ភ្នំពេញៈ ក្រសួងធនធានទឹក និងឧតុនិយមនៅថ្ងៃម្សិលមិញ បានអំពាវនាវឱ្យប្រជាពលរដ្ឋដែលរស់នៅអមសងខាងទន្លេសេកុង សេសាន និងទន្លេស្រែពក ក្នុងភូមិសាស្ត្រខេត្តស្ទឹងត្រែងបង្កើនការប្រុងប្រយ័ត្នបន្ថែមទៀត ចំពោះគ្រោះទឹកជំនន់ដែលបង្កឡើងពីទឹកទន្លេទាំង ៣ នេះ។
សេចក្ដីអំពាវនាវនេះបានធ្វើឡើងបន្ទាប់ពីពិនិត្យឃើញស្ថានភាពកម្ពស់ទឹកទន្លេទាំង ៣ ខាងលើនេះមានការហក់ឡើងជាបន្តបន្ទាប់ ក្រោយពីឥទ្ធិពលព្យុះលីនហ្វា (Linfa) និងប្រព័ន្ធវិសម្ពាធទាប (ITCZ) បានធ្វើឱ្យមានភ្លៀងធ្លាក់ខ្លាំងជាច្រើនថ្ងៃជាប់ៗគ្នា បង្កជាជំនន់ទឹកភ្លៀងនៅក្នុងផ្នែកខ្លះនៃតំបន់វាលទំនាបជាប់ផ្លូវទឹក និងក្នុងតំបន់ផ្ទៃរងទឹកភ្លៀងនៃបណ្ដាខេត្តមួយចំនួននៅក្នុងប្រទេសកម្ពុជា។
ក្រសួងបានប្រកាសថា៖ «ឥទ្ធិពលទាំង ២ នេះកំពុងជំរុញឱ្យកម្ពស់ទឹកទន្លេសេកុង សេសាន និងទន្លេស្រែពក ក្នុងខេត្តស្ទឹងត្រែងស្ទុះងើបឡើងយ៉ាងឆាប់រហ័សដែលនឹងអាចបង្កជាជំនន់ជន់លិចនៅផ្នែកខ្លះបន្ថែមទៀតក្នុងតំបន់វាលទំនាបជាប់ផ្លូវទឹក និងខ្ពង់រាបនៃខេត្តនេះ»។
ជាមួយនឹងការកើនឡើងនៃកម្ពស់ទឹកទន្លេទាំង ៣ នេះ និង របាយទឹកភ្លៀងដែលបានធ្លាក់នៅក្នុងតំបន់ផ្ទៃរងទឹកភ្លៀងនៃអាងទន្លេមេគង្គផ្នែកខាងលើក៏បានជំរុញឱ្យកម្ពស់ទឹកទន្លេមេគង្គនៅខេត្តស្ទឹងត្រែង ក្រចេះ និង កំពង់ចាម មានការហក់ឡើងមួយកម្រិតផងដែរ ប៉ុន្តែសម្ទុះនៃការហក់ឡើងនេះ គឺស្ថិតនៅទាបជាងកម្រិតកម្ពស់ឱ្យមានការប្រុងប្រយ័ត្ននៅឡើយ។
ទោះយ៉ាងណាក៏ដោយក្រសួងធនធានទឹក និងឧតុនិយមបានជំរុញឱ្យក្រសួងស្ថាប័នពាក់ព័ន្ធ អាជ្ញាធរដែនដីគ្រប់លំដាប់ថ្នាក់ និងសាធារណជន ជាពិសេសប្រជាពលរដ្ឋដែលរស់នៅអមសងខាងទន្លេសេកុង សេសាន និងទន្លេស្រែពក បង្កើនការប្រុងប្រយ័ត្នខ្ពស់ និងតាមដានជាប្រចាំអំពីស្ថានភាពនៃកម្ពស់ទឹកក្នុងទន្លេទាំង ៣ នេះ ដើម្បីបង្ការ និងកាត់បន្ថយនូវហានិភ័យផ្សេងៗនៅក្នុងសហគមន៍មូលដ្ឋាន។ ចំពោះបណ្ដាខេត្តដែលមានទំនាក់ទំនងនឹងរបបទឹកទន្លេត្រូវមានវិធានការបើកទ្វារទឹក ដើម្បីបញ្ចូលទៅតាមព្រែក បណ្ដាអាងទឹកនានា និងតំបន់ទំនាប។
