ភ្នំពេញៈ ក្រសួងទេសចរណ៍បានសហការជាមួយក្រសួងពាក់ព័ន្ធ កាត់បន្ថយនីតិវិធីមួយចំនួនជុំវិញការបំពេញបែបបទសម្រាប់ភ្ញៀវទេសចរ ដែលធ្វើដំណើរចេញ និងចូលកម្ពុជានៅតាមច្រកទ្វារព្រំដែនអន្តរជាតិនានាទូទាំងប្រទេស ដោយអះអាងថាការកាត់បន្ថយនេះ ដើម្បីជំរុញកំណើនភ្ញៀវទេសចរ ជាពិសេសភ្ញៀវទេសចរបរទេសតាមរយៈការកាត់បន្ថយរបាំងមិនចាំបាច់ និងភាពស្មុគស្មាញមួយចំនួន។
សេចក្តីជូនដំណឹងស្តីអំពីការសម្រួលការធ្វើដំណើររបស់ភ្ញៀវទេសចរ និងអ្នកដំណើរនៅតំបន់ច្រកទ្វារព្រំដែនអន្តរជាតិ និងច្រកទ្វារអន្តរជាតិទូទាំងប្រទេសរបស់ក្រសួងទេសចរណ៍ចេញផ្សាយកាលពីថ្ងៃអាទិត្យបានឲ្យដឹងថា ក្រសួងសាមីបានសហការជាមួយក្រសួងមហាផ្ទៃ (អគ្គនាយកដ្ឋានអន្តោប្រវេសន៍) ក្រសួងសេដ្ឋកិច្ច និងហិរញ្ញវត្ថុ (អគ្គនាយកដ្ឋានគយ និងរដ្ឋាករកម្ពុជា) ក្នុងការសម្រួលបែបបទនៃការធ្វើដំណើរមួយចំនួននេះ។
ក្រសួងអះអាងថា នីតិវិធីទាំងនោះរួមមានបែបបទនៃការបំពេញសលាកបត្រចូល ចេញ និងស្នើសុំទិដ្ឋាការពេលមកដល់ត្រូវបានបញ្ចូលគ្នាតែមួយសន្លឹក ដោយមានជាភាសាខ្មែរ ចិន និងអង់គ្លេស ហើយសម្រាប់ភ្ញៀវទេសចរ (បរទេស) គឺត្រូវបំពេញបែបបទចូលតែម្តងគត់ ហើយពេលត្រឡប់ចេញទៅវិញ មិនតម្រូវឲ្យបំពេញបែបបទទៀតទេ និងមិនត្រូវការរូបថតឡើយ។ ចំណែកចំពោះពលរដ្ឋខ្មែរដែលធ្វើដំណើរចេញ និងចូលប្រទេសដែលកាន់លិខិតឆ្លងដែនអេឡិចត្រូនិកខ្មែរមិនតម្រូវឲ្យបំពេញបែបបទទេ។
បន្ថែមពីនេះ ការបំពេញបែបបទចូល ចេញតាមច្រកទ្វារព្រំដែនអន្តរជាតិវិញ ក្រសួងបញ្ជាក់ថា ភ្ញៀវទេសចរដែលបើកបរដោយខ្លួនឯងមានបំណងចូលមកទស្សនាក្នុងប្រទេសកម្ពុជាដោយប្រើប្រាស់មធ្យោបាយធ្វើដំណើរផ្ទាល់ខ្លួន នាំចូលបណ្តោះអាសន្ន និងចេញទៅវិញតាមច្រកទ្វារព្រំដែនអន្តរជាតិនានាទូទាំងប្រទេសអាចបំពេញប្រតិវេទន៍គយសង្ខេប សម្រាប់មធ្យោបាយធ្វើដំណើរចូល-ចេញ បណ្តោះអាសន្នរបស់ភ្ញៀវទេសចរជាមួយមន្ត្រីគយច្រកទ្វារតែម្តង។ ក្នុងនោះក្រសួងបញ្ជាក់ដែរថា រាល់ភ្ញៀវទេសចរទាំងអស់មិនចាំបាច់បង់ប្រាក់និមុត្តិធានា (Deposit) និងថ្លៃធានារ៉ាប់រងឡើយ។
លោក ជុក ជំនោរ ប្រធាននាយកដ្ឋានអភិវឌ្ឍន៍ផលិតផលទេសចរណ៍នៃក្រសួងទេសចរណ៍បានប្រាប់ភ្នំពេញប៉ុស្តិ៍ បន្ថែមថា ការកំណត់បែបនេះគឺក្នុងគោលបំណងសម្រួលការចេញចូលភ្ញៀវទេសចរមកកាន់កម្ពុជាឲ្យកាន់តែមានភាពងាយស្រួលបន្ថែមទៀតដោយកុំឲ្យមានបញ្ហាស្មុគស្មាញច្រើនក្នុងការរារាំងដល់ការធ្វើដំណើរពួកគេមកកម្ពុជា។
ទោះយ៉ាងណាលោកអះអាងថាការកាត់បន្ថយនេះមិនមែនបានន័យថា មានការរិះគន់ ឬមានការអំពាវនាវជាអវិជ្ជមានណាមួយជុំវិញករណីនេះនោះទេ ដោយគ្រាន់តែជាផែនការក្នុងការទាក់ទាញភ្ញៀវទេសចរតែប៉ុណ្ណោះ។
