.jpg)
កំណាត់ផ្លូវនៅស្រុកថ្ពងខេត្តកំពង់ស្ពឺត្រូវទឹកលិច។ រូបថត ក្រសួងធនធានទឹក
ភ្នំពេញៈ ក្រសួងធនធានទឹក និងឧតុនិយមបានព្រមានជាថ្មីម្ដងទៀតអំពីជំនន់ទឹកភ្លៀង ដែលអាចនឹងកើតឡើងនាចុងសប្ដាហ៍នេះក្នុងតំបន់វាលទំនាបជាប់ផ្លូវទឹក ជើងភ្នំ និងខ្ពង់រាប ដែលជាតំបន់ផ្ទៃរងទឹកភ្លៀង។ ស្ថិតក្នុងស្ថានភាពនេះ ក្រសួងអំពាវនាវឲ្យពលរដ្ឋរស់នៅក្នុងតំបន់ងាយរងគ្រោះដោយជំនន់ទឹកភ្លៀងត្រូវបង្កើនការប្រុងប្រយ័ត្នខ្ពស់ ដើម្បីចៀសវាងគ្រោះថ្នាក់។
យោងតាមសេចក្តីជូនដំណឹងស្ដីពីស្ថានភាពអាកាសធាតុ ដែលបានចេញផ្សាយកាលពីព្រឹកថ្ងៃអង្គារ ក្រសួងធនធានទឹក និងឧតុនិយមគូសបញ្ជាក់ថា ចាប់ពីថ្ងៃទី ៣០ ខែកញ្ញា ដល់ថ្ងៃទី ៦ ខែតុលា ប្រព័ន្ធសម្ពាធទាបនឹងបន្តអូសបន្លាយឆ្លងកាត់លើកម្ពុជា ដោយភ្ជាប់ជាមួយសម្ពាធទាបមួយនៅលើសមុទ្រចិនខាងត្បូង។
ស្ថានភាពបែបនេះនឹងធ្វើឱ្យមានភ្លៀងធ្លាក់រាយប៉ាយគ្របដណ្ដប់លើផ្ទៃប្រទេសក្នុងកម្រិតពីមធ្យមទៅខ្លាំងដែលអាច «បង្កជាជំនន់ទឹកភ្លៀង» ជាពិសេសនៅតំបន់វាលទំនាបកណ្ដាល ជួរភ្នំ និងខ្ពង់រាប ភាគពាយព្យ និងឦសាន។ ចំណែកក្នុងលម្ហសមុទ្រនឹងមានរលកធំខ្ពស់ៗ និងមានខ្យល់កន្ត្រាក់បក់បោកខ្លាំង។
ជាមួយគ្នានេះក្រសួងបានអំពាវនាវដល់ប្រជាពលរដ្ឋ ដែលរស់នៅក្នុងតំបន់ងាយរងគ្រោះដោយជំនន់ទឹកភ្លៀងនាពេលកន្លងមក បង្កើនការប្រុងប្រយ័ត្នខ្ពស់ និងត្រៀមលក្ខណៈជាមុន ដើម្បីចៀសវាងគ្រោះថ្នាក់ដែលបង្កឡើងដោយជំនន់ទឹកភ្លៀង និងខ្យល់កន្ត្រាក់ដែលអាចកើតមានក្នុងពេលដ៏ខ្លីខាងមុខនេះ។
ការព្រមានអំពីស្ថានភាពអាកាសធាតុរបស់ក្រសួងធនធានទឹកបានធ្វើឱ្យអាជ្ញាធរ និងប្រជាពលរដ្ឋនៃបណ្ដាខេត្តដែលងាយរងគ្រោះ ដោយជំនន់ទឹកភ្លៀងនាពេលកន្លងមកថ្មីៗនេះ បង្កើនការប្រុងប្រយ័ត្ន និងឃ្លាំមើលអំពីស្ថានភាពនៃកម្ពស់ទឹកនៅតាមដងអូរ ស្ទឹង និងប្រព័ន្ធដៃទន្លេ ដែលស្ថិតនៅក្បែរសហគមន៍របស់ពួកគេ។
លោក សែស វិបុល អធិការស្រុកអូរជ្រៅ ខេត្តបន្ទាយមានជ័យបានប្រាប់ភ្នំពេញប៉ុស្តិ៍ពីម្សិលមិញថា ទឹកនៅតាមអូរព្រំដែនជាប់ព្រំប្រទល់ប្រទេសថៃ បានហក់ឡើងជាថ្មីម្ដងទៀត ធ្វើឱ្យភូមិអូរបីជាន់ដែលទើបនឹងស្រកចុះបន្តិចកាលពី ៣ ថ្ងៃមុនបានជន់លិចជាថ្មី។ ប៉ុន្តែមិនមានពលរដ្ឋណាម្នាក់រងគ្រោះថ្នាក់ពីជំនន់ទឹកភ្លៀងក្នុងតំបន់អូរព្រំដែននេះទេ។