ជុំវិញករណីនេះលោក ម៉ែន គុង អ្នកនាំពាក្យសាលាខេត្តស្ទឹងត្រែងបានប្រាប់ភ្នំពេញប៉ុស្តិ៍ថា កម្ពស់ទឹកទន្លេសេកុង គិតត្រឹមវេលាម៉ោង ១០ ព្រឹកថ្ងៃទី ១២ ខែតុលា ឆ្នាំ ២០២០ បានហក់ឡើងដល់ ១០,៥២ ម៉ែត្រ ប្រកៀកនឹងកម្រិតកម្ពស់ដែលត្រូវប្រកាសអាសន្ន ១១,៥០ ម៉ែត្រ ខណៈកម្ពស់ទឹកទន្លេមេគង្គនៅស្ថានីយស្ទឹងត្រែងបានហក់ឡើងដល់ ៧,១៥ ម៉ែត្រ គឺទាបជាងកម្រិតកម្ពស់ប្រកាសអាសន្នរហូតដល់ ៤,៥៥ ម៉ែត្រ។
លោកថ្លែងថា៖ «ថ្វីបើកម្ពស់ទឹកទន្លេសេកុង និងទឹកទន្លេមេគង្គ នៅមិនទាន់ហក់ឡើងដល់កម្រិតប្រកាសអាសន្ន ប៉ុន្តែភ្លៀងធ្លាក់ខ្លាំងជាប់ៗគ្នាជាច្រើនថ្ងៃមកនេះបានបង្កជាជំនន់ទឹកភ្លៀង ជន់លិចផ្ទះប្រជាពលរដ្ឋជាង ១០០០ គ្រួសារនៅក្នុងឃុំចំនួន ៥ នៃស្រុកថាឡាបរិវ៉ាត់។ ខណៈនេះអាជ្ញាធរយើងកំពុងចុះអន្តរាគមន៍ជួយដល់ប្រជាពលរដ្ឋក្នុងតំបន់រងគ្រោះ»។
ចំណែកលោក វ៉ី សំណាង អភិបាលខេត្តកំពង់ស្ពឺបានប្រាប់ភ្នំពេញប៉ុស្តិ៍ថា ជំនន់ទឹកភ្លៀង និងទឹកដែលហូរចាក់ពីភ្នំ និងប្រព័ន្ធអូរ និងស្ទឹងមួយចំនួន បានធ្វើឱ្យច្រោះបាក់ខ្នងទំនប់ស្ទាក់មួយកន្លែងស្ថិតក្នុងភូមិសាស្ត្រភូមិថ្នល់បត់ ឃុំអមលាំង ស្រុកថ្ពងកាលពីយប់ថ្ងៃអាទិត្យ។
លោកថ្លែងថា៖ «ការបាក់ធ្លាយទំនប់ស្ទាក់ទឹកនេះបានបង្កការលិចលង់ផ្ទះប្រជាពលរដ្ឋចំនួន ១៧០ គ្រួសារក្នុងនោះផ្ទះ ១១ ខ្នងបានខូចខាតទាំងស្រុង ដោយសារទឹកហូរបុក។ ប៉ុន្តែមិនប៉ះពាល់ដល់អាយុជីវិតប្រជាពលរដ្ឋណាម្នាក់ឡើយ»។
ដោយពិនិត្យឃើញស្ថានភាពនៃកម្ពស់ទឹកនៅក្នុងអាងស្តុកទឹក និងស្ទឹងមួយចំនួននៅក្នុងខេត្តនេះទឹកបានហក់ឡើងជាបន្តបន្ទាប់នោះ លោក សំណាង បានអំពាវនាវដល់ប្រជាពលរដ្ឋទាំងអស់ ជាពិសេសប្រជាពលរដ្ឋដែលរស់នៅផ្នែកខាងក្រោមនៃទំនប់ចាន់ថ្នាលផ្នែកខាងលើ និងខាងក្រោមនៃទ្វារទឹករលាំងជ្រៃ និងតាមបណ្ដោយដងស្ទឹងព្រែកត្នោតទាំងអស់ បង្កើនការប្រុងប្រយ័ត្ន និងត្រៀមបង្ការឱ្យបានខ្ពស់ ដោយជំនន់ទឹកភ្លៀងនេះនឹងអាចកើតមានឡើងនៅតាមតំបន់ខាងលើជាយថាហេតុ។ ជាមួយគ្នានេះលោកក៏បានបញ្ជាឱ្យគណៈបញ្ជាការឯកភាពរដ្ឋបាលខេត្ត កងកម្លាំងប្រដាប់អាវុធទាំង ៣ ប្រភេទ មន្ទីរជំនាញត្រូវទទួលខុសត្រូវតាមភារកិច្ចរៀងៗខ្លួនផងដែរ។
