.jpg)
ក្រសួងធនធានទឹក និងឧតុនិយម ព្រមានពីព័ត៌មានមិនពិត ពីការព្យាករណ៍អាកាសធាតុ។ រូបថត ក្រសួងធនធានទឹក និងឧតុនិយម
ភ្នំពេញ៖ ក្រសួងធនធានទឹក និងឧតុនិយម នៅថ្ងៃទី ១០ ឧសភា បានច្រានចោលការផ្សព្វផ្សាយព័ត៌មានពីស្ថានភាពអាកាសធាតុនៅកម្ពុជារបស់គណនីហ្វេសប៊ុកមួយដែលមានឈ្មោះថា Cambodia Weather Service និងបានព្រមានចាត់វិធានការច្បាប់ប្រឆាំងនឹងគណនីមួយនេះ។
ការប្រកាសច្រានចោលនូវរាល់ព័ត៌មានស្ដីពីស្ថានភាពអាកាសធាតុរបស់ទំព័រហ្វេសប៊ុកខាងលើនេះ បានធ្វើឡើងបន្ទាប់ពីក្រសួងពិនិត្យឃើញថា រាល់ព័ត៌មានស្ដីពីស្ថានភាពអាកាសធាតុនៅកម្ពុជា ដែលចេញផ្សាយ ឬបង្ហោះតាម ទំព័រហ្វេសប៊ុក ឈ្មោះ Cambodia Weather Service នោះ មានភាពលម្អៀងច្រើនទៅនឹងស្ថានភាពអាកាសធាតុជាក់ស្ដែង ដែលកំពុងកើតមាននៅក្នុងប្រទេសកម្ពុជា។
តាមរយៈសេចក្ដីប្រកាសព័ត៌មាននោះ គឺមានតែក្រសួងធនធានទឹក និងឧតុនិយមតែ ១ គត់ ដែលជាស្ថាប័នរដ្ឋចេញផ្សាយនូវសេចក្ដីជូនដំណឹង ឬសេចក្ដីប្រកាសព័ត៌មានអំពីស្ថានភាពអាកាសធាតុទូទៅ ក៏ដូចជាស្ថានភាពទឹកជំនន់ទន្លេមេគង្គនៅកម្ពុជា ប្រកបដោយសុក្រិត្យភាព ដោយបង្ហោះតាមផេកផ្លូវការរបស់ក្រសួងដែលមានឈ្មោះថា «ក្រសួងធនធានទឹក និងឧតុនិយម Ministry of Water Resource and Meteorology»។
ក្រសួងធនធានទឹកបញ្ជាក់ថា៖ «តាមរយៈការផ្សព្វផ្សាយព័ត៌មានអាកាសធាតុដែលមិនមែនជាស្ថាប័នទទួលខុសត្រូវរបស់រាជរដ្ឋាភិបាល ក្រសួងធនធានទឹក និងឧតុនិយម សូមច្រានចោលទាំងស្រុង និងមិនទទួលខុសត្រូវនោះឡើយ និងចាត់ទុកថា ជាចេតនាមួយរបស់ជនអនាមិកក្នុងការបង្កឲ្យមានការយល់ខុស លើស្ថានភាពអាកាសធាតុជាក់ស្តែងនៅក្នុងប្រទេសកម្ពុជា»។
ក្រសួងក៏បានអំពាវនាវដល់គ្រប់មជ្ឈដ្ឋានប្រជាពលរដ្ឋទាំងអស់ កុំមានការភាន់ច្រឡំ ឬផ្ដោតការយកចិត្តទុកដាក់ទៅលើការផ្សព្វផ្សាយនូវព័ត៌មានមិនពិតស្ដីពីស្ថានភាពអាកាសធាតុ និងជំនន់ទឹកភ្លៀង ឬជំនន់ទន្លេមេគង្គនៅប្រទេសកម្ពុជា ដោយក្រុមជនអនាមិកមួយចំនួននៅលើផេក ឬគណនីហ្វេសប៊ុកណាមួយដែលមិនមែនជារបស់រដ្ឋ។
ជាមួយគ្នានេះ ក្រសួងធនធានទឹកក៏បានព្រមានចាត់វិធានការផ្លូវច្បាប់ចំពោះបុគ្គលទាំងឡាយណា ដែលនៅតែបន្តការបង្ហោះផ្សព្វផ្សាយព័ត៌មានស្តីពីស្ថានភាពអាកាសធាតុមិនពិតនេះ ក្នុងបំណងទុច្ចរិតណាមួយ ដើម្បីទាក់ទាញចំណាប់អារម្មណ៍ ឬដើម្បីបំភាន់មតិសាធារណជន។
ជុំវិញករណីនេះ Cambodia Weather Service បានចេញសេចក្ដីជូនដំណឹងមួយប្រាប់មហាជនថា Page នេះជា Page ឯកជនសុទ្ធសាធ។ ឯការចុះផ្សាយរបស់ខ្លួន គឺក្នុងគោលបំណងចែករំលែកចំណេះដឹង និងព័ត៌មានទាក់ទងនឹងស្ថានភាពអាកាសធាតុនៅប្រទេសកម្ពុជា ប៉ុណ្ណោះ។
កាលពីរសៀលថ្ងៃទី ៦ ខែឧសភា Cambodia Weather Service បានបង្ហោះព័ត៌មានមួយស្ដីពីការព្រមានអំពីជំនន់ទឹកភ្លៀង (Flood Flash warning) ក្នុងតំបន់រាជធានីភ្នំពេញ និងខេត្តកណ្ដាល។
តាមការផ្សព្វផ្សាយនោះថា រាជធានី-ខេត្តទាំង ២ នេះ នឹងមានភ្លៀងធ្លាក់ខ្លាំង លាយឡំនឹងគំនួចខ្យល់ដែលមានផ្គររន្ទះ (downpour and Supercell) ដែលអាចបង្កឲ្យមានជំនន់ទឹកភ្លៀង កើតឡើងក្នុងកម្រិតតិចតួច នៅតាមបណ្ដាស្រុក-ខណ្ឌ មួយចំនួន ដែលស្ថិតក្នុងតំបន់ទីទំនាប៕
