ភ្នំពេញ: ក្រសួងរៀបចំដែនដី នគរូបនីយកម្ម និងសំណង់បានប្រកាសមិនទទួលដោះស្រាយបញ្ហាទំនាស់ដីធ្លីតាមសំណើរបស់ពលរដ្ឋ ៧៧ គ្រួសារ នៅឃុំតានូន ស្រុកបទុមសាគរ ខេត្តកោះកុងឡើយដោយលើកឡើងថា ពលរដ្ឋទាំងនោះធ្លាប់ទទួលបានការដោះស្រាយរួចមកហើយពីគណៈកម្មការអន្តរក្រសួង។
តាមសេចក្តីប្រកាសព័ត៌មានរបស់ក្រសួងរៀបចំដែនដីចុះថ្ងៃទី ១១ ខែកុម្ភៈ ដែលភ្នំពេញប៉ុស្ដិ៍ទទួលបានពីម្សិលមិញឲ្យដឹងថា ចំពោះប្រជាពលរដ្ឋចំនួន ៧៧ គ្រួសារ មានទីលំនៅភូមិបាក់រនាស់ ភូមិតានូន ភូមិទួលពោធិ៍ ភូមិព្រែកខ្យង ឃុំតានូន ស្រុកបទុមសាគរ ដែលមានតំណាងឈ្មោះ គុណ សៅរ៍, ម៉ូវ ស៊ីដែន, លឹម អូន និងឈ្មោះ ផៃ ទួន ដែលឡើងមកតវ៉ានៅទីស្ដីការក្រសួងនៅថ្ងៃទី ១១ ខែ កុម្ភៈ ឆ្នាំ ២០២០ ដើម្បីស្នើឲ្យក្រសួងជួយដោះស្រាយទំនាស់ដីធ្លីក្នុងតំបន់វិនិយោគរបស់ក្រុមហ៊ុន UNION DEVELOPMENT GROUP Co.,Ltd។
សេចក្ដីប្រកាសបន្តថា ពលរដ្ឋទាំង ៧៧ គ្រួសារ បានស្នើសុំដីស្រែបន្ថែមចំនួន ១ ហិកតាក្នុង ១ គ្រួសារ ប៉ុន្ដែករណីនេះក្រសួងរៀបចំដែនដីបានពិនិត្យឃើញថា ពលរដ្ឋទាំងនេះបានទទួលការដោះស្រាយរួចរាល់ហើយពីគណៈកម្មការអន្តរក្រសួងដោយក្នុង ១ គ្រួសារទទួលបានដីលំនៅឋានទំហំ ៥០ គុណ ១០០ ម៉ែត្រដីចម្ការទំហំចាប់ពី ១ ហិកតា ដល់ ៦ ហិកតា ទៅតាមទំហំដីធំ ឬតូច ដែលពួកគាត់ធ្លាប់បានកាន់កាប់ផ្ទះឈើ ១ ខ្នង និងថវិកាពី ៣៥០ ដុល្លារ ដល់ ១ ម៉ឺនដុល្លារ ទៅតាមទំហំដីធំ ឬតូចដែលពួកគាត់ធ្លាប់បានកាន់កាប់។
លោក ម៉ែន វុទ្ធី អាយុ ៥៧ ឆ្នាំ ជាពលរដ្ឋម្នាក់ក្នុងចំណោម ៧៧ គ្រួសារ ថ្លែងពីម្សិលមិញថា រហូតមកដល់ពេលនេះក្រុមលោកមិនទាន់បានទទួលសំណងអ្វីពីក្រុមហ៊ុន UNION DEVELOPMENT GROUP Co.,Ltd និងរដ្ឋាភិបាលទេ ដោយលោកតែងតែនាំគ្នាទៅធ្វើការតវ៉ាទាមទារឲ្យអាជ្ញាធរជួយដោះស្រាយជាញឹកញាប់។
