ភ្នំពេញ៖ ក្រសួងធនធានទឹក និងឧតុនិយម នៅថ្ងៃទី ២០ ខែមេសានេះ បានអំពាវនាវជាថ្មីម្ដងទៀតដល់ប្រជាពលរដ្ឋដែលរស់នៅក្នុងតំបន់វាលទំនាបកណ្ដាល និងតំបន់ឆ្នេរ ឱ្យបង្កើនការប្រុងប្រយ័ត្ន ចំពោះបាតុភូតភ្លៀងលាយឡំខ្យល់កន្ត្រាក់ ផ្គររន្ទះ និងរលកសមុទ្រ ខណៈជ្រលងសម្ពាធទាបឥណ្ឌាកំពុងបង្កើនឥទ្ធិពលគ្របដណ្ដប់លើប្រទេសកម្ពុជា ជាមួយនឹងខ្យល់បោកបក់មកពីភាគខាងត្បូង និងអាគ្នេយ៍។
តាមរយៈការពិនិត្យអង្កេតអំពីការវិវត្តន៍នៃស្ថានភាពអាកាសធាតុនេះ ក្រុមជំនាញការផ្នែកអាកាសធាតុនៃក្រសួងធនធានទឹក និងឧតុនិយម បានព្យាករណ៍ថា ចាប់ពីថ្ងៃទី ២១-២៧ ខែមេសា នឹងមានភ្លៀងធ្លាក់គ្របដណ្ដប់លើផ្ទៃប្រទេសក្នុងកម្រិតពីតិចទៅច្រើន ជាពិសេសបណ្ដាខេត្តដែលស្ថិតនៅក្នុងតំបន់វាលទំនាបកណ្ដាលភាគខាងត្បូង និងពាយ័ព្យនៃប្រទេសកម្ពុជា។
លោក ចាន់ យុត្ថា អ្នកនាំពាក្យក្រសួងធនធានទឹក និងឧតុនិយម បានប្រាប់ ភ្នំពេញ ប៉ុស្តិ៍ថា៖ «បាតុភូតខ្យល់កន្ត្រាក់ និងផ្គររន្ទះនឹងកើតមានកាន់តែច្រើនផងដែរ នៅក្នុងរយៈពេលនេះ ដូច្នេះសូមបងប្អូនប្រជាពលរដ្ឋបង្កើនការប្រុងប្រយ័ត្ន។ ពិសេសអ្នករស់នៅតំបន់ទំនាបកណ្ដាល និងតំបន់ឆ្នេរសមុទ្រ»។
បើតាមលោក ចាន់ យុត្ថា អ្នកនេសាទសមុទ្រគប្បីកុំចេញទូកនេសាទ ព្រោះអាចប្រឈមនឹងខ្យល់កន្ត្រាក់ រួមនឹងរលកសមុទ្រធំៗ ដែលមានកម្ពស់ចន្លោះពី ១,៥ ម៉ែត្រ ទៅ ២ ម៉ែត្រ ដែលអាចបង្កគ្រោះថ្នាក់កើតឡើងជាយថាហេតុ។
លោក កែវ វី ទីប្រឹក្សាជាន់ខ្ពស់នៃគណៈកម្មាធិការជាតិគ្រប់គ្រងគ្រោះមហន្តរាយបានប្រាប់ ភ្នំពេញ ប៉ុស្តិ៍ នៅមុននេះបន្តិចថា ក្នុងរយៈពេល ២០ ថ្ងៃ នៃខែមេសា ឆ្នាំ ២០២១ នេះ មានពលរដ្ឋជាង ២០ នាក់ បានស្លាប់ និងរងរបួសដោយសារបាតុភូតទាំងនេះ។
លោកបានថ្លែងថា នៅក្នុងខែមេសានេះ បាតុភូតភ្លៀងលាយឡំខ្យល់កន្ត្រាក់ និងផ្គររន្ទះ បានកើតឡើង ២៥ លើក នៅក្នុងបណ្ដាខេត្តចំនួន ១៣ រួមមាន ខេត្តកណ្ដាល, តាកែវ, ស្វាយរៀង, មណ្ឌលគិរី, កំពង់ឆ្នាំង, ពោធិ៍សាត់, បាត់ដំបង, បន្ទាយមានជ័យ, សៀមរាប, ឧត្តរមានជ័យ, ព្រះវិហារ, កោះកុង និង ប៉ៃលិន។
លោកបានបញ្ជាក់ថា៖ «ភ្លៀងលាយឡំខ្យល់កន្ត្រាក់ បានបង្កឲ្យពលរដ្ឋម្នាក់ស្លាប់ និង ៥ នាក់ទៀតរងរបួស។ បង្កការខូចខាតផ្ទះប្រជាពលរដ្ឋ ៥៤២ ខ្នង របើកដំបូលផ្សារចំនួន ២ ប៉ះពាល់តូបលក់ដូរសរុប ជាង ២០០ តូប ព្រមទាំងដួលរលំឃ្លាំងស្តុកកសិផល ១ រោងម៉ាស៊ីនកិនស្រូវ ១ អគាររោងចក្រ ១ អង់តែនវិទ្យុទាក់ទងនគរបាល ១ និង អគាររដ្ឋបាលសាធារណៈមួយចំនួនទៀត»។
លោកបានបន្ថែមថា៖ «ចំណែកបាតុភូតរន្ទះបាញ់វិញ បានបង្កឲ្យមនុស្ស ១២ នាក់ស្លាប់ និងរងរបួស ៣ នាក់ ព្រមទាំងងាប់គោចំនួន ៣ ក្បាល»៕