ភ្នំពេញៈ ក្រសួងទេសចរណ៍ បំផុសចលនាមហាជនជាថ្មីឲ្យចូលរួមថែរក្សាអនាម័យ និងវាយតម្លៃលើភោជនីយដ្ឋានស្អាត គ្មានសំរាមក្រោមតុ និងបង្គន់អនាម័យស្អាត តាមរយៈការប្រើប្រាស់កូនសៀវភៅ Green Passport ដែលអាចឲ្យពលរដ្ឋចូលរួមវាយតម្លៃលើភោជនីយដ្ឋានជិត ៤០០ កន្លែងទូទាំងប្រទេស ខណៈ កម្ពុជា នឹងរៀបចំទិវាជាតិទីក្រុងស្អាតលើកទី ៧ នៅសប្តាហ៍ក្រោយ។
តាមរយៈវីដេអូស្ប៉ត ដែលបានផ្សព្វផ្សាយកាលពីម្សិលមិញ នៅលើបណ្តាញសង្គមហ្វេសប៊ុករបស់ក្រសួងទេសចរណ៍ បានបង្ហាញថា យុទ្ធនាការ “ភោជនីយដ្ឋាន និងអាហារដ្ឋានទេសចរណ៍ស្អាត” តាមរយៈការប្រើប្រាស់កូនសៀវភៅ Green Passport ក្រោមពាក្យស្លោក «ទីក្រុងស្អាត៖ ទីក្រុងមានភោជនីយដ្ឋានស្អាតគ្មានសំរាមក្រោមតុ និងមានបង្គន់អនាម័យស្អាត» នេះ បានបើកឲ្យដាក់វាយតម្លៃតាំងពីចុងឆ្នាំមុន ដោយសាធារណជនទាំងអស់ អាចចូលរួមក្នុងយុទ្ធនាការនេះ ជាពិសេសការប្រើប្រាស់កូនសៀវភៅ (Green Passport) ដោយគ្រាន់តែចូលទៅកាន់គេហទំព័រ http://cleanrest.cambodiaecobusiness.org។
លោក គឹម សេរីរដ្ឋ ប្រធាននាយកដ្ឋានគ្រប់គ្រងសេវាកម្មស្នាក់នៅទេសចរណ៍និងម្ហូបអាហារ ប្រាប់ភ្នំពេញប៉ុស្តិ៍ពីម្សិលមិញថា ការបំផុសសា្មរតីដល់ពលរដ្ឋឲ្យចូលរួមវាយតម្លៃ តាមរយៈ Green Passport នេះ ព្រោះតែអត្រានៃអ្នកចូលរួម នៅមានចំនួនតិចតួច ដែលទាមទារឲ្យក្រសួង ត្រូវមានវិធានការផ្សព្វផ្សាយបន្ថែម។
លោកបន្តថា៖ «យុទ្ធនាការនេះ ក្នុងផែនការយើង បញ្ចប់និងគ្រោងប្រកាសនៅក្នុងអំឡុងខែមេសា ខាងមុខ តែចំនួននៃការចូលរួមវាមិនទាន់ច្រើនកុះករនៅឡើយទេ។ សព្វថ្ងៃនេះ ចំនួនអ្នកស្នើសុំ (Green Passport) មានតែជាង ៥ ពាន់នាក់ប៉ុណ្ណោះ មិនទាន់បានច្រើន ដូចអ្វីដែលក្រសួងចង់បាននោះទេ។ ក្រសួងចង់បាន គឺឲ្យវាសមាមាត្រទៅហ្នឹងចំនួនប្រជាជនជាង ១៧ លាននាក់ ដែលយ៉ាងហោចក៏មានពលរដ្ឋចូលរួមខ្ទង់លាននាក់ដែរ»។
