ភ្នំពេញៈ រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់បានផ្ញើលិខិតមួយច្បាប់ជូនដល់អភិបាលរាជធានី ខេត្តទាំងអស់ដែលជាប្រធានគណៈកម្មាធិការរៀបចំដែនដី និងនគរូបនីយកម្មត្រូវឈប់ផ្តល់លិខិតអនុញ្ញាតសាងសង់ស្ថានីយប្រេងឥន្ធនៈនៅតំបន់ដែលហាមឃាត់ដើម្បីរក្សាសណ្តាប់ធ្នាប់ និងសុវត្ថិភាពជូនប្រជាជន។
ក្នុងលិខិតចុះហត្ថលេខាដោយលោក ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ដែលទើបកាន់តំណែងថ្មីចុះថ្ងៃទី ១៩ ខែឧសភាបានស្នើអភិបាលរាជធានីខេត្តទាំងអស់កំណត់តំបន់ហាមឃាត់ និងឈប់ផ្តល់អាជ្ញាប័ណ្ណនៅកន្លែងនោះ។ លិខិតបានស្នើថា៖ «រៀបចំប្លង់កំណត់តំបន់ឈប់បន្តផ្តល់លិខិតអនុញ្ញាតសាងសង់ស្ថានីយប្រេងឥន្ធនៈក្នុងតំបន់ហាមឃាត់ និងតំបន់សាងសង់ស្ថានីយប្រេងឥន្ធនៈនៅក្នុងរាជធានី ខេត្ត ដោយផ្អែកលើគោលការណ៍តម្លាភាព សុវត្ថិភាព សណ្តាប់ធ្នាប់ បរិស្ថានរស់នៅ»។ ក្នុងលិខិតក៏បានជំរុញឱ្យមានការពង្រឹងជុំវិញការផ្តល់លិខិតអនុញ្ញាតសាងសង់ស្ថានីយប្រេងឥន្ធនៈផងដែរ។ លិខិតបន្តថា៖ «ចំពោះរាល់ការស្នើសុំលិខិតអនុញ្ញាតត្រូវណែនាំឱ្យម្ចាស់សំណើភ្ជាប់មកជាមួយនូវកិច្ចសន្យា និងស្នាមមេដៃយល់ព្រមឱ្យសាងសង់ស្ថានីយប្រេងឥន្ធនៈពីគ្រប់អ្នកជាប់ព្រំ ត្រូវមានរបាយការណ៍លទ្ធផលបិទផ្សាយគម្រោងសាងសង់នៅទីតាំងស្នើសុំរយៈពេល ២៥ ថ្ងៃដោយការិយាល័យរៀបចំដែនដី»។
អ្នកនាំពាក្យក្រសួងដែនដីលោក ជៀម សុផលមករា ប្រាប់ភ្នំពេញប៉ុស្តិ៍បន្ថែមថាវិធានការនេះគឺដើម្បីពង្រឹងសុវត្ថិភាពជូនប្រជាពលរដ្ឋ និងចៀសវាងគ្រោះថ្នាក់ជាយថាហេតុ។ លោកថា៖ «កន្លែងខ្លះមិនត្រូវបានអនុញ្ញាតឱ្យសាងសង់បន្ថែមទៀតទេព្រោះដីផ្ទាល់មិនអាចតម្រូវតាមស្តង់ដារសង់ស្ថានីយអ៊ីចឹងយើងត្រូវមានការណែនាំមួយដូចថាតំបន់ខ្លះគេបិទហាមឃាត់ និងមានតម្រូវការគ្រប់គ្រាន់សម្រាប់សាងសង់ស្ថានីយប្រេងអ៊ីចឹងមិនចាំបាច់ឱ្យខេត្តបញ្ជូនពាក្យស្នើសុំមកទេ»។
ប្រធានមន្ទីររ៉ែ និងថាមពលរាជធានីភ្នំពេញលោក ងី ប៊ុនលី ថ្លែងថាបច្ចុប្បន្នស្ថានីយប្រេងឥន្ធនៈ និងដេប៉ូនៅភ្នំពេញមាន ៤០០ កន្លែងតែនៅទូទាំងប្រទេសលោកក្តាប់ព័ត៌មានមិនបានទេ។ លោកថា៖ «កន្លងមកសាលារាជធានីភ្នំពេញបានអនុញ្ញាតឱ្យទីតាំងខ្លះតែទីតាំងមួយចំនួនមិនអនុញ្ញាតទេតែក្រុមការងារបច្ចេកទេសបានចុះរៀបចំសុវត្ថិភាពស្ថានីយមុននឹងអនុញ្ញាតឱ្យសង់»៕
