ភ្នំពេញៈ ក្រសួងមហាផ្ទៃអះអាងថា ខ្លួនមានភាពហ្មត់ចត់ក្នុងការគ្រប់គ្រងជនបរទេសអន្តោប្រវេសន្តនៅកម្ពុជាក្នុងនោះមានជនបរទេសអន្តោប្រវេសន្តជាង ៨ ម៉ឺននាក់ កំពុងត្រូវបានក្រសួងផ្ដល់ជូនបណ្ណស្នាក់នៅអចិន្រៃ្តយ៍ជាបន្តបន្ទាប់ ដើម្បីដាក់ពួកគេឱ្យស្ថិតនៅក្រោមគន្លងច្បាប់ និងអនុវត្ដកាតព្វកិច្ចនានាតាមការកំណត់។
សេចក្ដីជូនដំណឹងរបស់ក្រសួងមហាផ្ទៃកាលពីថ្ងៃទី ១០ ខែកក្កដា បានឱ្យដឹងថា ដោយពិនិត្យឃើញថា មិនអាចទុកឱ្យបញ្ហាអន្តោប្រវេសន៍បន្តស្ថិតនៅជាគ្រោះហានិភ័យចំពោះសន្តិសុខជាតិ សណ្តាប់ធ្នាប់ និងសុវត្ថិភាពសង្គម ព្រមទាំងការអភិវឌ្ឍសេដ្ឋកិច្ចនោះគឺចាប់ពីឆ្នាំ ២០១៤ ក្រសួងមហាផ្ទៃបានស្នើសុំគោលការណ៍ដឹកនាំ និងបានទទួលនូវការគាំទ្រពីលោកនាយករដ្ឋមន្ដ្រី ហ៊ុន សែន ដើម្បីដោះស្រាយកិច្ចការនេះប្រកបដោយការបេ្តជ្ញាចិត្ត និងការទទួលខុសត្រូវចំពោះផលប្រយោជន៍ជាតិ។
ក្រសួងឱ្យដឹងថា៖ «គណៈកម្មការអន្តរក្រសួងមួយ និងក្រុមការងារប្រតិបត្ដិជាច្រើនត្រូវបានបង្កើតឡើងដើម្បីចុះធ្វើជំរឿនស្ថិតិជនបរទេសអន្តោប្រវេសន្តសាឡើងវិញ ដោយមានការត្រួតពិនិត្យយ៉ាងហ្មត់ចត់ ដើម្បីវាយតម្លៃចងក្រងជាតារាងឧបសម្ព័ន្ធផ្លូវការបម្រើឱ្យការកំណត់ ក្របខ័ណ្ឌគ្រប់គ្រង និងដោះស្រាយ»។
ក្រសួងបញ្ជាក់ថា ជាលទ្ធផលចុងក្រោយពេលបិទឱសានវាទនៃយុទ្ធនាការ ចុះធ្វើជំរឿនស្ថិតិជនបរទេសអន្តោប្រវេសន្តកាលពីថ្ងៃទី ៣០ មិថុនា ឆ្នាំ ២០១៩ គឺមានជនបរទេសអន្តោប្រវេសន្តនៅទូទាំងប្រទេសបានដាក់ពាក្យស្នើសុំប្រកាសទទួលស្គាល់ជាជនបរទេសអន្តោប្រវេសន្ត និងសុំបណ្ណស្នាក់នៅអចិន្រៃ្តយ៍ចំនួន ៨៩ ៧៨៦ នាក់ ស្មើនឹង ២៨ ៩៤៥ គ្រួសារ រួមមាន ១១ សញ្ជាតិ។ ក្នុងនោះមានជនជាតិវៀតណាមចំនួន ៨៩ ៤៧១ នាក់ (ស្រី ៤២ ៨៣៦ នាក់) ថៃ ចំនួន ១១៧ នាក់ (ស្រី ១៥ នាក់) ឡាវ ចំនួន ១៥១ នាក់ (ស្រី ៥២ នាក់) និង ចិន ២២ នាក់ (ស្រី ១៣ នាក់)។
ក្រសួងមហាផ្ទៃបានឱ្យដឹងថា ក្នុងដំណើរការពិនិត្យដោះស្រាយបញ្ហានេះក្រុមការងារបានធ្វើការដកហូតឯកសាររដ្ឋបាលកម្ពុជាមិនប្រក្រតីដែលជនបរទេសកំពុងកាន់កាប់ចាប់តាំងពីដើមឆ្នាំ ២០១៧ ដល់ថ្ងៃទី ៣០ ខែមិថុនា ឆ្នាំ ២០១៩ បានចំនួន ៣៧ ៤៣៦ ច្បាប់ពីជនបរទេសចំនួន ២០ ១០៧ គ្រួសារ ដែលមានមនុស្សសរុបចំនួន ៦៩ ៩៥៧ ស្មើនឹង ១១ សញ្ជាតិ។ ក្នុងនោះសញ្ជាតិវៀតណាមចំនួន ១៩ ៩៦៧ គ្រួសារមនុស្សចំនួន ៦៩ ៧៨៧ នាក់។