លោក វិបុល ថ្លែងថា៖ «នៅពេលនេះភ្លៀងបានចាប់ផ្ដើមធ្លាក់ទៀតហើយ ប៉ុន្តែមិនខ្លាំងទេ តែទឹកនៅតាមអូរព្រំដែនបានស្ទុះងើបឡើងវិញ។ ទំនងជាមានភ្លៀងធ្លាក់ខ្លាំងនៅក្នុងទឹកដីថៃ ហើយទឹកបានហូរចាក់ពីផ្នែកខាងលើចូលមកក្នុងអូរព្រំដែន»។
បើតាមលោក វិបុល កាលពីពេលថ្មីៗកន្លងមកនេះអាជ្ញាធរស្រុកអូរជ្រៅបានជម្លៀសប្រជាពលរដ្ឋ ១៩០ គ្រួសារ ដែលរស់នៅក្នុងភូមិអូរបីជាន់ ឃុំអូរបីជាន់ ទៅកាន់ទីទួលសុវត្ថិភាព ក្រោយពីមានជំនន់ទឹកភ្លៀង និងទឹកហូរចាក់ពីប្រទេសថៃតាមអូរព្រំដែន។ រហូតមកទល់ពេលនេះ ពលរដ្ឋប្រមាណជាង ៦០ គ្រួសារទៀត នៅមិនទាន់បានត្រឡប់ទៅកាន់លំនៅឋានរបស់ពួកគេវិញទេ ខណៈទឹកបានជន់ឡើងជាថ្មី។
ចំណែកលោក រត្ន ដាស៊ីណង់ អភិបាលស្រុកមង្គលបុរីបាននិយាយថា ទឹកនៅតាមប្រព័ន្ធដៃស្ទឹងនានាក្នុងស្រុកមង្គលបុរីបានជន់ឡើងបន្តិច ប៉ុន្តែមិនទាន់ពេញប្រៀបនៅឡើយទេ បើទោះជាមានតំបន់ខ្លះមានការជន់លិចវាលស្រែមួយចំនួនក្ដី។
លោក ដាស៊ីណង់ ដែលទើបដឹកនាំមន្ត្រី និងកងទ័ពចុះជួយច្រូតស្រូវជូនប្រជាពលរដ្ឋក្នុងឃុំរហាត់ទឹកក្នុងរយៈពេល ២ ថ្ងៃជាប់គ្នាមកនេះបានបន្តថា៖ «នៅពេលនេះប្រជាកសិករកំពុងប្រញឹកដៃជើង ធ្វើការដាំដុះស្រូវរដូវវស្សាជំហានទី ២ ដែលគិតមកទល់ពេលនេះបានសម្រេច ១ ម៉ឺនហិកតា លើសពីផែនការដាំដុះ ៤ ០០០ ហិកតា។ នេះជាអ្វីដែលយើងកំពុងបារម្ភអំពីការខ្វះទឹកស្រោចស្រព ខណៈទឹកភ្លៀងអាចនឹងអស់នៅចុងខែតុលាខាងមុខនេះ»។
ជុំវិញក្ដីព្រួយកង្វល់នេះលោក ឃុន សុខា អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយបានអំពាវនាវដល់ប្រជាកសិករ និងអាជ្ញាធរពាក់ព័ន្ធ គប្បីរៀបចំប្រព័ន្ធទឹកបិទ ដើម្បីរក្សាទឹកទុកឱ្យបានគ្រប់គ្រាន់ សម្រាប់ប្រើប្រាស់នៅក្នុងរដូវប្រាំងដែលខ្វះទឹក។
លោកថ្លែងថា៖ «នៅពេលនេះភ្លៀងបានធ្លាក់រាយប៉ាយគ្របដណ្តប់លើផ្ទៃប្រទេស ប៉ុន្តែទឹកទន្លេ និងតាមប្រព័ន្ធដៃទន្លេ ស្ទឹងបឹងបួមួយចំនួន ទឹកនៅមិនទាន់ជន់ឡើងដល់ពាក់កណ្ដាលផង។ ដូច្នេះយើងគប្បីរៀបចំរក្សាទឹកភ្លៀង ដែលកំពុងមាននេះទុកដាក់ឱ្យបានល្អ សម្រាប់ប្រើប្រាស់ពេលខ្វះទឹក»៕
វីដេអូ៖
