.jpg)
ទឹកជំនន់ស្ថិតនៅសង្កាត់និរោធ ខណ្ឌច្បារអំពៅ កាលពីឆ្នាំ ២០១៦។ ហេង ជីវ័ន
ភ្នំពេញៈ ក្រសួងធនធានទឹក និងឧតុនិយមបានអំពាវនាវដល់ប្រជាពលរដ្ឋ ដែលរស់នៅតាមតំបន់វាលទំនាបជាប់ជួរភ្នំ និងប្រព័ន្ធផ្លូវទឹកនានា បង្កើនការប្រុងប្រយ័ត្នចំពោះជំនន់ទឹកភ្លៀងដែលអាចនឹងកើតមានក្នុងរយៈពេលដ៏ខ្លីខាងមុខនេះ។
យោងសេចក្ដីជូនដំណឹងរបស់ក្រសួងធនធានទឹក និងឧតុនិយមស្ដីពី «ស្ថានភាពធាតុអាកាសនៃប្រទេសកម្ពុជា» ចុះថ្ងៃទី ២៨ ខែ កក្កដា ឆ្នាំ ២០២០ បញ្ជាក់ថា ខ្យល់មូសុងនិរតីកំពុងបក់ក្នុងកម្រិតបង្គួរមកលើប្រទេសកម្ពុជា ខណៈប្រព័ន្ធសម្ពាធទាបដែលកំពុងបន្តអូសបន្លាយគ្របដណ្ដប់លើប្រទេសថៃ ឡាវ និងវៀតណាម បានធ្វើឲ្យស្ថានភាពអាកាសធាតុក្នុងប្រទេសកម្ពុជា មានការប្រែប្រួលគួរឲ្យកត់សម្គាល់។
ស្ថិតក្នុងស្ថានភាពនេះ បណ្ដាខេត្តនៅតំបន់វាលទំនាបកណ្តាល តំបន់ជួរភ្នំដងរែក និងតំបន់ខ្ពង់រាបឦសាននឹងអាចមានភ្លៀងធ្លាក់រាយប៉ាយក្នុងកម្រិតពីមធ្យមទៅបង្គួរក្នុងនោះក៏មានផ្នែកខ្លះអាចមានភ្លៀងធ្លាក់ច្រើន។ ចំណែកបណ្តាខេត្តនៅតំបន់មាត់សមុទ្រនឹងអាចមានភ្លៀងធ្លាក់រាយប៉ាយនៅក្នុងកម្រិតពីតិចទៅបង្គួរ ។
ក្រសួងធនធានទឹក និងឧតុនិយមគូសបញ្ជាក់ថា៖ «ចាប់ពីថ្ងៃទី ៣១ ខែកក្កដា ដល់ថ្ងៃទី ៤ ខែសីហា ខាងមុខនេះ ផ្នែកខ្លះនៃបណ្តាខេត្តនៅទីទំនាបជាប់ជួរភ្នំ និងផ្លូវទឹកអាចនឹងមានជំនន់ទឹកភ្លៀងកើតឡើង។ ជាមួយគ្នានេះបាតុភូតផ្គររន្ទះ និងខ្យល់កន្ត្រាក់អាចនឹងកើតមានច្រើនផងដែរ ក្នុងអំឡុងពេលមានភ្លៀងធ្លាក់»។
តាមរយៈការព្យាករនេះ ប្រជាកសិកររស់នៅក្នុងតំបន់ទាំងនេះគប្បីត្រូវរួសរាន់ប្រមូលកសិផលរបស់ខ្លួនឲ្យបានទាន់ពេលវេលា ចៀសវាងរងការលិចលង់ ដោយជំនន់ទឹកភ្លៀងដែលនាំឲ្យប៉ះពាល់ដល់សេដ្ឋកិច្ចគ្រួសារ។
បើតាមក្រសួងធនធានទឹកខេត្តនៃតំបន់ឆ្នេរសមុទ្រកម្ពុជាដូចជា ខេត្តព្រះសីហនុ កោះកុង កំពត និងខេត្តកែបចាប់ពីថ្ងៃទី ១-៣ ខែសីហា ខាងមុខ នឹងមានភ្លៀងធ្លាក់ច្រើន ហើយលើផ្ទៃសមុទ្រមានរលកសមុទ្រធំៗ និងខ្យល់បក់បោកខ្លាំង។ ក្នុងស្ថានភាពនេះ ប្រជានេសាទក៏ដូចជាអ្នកធ្វើដំណើរកម្សាន្តតាមប្រជុំកោះនានានៃខេត្តជាប់មាត់សមុទ្រ គប្បីផ្អាកសកម្មភាពជាបណ្ដោះអាសន្ន ដើម្បីចៀសវាងគ្រោះថ្នាក់កើតឡើងជាយថាហេតុ៕
វីដេអូ៖