បើតាមសេចក្តីណែនាំរបស់ក្រសួងទេចរណ៍ កូនសៀវភៅ Green Passport គឺជាកូនសៀវភៅមួយដែលអាចឲ្យអ្នក ធ្វើការវាយតម្លៃលើភោជនីយដ្ឋានប្រមាណជិត ៤០០ ក្នុងចំណោមភោជនីយដ្ឋានជាង ២ ពាន់ទូទាំងប្រទេស ដោយគ្រាន់តែយកវាជាប់តាមខ្លួន ដើម្បីស្នើសុំអាជីវកម្មភោជនីយដ្ឋាន ឬអាហារដ្ឋានទេសចរណ៍ ឲ្យបោះត្រាសម្គាល់ក្នុងទំព័រនោះ ខណៈមាត្រា ០២ ប្រភេទ ដែលប្រភេទទី១ «គ្មានសំរាមក្រោមតុ» សម្រាប់តែភោជនីយដ្ឋាន ឬអាហារដ្ឋានទេសចរណ៍ទាំងឡាយណាដែលគ្មានសំរាមនៅក្រៅធុង និងទី២ «បង្គន់អនាម័យស្អាត» សម្រាប់តែភោជនីយដ្ឋាន ឬអាហារដ្ឋានទេសចរណ៍ទាំងឡាយណាដែលមានបង្គន់អនាម័យស្អាត។
លោក គឹម សេរីរដ្ឋ និយាយថា៖ «ចំពោះលោកអ្នកដែលចូលរួមប្រើប្រាស់កូនសៀវភៅ Green Passport មានចំនួនបោះត្រា «គ្មានសំរាមក្រោមតុ» ឬ «បង្គន់អនាម័យស្អាត» ច្រើនជាងគេ នឹងទទួលបានលិខិតសរសើរ និងមេដាយ ជាពលរដ្ឋគំរូចូលរួមក្នុងយុទ្ធនាការ «ភោជនីយដ្ឋាន និងអាហារដ្ឋានទេសចរណ៍ស្អាត» ពីក្រសួងទេសចរណ៍ និងគណៈកម្មាធិការជាតិវាយតម្លៃទីក្រុងស្អាត នៅពេលយុទ្ធនាការនេះ ត្រូវបានបិទបញ្ចប់»។
ជំហានបន្ទាប់ លោកបានបញ្ជាក់ថា ក្រសួងនឹងព្យាយាមផ្សព្វផ្សាយឲ្យបានផុសផុលបន្ថែម និងបន្តយុទ្ធនាការតាមខេត្ត រួមទាំងធ្វើបច្ចុប្បន្នភាពនូវសៀវភៅនេះ ជាសៀវភៅអេឡិចត្រូនិក ថែមទាំងមានការលើកទឹកចិត្តដល់អ្នកចូលរួម តាមរយៈអត្ថប្រយោជន៍ផ្សេងៗ ដែលពួកគេនឹងទទួលបានសម្រាប់ការចូលរួមនេះ ខណៈនៅថ្ងៃទី ២៥ ខែកុម្ភៈ ឆ្នាំ ២០១៩ ខាងមុខនេះ ក្រសួងទេសចរណ៍ ក៏រៀបចំអបអរសាទរទិវាជាតិទីក្រុងស្អាតលើកទី ៧ ក្រោមប្រធានបទ «ទីក្រុងស្អាត៖ ទីក្រុងផ្តល់ភាពកក់ក្តៅ» ដែលមានការចូលរួមពីលោកនាយករដ្ឋមន្ត្រី ហ៊ុន សែន ផងដែរ។
បើតាមសារលិខិតរបស់លោកនាយករដ្ឋមន្ត្រី ហ៊ុន សែន ក្នុងឱកាសអបអរសាទរទិវាជាតិទីក្រុងស្អាតនេះ ព្រះរាជាណាចក្រកម្ពុជា ត្រូវប្រាកដថា យកចិត្តទុកដាក់ពីអនាម័យជុំវិញខ្លួន និងធានាឲ្យបាននូវភាពកក់ក្តៅយ៉ាងពិតប្រាកដសម្រាប់ការរស់នៅរបស់ពលរដ្ឋ និងភ្ញៀវទេសចរទាំងអស់៕