ភ្នំពេញ: ក្រសួងទេសចរណ៍ និងអង្គការចំនួន ២ បានសហការគ្នាបង្កើតយុទ្ធនាការដើរសម្អាតសំរាមពីច្រាំងទន្លេនៅកម្ពុជា ដោយអំពាវនាវដល់ពលរដ្ឋឲ្យចូលរួមសកម្មភាពសម្អាត និងដើររើសសំរាមតាមច្រាំងទន្លេ ដើម្បីលើកសម្រស់សោភណភាពទន្លេ និងទីក្រុងដើម្បីចូលរួមអបអរសាទរ ពិធីបុណ្យទន្លេលើកទី ៦ ដែលធ្វើឡើងនៅខេត្តបាត់ដំបងរយៈពេល ៣ ថ្ងៃគឺចាប់ពីថ្ងៃទី ១៣ ដល់ថ្ងៃទី ១៥ មីនា។
លោក ហ៊ួត រិទ្ធី ប្រធាននាយកដ្ឋានសេវាគាំពារទីក្រុងស្អាត និងជំរុញការប្រឡងប្រណាំងនៃក្រសួងទេសចរណ៍ថ្លែងពីម្សិលមិញថា ក្រសួងទេសចរណ៍ និងអង្គការ LET''S DO IT WORLD បានធ្វើការសហការគ្នាបង្កើតយុទ្ធនាការមួយ ដើម្បីកៀរគរពលរដ្ឋ យុវជន និងមន្ត្រីគ្រប់ស្ថាប័នទាំងអស់ឲ្យចូលរួមដើររើសសំរាមតាមច្រាំងទន្លេដែលចាប់ផ្ដើមពីថ្ងៃទី ១៣ ខែមីនាតទៅ។
លោកបន្តថា ក្នុងឱកាសពិធីបុណ្យទន្លេឆ្នាំនេះ ក្រសួងទេសចរណ៍បានចេញលិខិតអំពាវនាវដល់រដ្ឋបាលរាជធានី-ខេត្តដែលនៅតាមដងទន្លេទាំងអស់ត្រូវចូលរួមសម្អាតបរិស្ថានតាមច្រាំងទន្លេឲ្យបានស្អាតឲ្យមានសោភណភាព។
ដោយឡែកសម្រាប់រាជធានីភ្នំពេញ មន្ត្រីមន្ទីរទេសចរណ៍ និងអាជ្ញាធរក្រុងភ្នំពេញ គ្រោងចាប់ផ្ដើមយុទ្ធនាការនៅថ្ងៃទី ១៤ ខែមីនា រីឯខេត្តបាត់ដំបង និងខេត្តសៀមរាបចាប់ផ្ដើមធ្វើយុទ្ធនាការចាប់ពីថ្ងៃទី ១៣ ខែមីនាតទៅ។
លោកបញ្ជាក់ថា៖ «ការសម្អាត ឬដើររើសសំរាមតាមច្រាំងទន្លេនេះ តែងធ្វើជាប្រចាំ បើទោះបីជាយើងមិនបានបង្កើតយុទ្ធនាការនេះក៏ដោយ ប៉ុន្ដែយុទ្ធនាការលើកនេះយើងធ្វើជាទ្រង់ទ្រាយធំពោលគឺសម្រាប់ស្រុក-ក្រុង និងខេត្ត ដែលជាប់ទន្លេទាំងអស់ត្រូវតែចូលរួមធ្វើយុទ្ធនាការនេះ»។
លោក រិទ្ធី បន្ថែមថា សម្រាប់យុទ្ធនាការនៅភ្នំពេញអាចនឹងមានអ្នកចូលរួមសរុបទាំង ៣ ខណ្ឌមានជ្រោយចង្វារ ខណ្ឌច្បារអំពៅ និងខណ្ឌឫស្សីកែវចន្លោះពី ១ ពាន់ទៅ ១៥០០ នាក់។ រីឯខេត្តមួយចំនួនដែលនៅជាប់ទន្លេ ក៏រំពឹងមានចំនួនអ្នកចូលរួមច្រើនដែរ។
លោក តុប សុភ័ក អនុរដ្ឋលេខាធិការក្រសួងទេសចរណ៍ថ្លែងពីម្សិលមិញថា នាឱកាសពិធីបុណ្យទន្លេនៅខេត្តបាត់ដំបងក្រសួងទេសចរណ៍នឹងសហការជាមួយអង្គការ LET''S DO IT WORLD និងអង្គការ River Clean up Belgium ត្រៀមអនុវត្តសកម្មភាពសម្អាតបរិស្ថាន និងរើសសំរាមនៅជុំវិញបឹងទន្លេសាប។