ការបាក់ទំនប់ស្ទាក់ទឹកនៅខេត្តកំពង់ស្ពឺ និងការធ្លាក់ភ្លៀងដ៏ច្រើនសន្ធឹកសន្ធាប់នាប៉ុន្មានថ្ងៃជាប់ៗគ្នានេះបានធ្វើឱ្យមានជំនន់ទឹកភ្លៀងកើតឡើង នៅផ្នែកខ្លះនៃភាគខាងលិចរាជធានីភ្នំពេញដែលធ្វើឱ្យមានការផ្អាកចរាចរណ៍ជាបណ្ដោះអាសន្ននៅតាមផ្លូវមួយចំនួនក្នុងទីប្រជុំជនរាជធានីនេះផងដែរ។
ដើម្បីដោះស្រាយនូវវិបត្តិនេះលោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមកាលពីយប់ថ្ងៃអាទិត្យបានដឹកនាំក្រុមការងារបច្ចេកទេសក្រសួង ចុះពិនិត្យស្ថានភាពទឹកលើខ្នងទំនប់សណ្តស្ទឹងព្រែកត្នោតដែលកំពុងយាយីដោយជំនន់ស្ទឹងព្រែកត្នោតនៅភូមិសាស្ត្រភាគខាងលិចរាជធានីភ្នំពេញ និងខេត្តកណ្តាល។
ក្នុងដំណើរចុះពិនិត្យស្ថានភាពទឹកជាក់ស្តែងទាំងយប់នេះលោករដ្ឋមន្ត្រី លឹម គានហោ បានណែនាំបន្ថែមទៀតទៅដល់ក្រុមការងារបច្ចេកទេសឱ្យយកបាវខ្សាច់មករៀបលើខ្នងទំនប់កម្ពស់ ០,៥០ ម៉ែត្រ ដើម្បីលើកកម្ពស់ខ្នងទំនប់បន្ថែម បង្ការលំហូរទឹកពីលើខ្នងទំនប់ដែលអាចបង្កឱ្យមានការលិចលង់ដល់ភូមិឋានប្រជាពលរដ្ឋនៅប៉ែកខាងក្រោម។
លោក រដ្ឋមន្ត្រី បានបញ្ជាក់ថា៖ «ស្ថានភាពទឹកនៅបន្តឡើងបន្ថែមទៀត តែមិនទាន់មានអ្វីដែលជាការយាយីដល់រាជធានីភ្នំពេញនៅឡើយទេ ដោយក្រុមការងារបច្ចេកទេសរបស់ក្រសួងបានធ្វើការបិទរូងនាគជាច្រើនកន្លែងនៅតាមខ្នងទំនប់ និងយាមប្រចាំការ ២៤ ម៉ោងលើ ២៤ ម៉ោងអស់រយៈពេល ១ សប្តាហ៍មកហើយ»។
ជាមួយគ្នានេះលោកបានអំពាវនាវដល់ស្ថាប័នដែលកំពុងធ្វើការដ្ឋានក៏ដូចជាបណ្តាក្រុមហ៊ុនឯកជន និងបងប្អូនប្រជាពលរដ្ឋ រក្សានូវទំហំ ឬច្រកមុខទឹកចាស់ ដើម្បីធានាដល់ការរំដោះទឹកឱ្យមានប្រសិទ្ធភាព ទាន់ពេលវេលា បើពុំនោះទេរាជធានីភ្នំពេញនឹងទទួលការគំរាមកំហែងយ៉ាងធ្ងន់ធ្ងរ។
ចាប់តាំងពីថ្ងៃទី ១ ដល់ថ្ងៃទី ១២ ខែតុលា ឆ្នាំ ២០២០ ជំនន់ទឹកភ្លៀងបានបង្កការជន់លិច រាជធានី-ខេត្តចំនួន ១០ រួមមាន រាជធានីភ្នំពេញ កណ្ដាល កំពង់ឆ្នាំង កំពង់ស្ពឺ ពោធិ៍សាត់ បាត់ដំបង ប៉ៃលិន បន្ទាយមានជ័យ ស្ទឹងត្រែង និងស្វាយរៀងព្រមទាំងបានបង្កឱ្យមនុស្សចំនួន ១១ នាក់ស្លាប់ និងមានពលរដ្ឋជាង ១២០០ គ្រួសារត្រូវបានជម្លៀសចេញពីលំនៅឋានទៅកាន់ទីទួលសុវត្ថិភាព។ នេះបើតាមសម្ដីរបស់លោក ឃុន សុខា អ្នកនាំពាក្យ គណៈកម្មាធិការជាតិ គ្រប់គ្រងគ្រោះមហន្តរាយកាលពីថ្ងៃចន្ទ៕
វីដេអូ៖