.jpg)
ផ្លេកបន្ទោរនៅពេលមុនភ្លៀងធ្លាក់ក្នុងទីក្រុងភ្នំពេញ នាពេលកន្លងមក។ ហុង មិនា
ភ្នំពេញៈ ក្រសួងធនធានទឹក និងឧតុនិយមបានអំពាវនាវដល់ប្រជាពលរដ្ឋ ដែលរស់នៅខេត្តឧត្តរមានជ័យ បង្កើនការប្រុងប្រយ័ត្នអំពីបាតុភូតភ្លៀង និងផ្គររន្ទះដែលកើតឡើងពីឥទ្ធិពលនៃរលកកម្ដៅក្នុងបរិយាកាស។ នេះបើយោងតាមសេចក្ដីជូនដំណឹងដែលភ្នំពេញប៉ុស្តិ៍ទទួលបានកាលពីថ្ងៃទី ១០ ខែ មីនា ឆ្នាំ ២០២១។
យោងតាមរយៈសេចក្ដីជូនដំណឹងរបស់ក្រសួងធនធានទឹកបានឱ្យដឹងថា នៅពេលនេះទ្រនុងសម្ពាធខ្ពស់ពីប៉ាស៊ីហ្វិកបានធ្លាក់ចុះមកគ្របដណ្ដប់លើតំបន់ខ្ពង់រាបឦសាននៃព្រះរាជាណាចក្រកម្ពុជាបង្កើតឱ្យមានបាតុភូតសម្ពាធទាបតូចៗដែលបំប្លែងចេញពីកម្ដៅខ្យល់ និង បង្កឱ្យមានភ្លៀងធ្លាក់ដោយអន្លើក្នុងកម្រិតពីតិចទៅច្រើន ដោយមានលាយឡំជាមួយបាតុភូតខ្យល់កន្ត្រាក់ និងផ្គររន្ទះ។
តាមរយៈសេចក្ដីជូនដំណឹងដដែលនោះបានឱ្យដឹងថា៖ «ចាប់ពីថ្ងៃទី ១០ ដល់ថ្ងៃទី ១៦ ខែមីនា សីតុណ្ហភាពអតិបរមានៅទូទាំងព្រះរាជាណាចក្រកម្ពុជានឹងកើនឡើងនៅក្នុងចន្លោះពី ៣៦-៣៨ អង្សាសេ។ ការកើនឡើងនៃរលកកម្ដៅក្នុងបរិយាកាសនេះនឹងបង្កឱ្យមានបាតុភូតភ្លៀងខ្យល់ និងផ្គររន្ទះកើតឡើងដោយអន្លើនៅតាមបណ្ដាខេត្តភាគពាយព្យ និងជួរភ្នំដងរែក ជាពិសេសនៅក្នុងខេត្តឧត្តរមានជ័យ»។
ទន្ទឹមនឹងនេះលោក ញើន កួន ប្រធានមន្ទីរធនធានទឹក និង ឧតុនិយម ខេត្តឧត្តរមានជ័យបានប្រាប់ ភ្នំពេញ ប៉ុស្តិ៍ នៅថ្ងៃម្សិលមិញថា នៅសប្ដាហ៍ទី ១ ដើមខែមីនានេះបាតុភូតភ្លៀងលាយឡំខ្យល់កន្ត្រាក់បានកើតមាន ២ លើកមកហើយនៅក្នុងក្រុងសំរោង ដោយបានបំផ្លាញផ្ទះប្រជាពលរដ្ឋអស់ ៣១ ខ្នង។
លោក ញើន កួន បានថ្លែងថា បន្ទាប់ពីមានភ្លៀងលាយឡំខ្យល់កន្ត្រាក់នេះ រលកកម្ដៅក្នុងបរិយាកាសក៏បានស្ទុះងើបយ៉ាងឆាប់រហ័សឡើងវិញផងដែរ ជាមួយសីតុណ្ហភាពអតិបរមាពី ៣៦-៣៨ អង្សាសេនៅក្នុងចន្លោះពេលពីម៉ោង ១១ និង ៣០ នាទីព្រឹកដល់ម៉ោង ២ និង ៣០ នាទីរសៀល។