លោកថា បុណ្យទន្លេនៅខេត្តបាត់ដំបងឆ្នាំនេះអាចនឹងមានប្រជាពលរដ្ឋ និងភ្ញៀវទេសចរប្រមាណជាង ៥០ ម៉ឺននាក់ចូលរួមកម្សាន្ដ។ ដូច្នេះទីតាំងនោះអាចមានការចោលសំរាមកាន់តែច្រើន ដោយលោកអំពាវនាវដល់ប្រជាពលរដ្ឋ និងអាជ្ញាធរគ្រប់ទីកន្លែងចូលរួមក្នុងសកម្មភាពសម្អាតសំរាមពីទន្លេឲ្យបានផុសផុល។
លោកបន្តថា៖ «ក្រៅពីកម្មវិធីកម្សាន្ដច្រើនគឺក្នុងកម្មវិធីបុណ្យទន្លេនេះក្រសួងទេសចរណ៍យើងនឹងផ្ដល់ Poster ផ្សព្វផ្សាយសេចក្ដីណែនាំស្ដីពីការបង្ការ ទប់ស្កាត់ វីរុសកូរ៉ូណាថ្មី កូវីដ ១៩ ដល់មន្ទីរទេសចរណ៍ខេត្តបាត់ដំបង ដើម្បីផ្សព្វផ្សាយបន្តដល់ប្រតិបត្តិករទេសចរណ៍ព្រោះអំឡុងពេលនោះនឹងមានមនុស្សមកច្រើន»។
លោក នូ សុវណ្ណ នាយកប្រចាំតំបន់អាស៊ីនៃអង្គការ LET''S DO IT WORLD ថ្លែងថា ក្រុមការងារអង្គការរបស់លោកចាប់អារម្មណ៍ច្រើនទៅលើការបំពុលទឹកទន្លេ ដោយសារការទម្លាប់ចោលសំរាមចូលទៅក្នុងទឹកទន្លេ ព្រោះទឹកទន្លេពិតជាមានអត្ថប្រយោជន៍ច្រើនខ្លាំងណាស់សម្រាប់ការប្រើប្រាស់ប្រចាំថ្ងៃ សត្វត្រីគ្រប់ប្រភេទ និងផ្ដល់សារៈសំខាន់ជាច្រើនដល់មនុស្ស និងសត្វ។
លោកបានបន្តថា តាមទម្លាប់ប្រជាជនកម្ពុជា ប្រសិនបើគ្មានអ្នកដឹកនាំធ្វើ ឬបង្កើតឲ្យមានយុទ្ធនាការអ្វីមួយនោះទេ គឺពួកគាត់នឹងមិននាំគ្នាធ្វើដែរ។ ដូច្នេះក្រសួងទេសចរណ៍ ផ្ដួចផ្ដើមឲ្យមានកម្មវិធីនេះឡើង ដើម្បីកែប្រែទម្លាប់ចោលសំរាមរបស់ប្រជាជនកម្ពុជាឲ្យបានល្អជាងនេះ។
លោកថា៖ «ការពិតយុទ្ធនាការប្រមូលសំរាមតាមច្រាំងទន្លេនេះពួកខ្ញុំបានធ្វើវាចាប់តាំងពីបុណ្យអុំទូកឆ្នាំនេះម្ល៉េះ ប៉ុន្ដែមិនមែនជាទ្រង់ទ្រាយធំ។ លើកនេះ យើងនឹងធ្វើយុទ្ធនាការធំតែម្ដង គឺជំរុញ និងលើកទឹកចិត្តឲ្យប្រជាពលរដ្ឋ យុវជន និងមន្ត្រីចូលរួមទាំងអស់គ្នាឲ្យផុសផុល ដើរសម្អាត និងរើសសំរាមតាមច្រាំងទន្លេដោយចាប់ផ្ដើមពីខាងមុខព្រះបរមរាជវាំង»។
លោកបានសំណូមពរដល់ក្រុមហ៊ុនឯកជននានាដែលទាញផលប្រយោជន៍ពីទឹកទន្លេ សូមចូលរួម ជាមួយសកម្មភាពសម្អាតសំរាមពីទន្លេទាំងនោះ។ លោកក៏សំណូមពរដល់រាជរដ្ឋាភិបាលគួរតែរឹតបន្តឹងការអនុវត្តច្បាប់ពាក់ព័ន្ធនឹងការគ្រប់គ្រងសំរាម ដោយត្រូវផាកពិន័យ ឬដាក់ទោសទណ្ឌចំពោះបុគ្គលណាដែលបោះចោលសំរាមពាសវាលពាសកាល៕