ភ្នំពេញៈ ក្រសួងរៀបចំដែនដី នគរូបនីយកម្ម និងសំណង់រកឃើញថាម្ចាស់សំណង់មួយចំនួនបានដំណើរការសាងសង់ដោយពុំមានលិខិតអនុញ្ញាតពីក្រសួងទេដែលករណីនេះធ្វើឲ្យប៉ះពាល់ដល់សោភណភាព និងសណ្តាប់ធ្នាប់សាធារណៈ។
នៅក្នុងរបាយការណ៍បូកសរុបលទ្ធផលការងារប្រចាំឆ្នាំ ២០១៥ និងទិសដៅឆ្នាំ ២០១៦ ដែលបានផ្សព្វផ្សាយជាសាធារណៈកាលពីថ្ងៃចន្ទឲ្យដឹងថាបញ្ហាប្រឈមរបស់ក្រសួងនៅតែមានដោយសារម្ចាស់សំណង់មួយចំនួនសាងសង់ទាំងគ្មានលិខិតអនុញ្ញាតពុំព្រមអនុវត្តតាមសេចក្តីណែនាំឲ្យកែលម្អ និងកែតម្រូវបណ្តាលឲ្យមានការសាងសង់ខុសពីលិខិតអនុញ្ញាតជាអាទិ៍ ខុសគម្លាត ខុសកម្ពស់ ឬរំលោភលើដីសាធារណៈជាដើម។ ជាងនេះទៅទៀតម្ចាស់សំណង់ខ្លះពុំបានហ៊ុមព័ទ្ធការដ្ឋានរបស់ខ្លួនដែលធ្វើឲ្យប៉ះពាល់សុវត្ថិភាពអ្នកធ្វើដំណើរអ្នកជិតខាង និងសោភណភាពទីក្រុង។
របាយការណ៍លើកឡើងថា៖ «ការដ្ឋានសំណង់ខ្លះពុំមានរបងហ៊ុមព័ទ្ធការដ្ឋានរៀបចំរបាំងសុវត្ថិភាពមិនបានត្រឹមត្រូវ ឬបានរំលោភលើដីសាធារណៈដោយយកដីនោះធ្វើជាជម្រកឲ្យកម្មករ សំណង់ ស្នាក់នៅ ឬទុកសម្ភារបរិក្ខារសំណង់ដែលកត្តានេះធ្វើឲ្យខូចរបៀបរៀបរយ និងសណ្តាប់ធ្នាប់សាធារណៈ»។
ជាមួយគ្នានេះដែរម្ចាស់សំណង់ខ្លះនៅតែមានការជួសជុលការកែលម្អ ការផ្លាស់ប្តូរទ្រង់ទ្រាយប្រភេទអគារ ការប្រើប្រាស់ខុសមុខអគារ និងមិនបានគិតគូរពីគ្រឿងផ្គុំសំណង់នៃអគារទៅតាមការណែនាំ។
បើតាមរបាយការណ៍ក្នុងឆ្នាំ ២០១៥ ក្រសួងបានពិនិត្យផ្តល់លិខិតអនុញ្ញាតសាងសង់ទូទាំងប្រទេសចំនួន ២៣០៥ គម្រោងមានផ្ទៃក្រឡាសំណង់សរុប ៧៦៨៦១១ ម៉ែត្រការ៉េដែលមានតម្លៃប៉ាន់ស្មានទុនវិនិយោគសរុបប្រមាណ $៣,៣៣៨ លានបើធៀបនឹងឆ្នាំ ២០១៤ ទុនវិនិយោគកើនលើស ៣៣,១៤%។
ទាក់ទងការសាងសង់នេះកន្លងមកសំណង់អគារនៅក្បែរស្តាតអូឡាំពិកបានបង្កឱ្យស្ត្រីម្នាក់ស្លាប់ដោយសារដែកធ្លាក់លើហើយថ្មីៗនេះអគារដដែលនោះបានធ្វើឲ្យអ្នកដំណើរម្នាក់រងរបួសដោយសាររបងហ៊ុមព័ទ្ធអគារសំណង់រលំសង្កត់លើ។
លោកនាយករដ្ឋមន្ត្រី ហ៊ុន សែន ក៏ធ្លាប់បានបញ្ជាឲ្យរុះរើសំណង់អគាររបស់កាស៊ីណូណាហ្គាវើលសង់ក្បែរអគារពុទ្ធសាសនបណ្ឌិត្យដោយលោកបានចាត់ទុកថាសាងសង់ដោយខុសច្បាប់ និងធ្វើឲ្យខូចសោភណភាពទីក្រុង។
នៅក្នុងរបាយការណ៍នេះពុំបានលើកឡើងពីវិធានការទប់ស្កាត់ ឬផាកពិន័យ និងទោសទណ្ឌលើអ្នកសាងសង់ដោយគ្មានលិខិតអនុញ្ញាតឡើយ។
អ្នកនាំពាក្យក្រសួងរៀបចំដែនដីលោក ជៀម សុផលមករា បានថ្លែងថាក្រសួងនៅតែនិយាយដដែលៗគឺម្ចាស់គម្រោងដែលបន្តសាងសង់ដោយខុសច្បាប់គឺប្រឈមនឹងការផាកពិន័យ និងប្តឹងឡើងតុលាការ។
លោកថា៖ «តាមនីតិវិធីរបស់យើងត្រូវប្តឹងឡើងទៅតុលាការព្រោះអីយើងខំទប់ស្កាត់ហើយគាត់នៅតែបន្តល្មើសច្បាប់»។ យ៉ាងណាក៏ដោយលោកថាកន្លងមកក៏មានម្ចាស់សំណង់មួយចំនួនព្រមផ្អាកសាងសង់ ឬកែលម្អតាមក្រសួងណែនាំផងដែរ។
នាយកប្រតិបត្តិសម្ព័ន្ធគណនេយ្យភាពសង្គមកម្ពុជាលោក សន ជ័យ ថ្លែងថាសំណង់ដែលសង់ខុសច្បាប់ និងរំលោភលើផ្លូវសាធារណៈនៅតែកើតមានដោយសារភាពកម្សោយ ឬភាពអសកម្មរបស់មន្ត្រីដែលធ្វើការងារនេះ។ អ្វីដែលលោកមើលឃើញភាគច្រើនអ្នកសាងសង់ល្មើសច្បាប់គឺសុទ្ធតែជាអ្នកមានអំណាច ឬមានឥទ្ធិពលពោលគឺពុំសូវមានប្រជាពលរដ្ឋធម្មតាហ៊ានសង់នោះទេ។
លោកថា៖ «អ្នកសាងសង់ភាគច្រើនជាក្រុមមនុស្សមានអំណាចហើយភាពអសកម្មរបស់មន្ត្រីដែលចុះទៅអនុវត្តមិនមានប្រសិទ្ធភាពប៉ុន្តែអំណាចរដ្ឋហ្នឹងបើគេអនុវត្តជាមួយប្រជាជនសាមញ្ញជាមួយអ្នករកស៊ីលក់ដូរធម្មតាគឺមានប្រសិទ្ធភាពហ្មង»៕