លោកបន្តថា ការប្រកាសមិនរកដំណោះស្រាយជូនពួកលោកនេះគឺពិតជាអយុត្តិធម៌ខ្លាំងណាស់ ព្រោះនៅឆ្នាំ ២០០៨ ក្រុមហ៊ុនឈូសឆាយដីស្រែចម្ការ និងដីភូមិរបស់ពួកលោកដោយគ្មានផ្ដល់សំណងទេ ខណៈពួកលោកបានរស់នៅលើដីរបស់ខ្លួនតាំងពីដូនតាមក។ «ខ្ញុំសូមអំពាវនាវឲ្យអាជ្ញាធរចុះមកពិនិត្យស្ថានភាពជាក់ស្ដែង ស្រាវជ្រាវបន្ថែមទៀត ដើម្បីដឹងឲ្យកាន់តែច្បាស់ពីជីវភាពរបស់ពលរដ្ឋ។ ការប្រកាសនេះខ្ញុំពិតជាអស់សង្ឃឹមណាស់ ពួកខ្ញុំមិនដឹងថាត្រូវទៅរកស្ថាប័នណាឲ្យជួយទៀតទេ»។
លោក វ៉ាន់ ពុទ្ធី មេឃុំតានូនថ្លែងថាពលរដ្ឋទាំង ៧៧ គ្រួសារនេះត្រូវបានគណៈកម្មការអន្តរក្រសួងបានបែងចែកដី លុយ និងផ្ទះឈើ ១ ខ្នងជូនរួចរាល់ហើយកាលពីឆ្នាំ ២០១០ ប៉ុន្ដែមានពលរដ្ឋមួយចំនួនបានលក់ដី និងផ្ទះដែលអាជ្ញាធរចែកជូននោះទៅឲ្យអ្នកផ្សេងហើយបែរជាពួកគាត់នាំគ្នាតវ៉ាសុំដីស្រែបន្ថែមទៀតទៅវិញ។
លោកបន្តថា លោកធ្លាប់បានអប់រំ ផ្សព្វផ្សាយ ពីបញ្ហាផ្លូវច្បាប់ ប្រាប់ទៅពួកគាត់អំពីផលប៉ះពាល់នានា ប្រសិនពួកគាត់នាំគ្នាតវ៉ាស្នើសុំដីបន្ថែម ខណៈដែលគណៈកម្មការអន្តរក្រសួងបានបែងចែកដីរួចរាល់នោះ។ «ខ្ញុំបានប្រាប់ពួកគាត់ហើយ បើយើងទទួលបានដី បានផ្ទះហើយយើងចាំបាច់អីទៅនាំគ្នាទៅតវ៉ាទៀតបើគេផ្ដល់សំណងរួចរាល់ហើយ គ្មានក្រុមហ៊ុនឯណា គេមានដីចែកឲ្យយើងទៀតទេ។ យើងគួរតែនាំគ្នាប្រកបរបររកស៊ីអីផ្សេងៗទៅ»។
លោក ហោ អ៊ិន មន្ត្រីសម្របសម្រួលផ្នែកសិទ្ធិមនុស្សនៃអង្គការលីកាដូ ប្រចាំខេត្តកោះកុងថ្លែងថា ករណីនេះលោកបានតាមដានជិត ៧ ឆ្នាំហើយ ដោយសង្កេតឃើញថាអាជ្ញាធរពិតជាបានបែងចែកដី លុយ និងផ្ទះជូនពលរដ្ឋទាំងនេះពិតមែន ប៉ុន្ដែសំណងទាំងនោះមិនមានតម្លាភាព និងយុត្តិធម៌សម្រាប់ពលរដ្ឋដែលមានដីស្រែច្រើនហិកតានោះទេ។ «អាជ្ញាធរគួរតែសើរើ និងស៊ើបអង្កេតករណីនេះឡើងវិញ ដើម្បីឲ្យពលរដ្ឋមួយចំនួនដែលកើតទុក្ខមិនសុខចិត្តនោះអស់ចិត្ត ព្រោះអ្នកខ្លះគាត់មានដីស្រែចម្ការដីភូមិ ១០ ហិកតា ឬ ២០ ហិកតា តែគាត់ទទួលបានដីស្រែតែ ៥ ហិកតាដូចគេ ដូចឯងដែរ។ អ៊ីចឹងគួរពិនិត្យឡើងវិញ ហើយផ្ដល់យុត្តិធម៌ និងតម្លាភាពឲ្យគាត់»៕