ភ្នំពេញៈ ក្រសួងសុខាភិបាលចេញសេចក្ដីណែនាំយ៉ាងលម្អិតដល់ភ្ញៀវជាតិ និងអន្តរជាតិដែលមានបំណងចូលគាល់ព្រះមហាក្សត្រ សម្ដេចព្រះវររាជមាតាជាតិខ្មែរ និងជួបសវនាការជាមួយថ្នាក់ដឹកនាំដោយតម្រូវឱ្យអនុវត្តនូវវិធាននានា ដើម្បីទប់ស្កាត់ការចម្លងជំងឺកូវីដ ១៩ ដល់ព្រះមហាក្សត្រ និងថ្នាក់ដឹកនាំកំពូលៗរបស់កម្ពុជា។
តាមសេចក្ដីណែនាំចុះហត្ថលេខាដោយលោក ម៉ម ប៊ុនហេង រដ្ឋមន្ត្រីក្រសួងសុខាភិបាលកាលពីថ្ងៃទី ២៤ វិច្ឆិកា បានលម្អិតអំពីការរៀបចំវិធីការពារការចម្លងជំងឺកូវីដ ១៩ សម្រាប់ការចូលគាល់ព្រះមហាក្សត្រ និងក្នុងជំនួបផ្លូវការជាមួយថ្នាក់ដឹកនាំដោយបែងចែកទៅតាមដំណាក់កាលរួមមាន ដំណាក់កាលមុនពេលមកដល់ ពេលមកដល់ក្នុងពេលជួបសវនាការ ក្រោយពេលជួប និងវិធានការសម្រាប់អង្គរក្ស អ្នកបើកបរ និងអ្នកសារព័ត៌មាន។
សេចក្ដីណែនាំនោះបានរៀបរាប់ទៀតថា មុនពេលមកដល់ប្រតិភូភ្ញៀវជាតិ និងអន្តរជាតិត្រូវទទួលបានការឯកភាពពីព្រះបរមរាជវាំង អគ្គលេខាធិការដ្ឋានព្រឹទ្ធសភា រដ្ឋសភា និងខុទ្ទកាល័យលោកនាយករដ្ឋមន្ត្រី ហ៊ុន សែន ជាមុនសិន។
ប្រតិភូក៏ត្រូវកត់សម្គាល់អំពីកម្រិតហានិភ័យនៃទីតាំងភូមិសាស្ត្រនៃការឆ្លងរាលដាលជំងឺកូវីដ ១៩ និងហានិភ័យនៃមធ្យោបាយធ្វើដំណើរផងដែរ។ លើសពីនេះទៀត ប្រតិភូត្រូវមានវិញ្ញាបនបត្រចេញដោយអាជ្ញាធរសុខាភិបាលដែលបញ្ជាក់ថា គ្មានជំងឺកូវីដ១៩ រយៈពេល ៧២ ម៉ោងមុនចេញដំណើរ និងគ្មានរោគសញ្ញានានានៃជំងឺកូវីដ ១៩។
នៅពេលមកដល់ប្រតិភូនឹងត្រូវបានយកសំណាកសម្រាប់ធ្វើតេស្តរកកូវីដ ១៩ ឱ្យបានឆាប់រហ័ស ហើយត្រូវចៀសវាងការជួបជុំក្នុងពិធីណាដែលមានមនុស្សប្រមូលផ្ដុំគ្នាច្រើន។
បើតាមសេចក្ដីណែនាំដដែលនៅមុនចូលគាល់ព្រះមហាក្សត្រ និងថ្នាក់ដឹកនាំ ប្រតិភូ និងអ្នកពាក់ព័ន្ធត្រូវបានយកសំណាក និងធ្វើតេស្តរកមើលកូវីដ១៩។
ការចូលគាល់ ឬជួបសវនាការអាចធ្វើឡើងទៅបាន លុះត្រាតែលទ្ធផលនៃការតេស្តសំណាកបញ្ជាក់ថា អវិជ្ជមានជំងឺនេះ។ ប្រសិនបើលទ្ធផលបញ្ជាក់ថាមានវិជ្ជមានកូវីដ១៩ ជំនួបនោះត្រូវលុបចោលភ្លាម។ រីឯអ្នកដែលអមដំណើរជាមួយប្រតិភូទាំងអស់ត្រូវបានកត់ក្នុងបញ្ជីឈ្មោះ និងមានកម្មវិធីច្បាស់លាស់ក្នុងអំឡុងពេលមកកម្ពុជា។