លោក កួន បានថ្លែងថា៖ «នៅពេលនេះ [រសៀលថ្ងៃពុធ] ផ្ទៃមេឃស្រទំ ប៉ុន្តែសីតុណ្ហភាពបានកើនឡើងដល់ ៣៧ អង្សាសេ និងមានសភាពស្អុះស្អាប់ ហប់ខ្យល់ដែលហាក់ដូចជាមេឃកំពុងរកកល់ភ្លៀង»។
បើតាមលោក កួន ស្ថានភាពអាកាសធាតុនៅក្នុងឆ្នាំ ២០២១ នេះមានលក្ខណៈល្អប្រសើរជាងបណ្ដាឆ្នាំមុនៗ ព្រោះរដូវរងាបានអូសបន្លាយរយៈពេលវែង ហើយក្នុងរដូវប្រាំងនេះទៀតសោតមានភ្លៀងកក់ខែកើតឡើងច្រើនដែលបង្កលក្ខណៈងាយស្រួលដល់ការងារបង្កបង្កើនផលកសិកម្ម។
លោកបានបញ្ជាក់ថា៖ «នៅឆ្នាំនេះប្រភពទឹក [អាងស្តុកទឹក] យើងនៅសល់ទឹកច្រើនគ្រប់គ្រាន់ សម្រាប់ផ្គត់ផ្គង់ការស្រោចស្រពស្រូវប្រាំង និងដំណាំរួមផ្សំផ្សេងទៀតរបស់ប្រជាកសិករនៅទូទាំងខេត្តនេះ»។
ចំណែកលោកស្រី មិថុនា ភូថង អភិបាលខេត្តកោះកុងនៅថ្ងៃម្សិលមិញបានអំពាវនាវដល់ប្រជាពលរដ្ឋ ដែលរស់នៅតាមតំបន់ឆ្នេរ ជាពិសេសប្រជានេសាទនៅក្នុងខេត្តឱ្យបង្កើនការប្រុងប្រយ័ត្នចំពោះបាតុភូតភ្លៀងលាយឡំខ្យល់កន្ត្រាក់ និងផ្គររន្ទះនេះផងដែរ។
លោកស្រី មិថុនា ភូថង បានថ្លែងបញ្ជាក់ប្រាប់ ភ្នំពេញ ប៉ុស្តិ៍ ឱ្យដឹងថា៖ «បន្ទាប់ពីក្រសួងធនធានទឹក និងឧតុនិយមជូនដំណឹងអំពីស្ថានភាពអាកាសធាតុ រដ្ឋបាលខេត្តកោះកុងយើងបានធ្វើការផ្សព្វផ្សាយបន្ត ដោយបានអំពាវនាវដល់ប្រជានេសាទផ្អាកចេញទូកនេសាទជាបណ្ដោះអាសន្ន ដើម្បីបង្ការគ្រោះថ្នាក់កើតឡើងជាយថាហេតុ»។
បើតាមលោកស្រី មិថុនា ខេត្តកោះកុងមានភ្លៀងធ្លាក់ ២ ថ្ងៃជាប់គ្នាមកហើយ ប៉ុន្តែមិនមានខ្យល់បក់បោកខ្លាំង បង្កខូចខាតផ្ទះប្រជាពលរដ្ឋជាដុំកំភួននៅឡើយទេ។ ទោះជាបែបណា លោកស្រី មិថុនា ភូថង បានណែនាំដល់គ្រប់ស្ថាប័ន អង្គភាពពាក់ព័ន្ធទាំងអស់នៅទូទាំងខេត្តកោះកុង ត្រៀមលក្ខណៈចុះអន្តរាគមន៍ជួយដល់ពលរដ្ឋក្នុងករណីមានគ្រោះថ្នាក់ដោយប្រការណាមួយកើតឡើង ដោយសារបាតុភូតធម្មជាតិ ដូចជាខ្យល់កន្ត្រាក់ដែលអាចនឹងកើតលើតំបន់ណាមួយ៕