ក្រសួងបញ្ជាក់ថា៖ «បច្ចុប្បន្នជនបរទេសដែលមានចំនួនដូចបានរៀបរាប់ខាងលើកំពុងត្រូវបានក្រសួងមហាផ្ទៃផ្តល់ជូនបណ្ណស្នាក់នៅអចិន្រៃ្តយ៍ (សុពលភាព ២ ឆ្នាំម្តង) ជាបន្តបន្ទាប់ដើម្បីដាក់ពួកគេឱ្យស្ថិតនៅក្រោមគន្លងច្បាប់ និងអនុវត្តកាតព្វកិច្ចនានាតាមការកំណត់»។
លោក ស៊ឹង សែនករុណា មន្ត្រីអង្កេតជាន់ខ្ពស់នៃសមាគមការពារ សិទ្ធិមនុស្ស (អាដហុក) ថ្លែងថាជាគោលការណ៍ខាងអង្គការសិទ្ធិមនុស្សមិនរើសអើងចំពោះជាតិសាសន៍ខាងណាមួយទេ។ អង្គការមានការគោរពសិទ្ធិរបស់ពួកគាត់ មិនថាជាជនជាតិណានោះទេ។ ប៉ុន្ដែអ្វីដែលជាការកត់សម្គាល់ជាធម្មតាប្រទេសជាតិណាក៏ដោយ ក៏មានច្បាប់ពីការគ្រប់គ្រងប្រទេសរបស់គេនីមួយៗអំពីសិទ្ធិ និងច្បាប់អន្ដោប្រវេសន៍នេះដែរ។
លោកថា៖ «ដោយឡែកកម្ពុជាយើង ឃើញថាមានការបើកលម្ហច្រើនឱ្យជនអន្ដោប្រវេសន្តខុសច្បាប់មករស់នៅកម្ពុជារហូតដល់មានការសម្របសម្រួលឱ្យមានបណ្ណអន្ដោប្រវេសន៍អចិន្រៃ្តយ៍ថែមទៀត។ ដូច្នេះយើងឃើញថាមានការសម្របសម្រួលច្រើននៅក្នុងរឿងនេះ។ អ្វីដែលជាបញ្ហានោះគឺមានការរិះគន់ពីប្រជាពលរដ្ឋរបស់ខ្លួន។ សម្រាប់រដ្ឋាភិបាលត្រូវតែមានការបំភ្លឺឱ្យបានច្បាស់អំពីបញ្ហាទាំងអស់នេះ»។
លោកបន្តថា បើរដ្ឋាភិបាលមិនមានការគ្រប់គ្រងជនអន្តោប្រវេសន្តបានល្អបណ្ដោយឱ្យចូលមករស់នៅអចិន្រៃ្តយ៍ច្រើននៅកម្ពុជានឹងធ្វើឱ្យប៉ះពាល់ដល់ជីវភាព និងការងាររបស់ពលរដ្ឋកម្ពុជា។
លោក កែវ វណ្ណថន អគ្គនាយករង និងជាអ្នកនាំពាក្យអគ្គនាយកដ្ឋានអន្ដោប្រវេសន៍នៃក្រសួងមហាផ្ទៃបានប្រាប់ភ្នំពេញប៉ុស្ដិ៍កាលពីថ្ងៃទី ១២ កក្កដា ថាដើម្បីឱ្យសាធារណជនបានដឹងពីភាពហ្មត់ចត់នៃការគ្រប់គ្រងជនបរទេសអន្តោប្រវេសន្តទើបក្រសួងមហាផ្ទៃបានចេញលិខិតផ្សព្វផ្សាយជូនដំណឹងនេះ។
លោកថ្លែងថា៖ «យើងចង់ប្រាប់ពីការគ្រប់គ្រងជនបរទេសអន្តោប្រវេសន្តថា មានភាពច្បាស់លាស់ ហ្មត់ចត់ ហើយដើម្បីគ្រប់គ្រងជនបរទេសអន្តោប្រវេសន្តឱ្យបានហ្មត់ចត់ គឺយើងធ្វើជំរឿនដើម្បីគ្រប់គ្រងតួលេខឱ្យបានច្បាស់លាស់ ដោយបញ្ចូលទៅក្នុងប្រព័ន្ធទិន្នន័យ និងចេញបណ្ណស្នាក់នៅអចិន្រៃ្តយ៍ជាបន្តបន្ទាប់ជូនពួកគាត់។ ជនបរទេសអន្តោប្រវេសន្តដែលកាន់ឯកសារមិនប្រក្រតីពីពេលមុនយើងបានដកហូតឯកសារនោះពីគាត់»៕