជនឯករាជ្យអាចសម្រេចចិត្តខ្លួនឯងបាន និងជំរុញឲ្យមានការគាំទ្រពីសហគមន៍ និងគ្រួសារ ពិសេសគ្រូជំនាញ ខណៈការព្យាបាលត្រូវប្រើពេលយូរ។
រាជរដ្ឋាភិបាលកម្ពុជាក៏ដូចជាពិភពលោកទាំងមូលបានកំណត់យកថ្ងៃទី ២ ខែ មេសា រៀងរាល់ឆ្នាំដើម្បីប្រារព្ធទិវាអូទីស្សឹម និងដោនសាំងដ្រូម ឬហៅថា ជនខ្សោយសតិបញ្ញា ដើម្បីលើកទឹកចិត្តពួកគាត់ក្នុងការប្រាស្រ័យទាក់ទងជាមួយមនុស្សទូទៅ ក៏ដូចជាការលើកកម្ពស់ការចូលរួមសកម្មភាពសង្គមផងដែរ។
នៅឆ្នាំនេះ ក្រសួងសង្គមកិច្ចអតីតយុទ្ធជន និងយុវនីតិសម្បទា បានប្រារព្ធទិវានេះ ជាលើកទី៦ ក្រោមប្រធានបទ "លុបបំបាត់ឧបសគ្គរារាំងការចូលរួមក្នុងសង្គមរបស់មនុសអូទីស្សឹមនិងដោនសាំងដ្រូម" នៅមជ្ឈមណ្ឌលគរុកោសល្យភូមិភាគហ៊ុនសែនខេត្តកណ្តាល ដែលមានអ្នកចូលរួមជិត ៩០០ នាក់ ជាអ្នកជួបបញ្ហា គ្រូបង្រៀន និងមន្ត្រីរាជការ និងអង្គការសង្គមស៊ីវិលពាក់ព័ន្ធ។
លោក វង សូត រដ្ឋមន្ត្រីក្រសួងសង្គមកិច្ច អតីតយុទ្ធជននិងយុវនីតិសម្បទា បានថ្លែងថា ដើម្បីដោះស្រាយបញ្ហា អូទីស្សឹម និងដោនសាំងដ្រូម លោកបានខិតខំជំរុញដោះស្រាយឧបសគ្គនានាដូចជាផ្នែកសេដ្ឋកិច្ចសង្គមកិច្ច សិល្បៈ វប្បធម៌នយោបាយ ដោយធ្វើយ៉ាងណាឲ្យពួកគេអាចចៀសផុតពីការរើសអើងនិងរស់នៅប្រកបដោយសេចក្តីថ្លៃថ្នូរ។
លោកបញ្ជាក់ថា៖ «ជាមួយនឹងការយកចិត្តទុកដាក់នេះ នៅក្នុងឆ្នាំនេះ លោកក៏បានណែនាំឲ្យបង្កើនការកសាងធនធានមនុស្ស ជាពិសេសគ្រូបង្រៀនសាស្ត្រាចារ្យឲ្យមានសមត្ថភាពក្នុងការបណ្តុះបណ្តាលជនខ្សោយសតិតាំងពីថ្នាក់បឋមសិក្សារហូតដល់ឧត្តមសិក្សាក្នុងទិសដៅផ្តល់ឱកាសឲ្យពួកគេទទួលបានសិទ្ធិស្មើគ្នាក្នុងវិស័យអប់រំ»។
បញ្ហាអូទីស្សឹម ត្រូវបានរកឃើញតាំងពីយូរណាស់មកហើយនៅឆ្នាំ ១៩៣៨ ដោយលោកវេជ្ជបណ្ឌិត Leo Kanner នៃមន្ទីរពេទ្យ Jonhs Hopkins សហរដ្ឋអាមេរិក ហើយលោកបានណែនាំឱ្យហៅករណីនេះថាជាអូទីស្សឹមដែលវាកើតឡើងលើមនុស្សមានវិបត្តិនៃការលូតលាស់ប្រព័ន្ធខួរក្បាលតាំងពីកំណើត ដោយមានបញ្ហាលំបាកលើញាណដឹង លំបាកក្នុងការទំនាក់ទំនងក្នុងសង្គមតាមរយៈការនិយាយ មានឥរិយាបថរឹងរូស និងបញ្ហាផ្សេងៗជាច្រើនទៀត។
តាមការស្រាវជ្រាវនៅលើពិភពលោកក្នុងចំណោមកុមារ ១ ០០០ នាក់ គឺមានអ្នកកើតអូទីស្សឹមពីម្នាក់ទៅ ២ នាក់ហើយភាគច្រើនតែងកើតលើកុមារាហើយកើតអស់មួយជីវិត។
លោក ឯម ច័ន្ទមករា អគ្គលេខាធិកានៃអគ្គលេខាធិការដ្ឋានក្រុមប្រឹក្សាសកម្មភាពជនពិការ នៃក្រសួងសង្គមកិច្ចបានថ្លែងថា ពិតណាស់ប្រសិនបើអ្នកមានបញ្ហាខ្សោយសតិបញ្ញា ឬអូទីស្សឹម ពេលនោះសង្គមនឹងប្រែជាក្រៀមក្រំភ្លាម!ការយល់ដឹងពីបញ្ហាអូទីស្សឹមបានកើនឡើងទូទាំងពិភពលោកប៉ុន្មានឆ្នាំថ្មីៗនេះ រួមទាំងកម្ពុជាផង។
លោកបញ្ជាក់ថា៖ «ការចូលរួមរបស់ជនខ្សោយសតិបញ្ញា និងអូទីស្សឹម ពិតជាមានសារៈសំខាន់ណាស់ ដើម្បីឈានទៅសម្រេចបាននូវគោលដៅអភិវឌ្ឍន៍ប្រកបដោយនិរន្តរភាព (SDGs) ដែលរាជរដ្ឋាភិបាលកម្ពុជាមានឆន្ទៈមុតមាំក្នុងការសម្រេចឲ្យខាងតែបាននូវគោលដៅអភិវឌ្ឍន៍មួយនេះ»។
បើតាមអគ្គលេខាធិការដ្ឋានក្រុមប្រឹក្សាសកម្មភាពជនពិការ ក្នុងឆ្នាំសិក្សា ២០១៧-២០១៨ កុមារ និងយុវជនមានពិការភាពនៅកម្ពុជាប្រមាណជិត ៥ ម៉ឺន ៥ ពាន់នាក់ក្នុងនោះស្រីមានប្រមាណជាង ២ ម៉ឺន ២ ពាន់នាក់ទទួលបានការអប់រំ និងបានចូលរៀននៅសាលាហើយបើទោះជាគ្មានតួលេខច្បាស់លាស់អំពីកុមារអូទីស្សឹម តែគេអាចប៉ាន់ស្មានថា ក្នុងចំណោមជនមានពិការភាពទាំងនោះ គឺមានប្រមាណ ៥ ០០០ នាក់ដែលមានបញ្ហាអូទីស្សឹម៕