លោកបញ្ជាក់ថា៖ «ក្រសួងទេសចរណ៍តែងតែសហការជាមួយសមត្ថកិច្ចពាក់ព័ន្ធនៅក្នុងការដាក់ចេញនូវគោលនយោបាយផ្សេងៗ ដើម្បីជំរុញកំណើនភ្ញៀវទេសចរ។ វាជាផ្នែកមួយព្រោះថាមិនមែនសុខៗចេះតែដាក់ចេញនូវវិធានការនេះទេ។ កន្លងមកក្រសួងទេសចរណ៍នៅក្នុងក្របខ័ណ្ឌគណៈកម្មការអន្តរក្រសួងសម្រួលការធ្វើដំណើរយើងតែងតែប្រជុំជាប្រចាំជាមួយវិស័យឯកជន និងអាជ្ញាធរពាក់ព័ន្ធ ដើម្បីដោះស្រាយនូវបញ្ហានានា ហើយការសម្រួលផ្នែកធ្វើដំណើរនេះគឺជាផ្នែកមួយដែលយើងត្រូវធ្វើបច្ចុប្បន្នភាព ដោយធ្វើយ៉ាងណាឲ្យការចេញចូលនៅតាមច្រកទ្វាអន្តរជាតិនានាកាន់តែមានភាពងាយស្រួល»។
លោក ជុក ជំនោរ ថ្លែងថាក្នុងរយៈពេល ៦ ខែដើមឆ្នាំនេះមានភ្ញៀវទេសចរជារួមជាង ៣ លាន ៦ សែននាក់បានចូលមកទស្សនាប្រទេសកម្ពុជា ដែលមានកំណើនជាង ១១ ភាគរយ បើធៀបរយៈពេលដូចគ្នាកាលពីឆ្នាំ ២០១៨ ខណៈនៅខេត្តសៀមរាប ភ្ញៀវទេសចរមានការធ្លាក់ចុះ ប៉ុន្តែភាគច្រើននៃភ្ញៀវទេសចរទាំងនោះបានចូលមកទស្សនានៅភ្នំពេញ និងតាមតំបន់ឆ្នេរ។
លោក John Coster វ័យ ៥៣ ឆ្នាំ ដែលធ្លាប់មានបទពិសោធមកកម្ពុជាចំនួន ៣ ដងមកហើយនោះ បានប្រាប់ភ្នំពេញប៉ុស្តិ៍ពីម្សិលមិញថាវាជារឿងល្អ បើរដ្ឋាភិបាលមួយនេះបានសម្រួលបញ្ហាទាំងអស់នេះឲ្យកាន់តែមានភាពងាយស្រួលជាងមុន បើទោះជាកន្លងទៅលោកគិតថា ការបំពេញសលាកបត្រចូល ចេញ និងស្នើសុំទិដ្ឋាការមកកម្ពុជាមិនពិបាកពេកនោះទេ។ ប៉ុន្តែលោកថាលោកក៏ត្រូវចំណាយពេលយូរផងដែរ គឺក្នុងចន្លោះពី ១៥ ទៅ ៤០ នាទីនៅតាមច្រកទ្វារនីមួយៗ។
លោកមានបំណងមកទស្សនាកម្ពុជាម្តងទៀតនៅឆ្នាំក្រោយដោយបានបញ្ជាក់ថា៖ «ខ្ញុំធ្លាប់មកកម្សាន្តនៅប្រទេស កម្ពុជា ចំនួន ៣ ដង។ ពេលខ្ញុំមកម្តងៗ ខ្ញុំតែងតែបំពេញសលាកបត្រចូល ចេញនេះនៅពេលខ្ញុំកំពុងនៅលើយន្តហោះដោយត្រូវចំណាយពេលបំពេញប្រហែល ១០ នាទី។ អ្វីដែលសំខាន់នៅក្នុងក្រដាសសលាកបត្រចូល ចេញគឺត្រូវឲ្យយើងបំពេញអាសយដ្ឋានជាកន្លែងដែលខ្ញុំត្រូវស្នាក់នៅក្នុងអំឡុងពេលខ្ញុំមកទស្សនានៅកម្ពុជា»។
លោក ហូ វណ្ឌី ទីប្រឹក្សាសមាគមទីភ្នាក់ងារទេសចរណ៍កម្ពុជាបាននិយាយថា វិធានការនេះជាការរួមចំណែកតិចតួចបំផុតក្នុងការជំរុញកំណើនភ្ញៀវទេសចរមកកម្ពុជា បើទោះជាវាពិតជាបានចូលរួមចំណែកកាត់បន្ថយភាពស្មុគស្មាញជាច្រើននៅតាមច្រកទ្វារព្រំដែនអន្តរជាតិនានាទូទាំងប្រទេសក៏ដោយ។ ជាមួយនឹងវិធានការនេះលោកបែរជាស្នើឲ្យក្រសួងក៏ដូចជារដ្ឋាភិបាលគួរលើកលែងការស្នើសុំទិដ្ឋាការសម្រាប់ភ្ញៀវបរទេស ដែលមានសក្ដានុពលខ្លាំងសម្រាប់កម្ពុជាដើម្បីចូលរួមបង្កើនកំណើនភ្ញៀវទេសចរនេះ។
លោកថ្លែងថា៖ «យើងចង់ស្នើនោះគឺការលើកលែងការស្នើសុំទិដ្ឋាការសម្រាប់ភ្ញៀវបរទេស ព្រោះប្រទេសដែលមានភ្ញៀវទេសចរច្រើនៗគេបានធ្វើហើយ» ៕