សម្រាប់ទីតាំងជំនួបត្រូវមានការរៀបចំប្រព័ន្ធរំហួតខ្យល់ចេញចូល គម្លាតសុវត្ថិភាព ១,៥ ម៉ែត្រ ការប្រើប្រាស់ជណ្ដើរយន្ត ពាក់ម៉ាស់ អនាម័យពេលក្អកកណ្ដាស់ និងត្រូវបាញ់ថ្នាំសម្លាប់មេរោគមុនពេលជំនួប។ ក្រសួងលើកទឹកចិត្តឱ្យរក្សាជំនួបត្រឹមតែ ៤៥ នាទី ហើយអ្នករៀបចំត្រូវរក្សាបញ្ជីឈ្មោះអ្នកចូលរួម ដើម្បីងាយស្រួលក្នុងការតាមដានក្នុងករណីមានជាប់ពាក់ព័ន្ធនឹងអ្នកមានកូវីដ ១៩។
សម្រាប់អ្នកបើកបរ អង្គរក្សផ្ទាល់ និងអ្នកសារព័ត៌មាន ក្រសួងសុខាភិបាលតម្រូវឱ្យពួកគេធ្វើតេស្តរកមើលកូវីដ ១៩ ក្នុងរយៈពេល ១២ ម៉ោង មុនទទួល និងជួបប្រតិភូពីអាកាសយានដ្ឋាន និងហាមមានទំនាក់ទំនងជាមួយអ្នកដទៃក្នុងអំឡុងពេលដែលប្រតិភូស្នាក់នៅ ពាក់ម៉ាស់ លាងដៃ និងរក្សាគម្លាតសុវត្ថិភាព និងវិធានការពាក់ព័ន្ធនានា ដែលក្រសួងធ្លាប់បានកំណត់។
ក្រសួងសុខាភិបាលបញ្ជាក់ថា៖ «វិធីសាស្ត្របង្ការជាលក្ខណពិសេសតាមបែបវិទ្យាសាស្ត្រវេជ្ជសាស្ត្រ មានប្រសិទ្ធភាពក្នុងការកាត់បន្ថយ ជាអតិបរមានូវឱកាសចម្លងវីរុសកូវីដ ១៩ ពីមនុស្សម្នាក់ទៅម្នាក់ទៀតនៅទីកន្លែងណាមួយ តាមរយៈការស្រាវជ្រាវជាមុនអំពីភូមិសាស្ត្រនៃការរីករាលដាលនៃជំងឺកូវីដ ១៩ មធ្យោបាយធ្វើដំណើរ ការប្រកាសពីស្ថានភាព សុខភាពរបស់បុគ្គល ការពិនិត្យសុខភាពជាប់ជាប្រចាំ ការធ្វើតេស្តស្រាវជ្រាវរកវីរុសកូវីដ១៩ឱ្យបានឆាប់រហ័ស ការធ្វើចត្តាឡីស័ក ការអនុវត្តវិធានការអនាម័យ គម្លាតសុវត្ថិភាព រួមជាមួយការកំណត់ ឬជ្រើសទីតាំងដែលមានសុវត្ថិភាព និងសមស្របបំផុត»។
លោកវេជ្ជបណ្ឌិត ហែន ភារៈ ឯកទេសខាងជំងឺផ្លូវដង្ហើមថ្លែងថា ក្រសួងសុខាភិបាល ដោយមានកិច្ចសហការជាមួយអង្គការសុខភាពពិភពលោក បានដាក់ចេញនូវវិធានការទប់ស្កាត់ជាច្រើន ប៉ុន្តែលោកស្នើឱ្យការអនុវត្តវិធានការទាំងនេះធ្វើឡើងឱ្យបានដិតដល់។
លោកបានបញ្ជាក់ថា៖ «វាអាស្រ័យលើអ្នកអនុវត្តដែរ វិធានការដែលយើងដាក់ចេញល្អហើយ ដោយមានស្តង់ដាតាមអង្គការសុខភាពពិភពលោក។ ប៉ុន្តែអ្នកអនុវត្តត្រូវតែមានស្មារតីភ្ញាក់រឭក ព្រោះអីការឆ្លងវាងាយណាស់ យើងត្រូវតែប្រុងប្រយ័ត្នរហូត។ យើងមិនអាចថា ជោគជ័យក្នុងការទប់ស្កាត់ជោគជ័យក្នុងការព្យាបាល ហើយធ្វេសប្រហែសលើវិធីការពារទេ»៕