The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​ថា​ សមាគម​គ្រូ​រំលោភ​ច្បាប់

ក្រសួង​ថា​ សមាគម​គ្រូ​រំលោភ​ច្បាប់

Content image - Phnom Penh Post
អ្នកស្រី អ៊ុក ឆាយ៉ាវី ប្រធាន​សមាគម​គ្រូបង្រៀន​កម្ពុជា​ឯករាជ្យ។ FB

ក្រសួង​ថា​ សមាគម​គ្រូ​រំលោភ​ច្បាប់

ភ្នំពេញៈ ក្រសួង​មហាផ្ទៃ​បាន​ចោទ​សមាគម​គ្រូបង្រៀន​កម្ពុជា​ឯករាជ្យ​ថា​បាន​រំលោភ​លើ​ច្បាប់​ស្តីពី​អង្គការ-សមាគម​មិនមែន​រដ្ឋាភិបាល​ក្នុង​អំឡុង​ពេល​បោះឆ្នោត​ជ្រើសរើស​ប្រធាន​របស់​ខ្លួន​កាលពី​ខែ​ធ្នូ​ឆ្នាំ​មុន​ ប៉ុន្តែ​ប្រធាន​ដែល​ជាប់​ឆ្នោត​ថ្មី​យល់​ថា​នោះ​ហាក់​ដូចជា​មាន​ការ​រើសអើង​មួយ​ចំពោះ​សមាគម​ដែល​ធ្លាប់​រិះគន់​លើ​រដ្ឋាភិបាល ។

យោង​តាម​លិខិត​របស់​ក្រសួង​​ផ្ញើ​ទៅ​សមាគម​គ្រូបង្រៀន​កម្ពុជា​ឯករាជ្យ​ (CITA) ​ដែល​បាន​ចុះ​កាលបរិច្ឆេទ​តាំងពី​ថ្ងៃ​ទី​ ៣ ​ខែ​មីនា​មក​នោះ​បញ្ជាក់​ថា​សមាគម​នេះ​បាន​រំលោភ​លើ​មាត្រា​ ៧ ​នៃ​ច្បាប់​ស្ដីពី​អង្គការ-សមាគម​មិនមែន​រដ្ឋាភិបាល​ទាក់ទង​នឹង​ចំណុច​មួយ​ចំនួន​នៃ​សមាគម​ដែល​ជា​ច្បាប់​សម្រាប់​ការ​ជ្រើសរើស​ការ​បញ្ចប់ ការ​ច្រាន​ចោល​ ឬ​ដក​តំណែង​ប្រធាន​ ឬ​នាយក​ប្រតិបត្តិ​ជាដើម។

ក្រសួង​បាន​​លើក​ឡើង​ថា​សមាគម​នេះ​មិន​បាន​បញ្ជូន​ប្រវត្តិរូប​បេក្ខជន​ទៅ​ក្រសួង​ឲ្យ​បាន​មុន​ថ្ងៃ​បោះឆ្នោត​កាលពី​ថ្ងៃ​ទី ៣១ ​ខែ​ធ្នូ​នោះ​ទេ​។

អ្នកស្រី​​ អ៊ុក ឆាយ៉ាវី ដែល​ជា​ប្រធាន​​សមាគម​ក្នុង​អាណត្តិ​ថ្មី​នេះ​បាន​ថ្លែង​កាលពី​ម្សិលមិញ​ថា​អ្នកស្រី​បាន​បញ្ជូន​ប្រវត្តិរូប​សង្ខេប​ទៅ​ក្រសួង​ បន្ទាប់ពី​លោកស្រី​ត្រូវ​បាន​បោះឆ្នោត​ជ្រើសរើស​ឲ្យ​ធ្វើ​ប្រធាន​សមាគម​នេះ​។

បើ​តាម​អ្នកស្រី​តម្រូវការ​ជាក់លាក់​ក្នុង​ការ​បញ្ជូន​ប្រវត្តិរូប​ឲ្យ​បាន​មុន​ ឬ​ក្រោយ​ពេល​បោះឆ្នោត​ជ្រើសរើស​ប្រធាន​គឺ​មិន​បាន​គូសបញ្ជាក់​ថា​ស្ថិត​នៅ​ក្រោម​មាត្រា​ទី​ ៧ ​ទេ​ដែល​មាត្រា​នេះ​និយាយ​ថា​សមាគម​ត្រូវ​អនុលោម​ឱ្យ​ស្រប​ជាមួយ​នឹង​ធម្មនុញ្ញ​ និង​ច្បាប់​ផ្សេងៗ​ទៀត​ដែល​មាន​ស្រាប់​។

លោក ប៉ុល លឹម រដ្ឋលេខាធិការ​ក្រសួង​មហាផ្ទៃ​បាន​បញ្ជាក់​ក្នុង​លិខិត​នោះ​ថា៖ «ក្រសួង​ស្នើ​ CITA ឲ្យ​ពិនិត្យ​ឡើង​វិញ»​។

អ្នកស្រី​​ ឆាយ៉ាវី បាន​ថ្លែង​ថា​អ្នកស្រី​មិន​បាន​ដឹង​ថា​អ្នកស្រី​ត្រូវ​តែ​បញ្ជូន​ប្រវត្តិរូប​អ្នកស្រី​ទៅ​ក្រសួង​ឲ្យ​បាន​មុន​ពេល​ដែល​អ្នកស្រី​ត្រូវ​បាន​បោះឆ្នោត​ជ្រើសរើស​ឲ្យ​ធ្វើ​ជា​ប្រធាន​នោះ​ទេ។

អ្នកស្រី​បាន​កត់សម្គាល់​ថា៖ «ពួកគេ​ហាក់​មាន​ការ​រើសអើង​ [ប្រឆាំង​] ដល់​ CITA ពីព្រោះ​សមាគម​នេះ​តែងតែ​រិះគន់​លើ​រដ្ឋាភិបាល»​៕ NS

អត្ថបទគួរចាប់អារម្មណ៍