ភ្នំពេញៈ ក្រសួងទេសចរណ៍បានសម្រេចបង្កើតអនុក្រុមការងារថ្មីចំនួន ១២ ក្រុម ដើម្បីជំរុញ និងតាមដានវិធានសុវត្ថិភាពទេសចរណ៍ (ជំហានទី ១) ចំណុះឱ្យក្រុមការងារជំរុញ និងលើកស្ទួយវិស័យទេសចរណ៍ ក្នុងដំណាក់កាលវិបត្តិ និងក្រោយវិបត្តិនៃជំងឺកូវីដ១៩។
យោងតាមសេចក្តីសម្រេចលេខ ០៨០ សសរ ដែល ភ្នំពេញ ប៉ុស្តិ៍ ទទួលបានកាលពីម្សិលមិញឱ្យដឹងថា លោក ថោង ខុន រដ្ឋមន្ត្រីក្រសួងទេសចរណ៍ បានសម្រេចបង្កើតអនុក្រុមការងារដើម្បីជំរុញ និងតាមដានការអនុវត្តវិធានសុវត្ថិភាពទេសចរណ៍ (ជំហានទី ១) ចំណុះឱ្យក្រុមការងារជំរុញ និងលើកស្ទួយវិស័យទេសចរណ៍ក្នុងដំណាក់កាលវិបត្តិ និងក្រោយវិបត្តិកូវីដ ១៩ ថ្មីចំនួន ១២ ខណៈសេចក្តីសម្រេចលេខ ០៥៤ សសរ ចុះថ្ងៃទី ១៤ ខែសីហា ឆ្នាំ ២០២០ ត្រូវបានចាត់ចូលជានិរាករណ៍។
លោក តុប សុភ័ក អ្នកនាំពាក្យក្រសួងទេសចរណ៍បានប្រាប់ ភ្នំពេញ ប៉ុស្តិ៍ កាលពីម្សិលមិញថា គោលបំណងនៃការបង្កើតអនុក្រុមការងារថ្មីមានចំនួន ១២ ក្រុមនេះដើម្បីចុះទៅពិនិត្យតាមដាននូវវិធានការសុវត្ថិភាពទេសចរណ៍នៅតាមគោលដៅទេសចរណ៍នៃខេត្តនីមួយៗនៅទូទាំងប្រទេសក្នុងការរួមចំណែកទប់ស្កាត់ការរីករាលដាលនូវជំងឺកូវីដ ១៩។
លោក តុប សុភ័ក បន្តថា អនុក្រុមការងារនេះនឹងសហការជាមួយនឹងរដ្ឋបាលរាជធានី-ខេត្តទាំងអស់ ដើម្បីធ្វើការបញ្ជ្រាបព័ត៌មានឱ្យមានការយល់ដឹង ក៏ដូចជាការដាក់ឱ្យអនុវត្តវិធានសុវត្ថិភាពទេសចរណ៍ សម្រាប់ប្រតិបត្តិករទសចរណ៍ដែលមានមូលដ្ឋានអាជីវកម្មរួមមានសណ្ឋាគារ ផ្ទះសំណាក់ និងភោជនីយដា្ឋនជាដើមនៅក្នុងដែនសមត្ថកិច្ចរបស់ខេត្តនីមួយ។
ក្រុមការងារថា្នក់ជាតិនេះក៏នឹងចុះទៅជួយសម្របសម្រួល ជាមួយនឹងរដ្ឋបាលរាជធានី-ខេត្តឱ្យអនុវត្តឱ្យមានប្រសិទ្ធភាពចំពោះវិធានការសុវត្ថិភាពទេសចរណ៍នេះ ។
លោកពន្យល់ទៀតថា៖ «ការបង្កើតលើកនេះមាន ១២ ក្រុមដែលកាលពីលើកមុនមានតែ ៤ ក្រុមមានគ្នាតិច ដែលធ្វើឱ្យថ្នាក់ដឹកនាំមានការមមាញឹកខ្លាំងពេក។ ដូច្នេះយើងបែងចែកឱ្យមានគ្នាច្រើនដើម្បីជួយគ្នាក្នុងការធ្វើកិច្ចការនេះ ជាពិសេសងាយស្រួលក្នុងការក្តាប់ស្ថានការណ៍ឱ្យបានល្អ»។
ទោះជាយ៉ាណាបើតាមអ្នកនាំពាក្យរូបនេះ ក្រុមការងារថ្មីនេះគឺមិនខុសពីក្រុមការងារចាស់នោះទេ ដោយក្រសួងគ្រាន់តែបន្ថែមកម្លាំងដើម្បីធ្វើការងារឱ្យកាន់តែមានប្រសិទ្ធភាព ពីព្រោះការអនុវត្តវិធានទេសចរណ៍ដែលបានធ្វើកន្លងមកនេះទើបតែសម្រេចបាន ៤០ ភាគរយនៃមូលដ្ឋានអាជីវកម្មនៅទូទាំងប្រទេសដែលអនុវត្តបានត្រឹមត្រូវ និងប្រគល់ឡាប៊ែលសុវត្ថិភាពទេសចរណ៍។
លោក ហូ វណ្ឌី ទីប្រឹក្សាសមាគមទេសចរណ៍កម្ពុជាបានស្វាគមន៍ចំពោះការបង្កើតអនុក្រុមបន្ថែមទៀតនេះព្រោះវាជាទស្សនវិស័យរបស់ថ្នាក់ដឹកនាំក្រសួងទេសចរណ៍ពាក់ព័ន្ធនឹងភាពអសកម្ម ឬក៏មិនសូវជារលូន តែងតែមានការផ្លាស់ប្តូរជាធម្មតា និងមានការបង្កើតថ្មី ។ ប៉ុន្តែក្នុងករណីបង្កើតអនុក្រុមការងារនេះដោយដាក់មនុស្សមិនចំជំនាញ ឬមិនចំតួនាទីក៏ការងារនេះមិនសូវរលូនដែរ។
ទោះយ៉ាងណាលោក ហូ វណ្ឌី មិនទាន់អាចហ៊ានវាយតម្លៃយ៉ាងណាចំពោះលទ្ធផលនៃការអនុវត្តការងាររបស់អនុក្រុមការងារទាំង ១២ នេះនោះទេដោយលោកត្រូវរង់ចាំតាមដានមើលសកម្មភាពការងាររបស់ក្រុមការងារនេះបន្ទាប់ពីសេចក្តីសម្រេចនេះបានចូលជាធរមាន។
លោកបានថ្លែងថា៖ «ពេលខ្លះ យើងរង់ចាំមើលផែនការណាដែលមានប្រសិទ្ធភាព ផែនការនោះធ្វើទៅបានជោគជ័យ។ វាស៊ីសងទៅលើពេលវេលា យើងរង់ចាំមើលបន្តិចសិនអ្វីៗទាំងអស់វាមិនអាចដូចការគិតទុកទេ ប៉ុន្តែ សម្រាប់អ្នកធ្វើតែងតែខុស អ្នកមិនធ្វើសោះវាមិនខុសទេ»៕