The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​ធម្មការ​ត្រៀម​បើក «ទូរទស្សន៍​សាសនា» នៅ​ចុង​ឆ្នាំ​នេះ




ក្រសួង​ធម្មការ​ត្រៀម​បើក «ទូរទស្សន៍​សាសនា» នៅ​ចុង​ឆ្នាំ​នេះ

Content image - Phnom Penh Post

ក្រសួង​ធម្មការ​ត្រៀម​បើក «ទូរទស្សន៍​សាសនា» នៅ​ចុង​ឆ្នាំ​នេះ

ភ្នំពេញៈ ក្រសួង​ធម្មការ និង​សាសនា​កម្ពុជា រួម​សហការ​ជាមួយ​នឹង​ក្រុមហ៊ុន​ផ្តល់​សេវា​អ៊ិនធឺណេត និង​ទូរទស្សន៍​របស់​ប្រទេស​ចិន​មួយ កំពុង​រៀបចំ​ផែនការ​បង្កើត​ប៉ុស្តិ៍​ទូរទស្សន៍​ថ្មី ដែល​នឹង​ផ្តោត​សំខាន់​តែ​កម្មវិធី​អំពី​ព្រះ​ពុទ្ធ​សាសនា​ប៉ុណ្ណោះ។

លោក សេង សុមុនី អ្នក​នាំ​ពាក្យ​ក្រសួង​ធម្មការ និង​សាសនា បាន​និយាយ​ថា «កាល​ពី​ពេលថ្មីៗ​នេះ ពួក​យើង​ទើប​ចុះ​បញ្ជី​លើ​អនុស្សរណៈ​យោគ​យល់​គ្នា សម្រាប់​ប៉ុស្តិ៍​ទូរទស្សន៍​ថ្មី​ជាមួយ​នឹង​ក្រសួង​ [ព័ត៌មាន] ដើម្បី​ចាប់​ដំណើរ​ការ​ស្ថានីយ៍​ទូរទស្សន៍​ថ្មី ដែល​នឹង​ចាក់​ផ្សាយ​អំពី​សាសនា​ព្រះពុទ្ធ»។

លោក​បន្ត​ថា ប្រភេទ​នៃ​កម្មវិធី​លើ ទូរទស្សន៍​សាសនា​នេះ នឹង​ខុស​គ្នា​បន្តិច​ពី​ទូរទស្សន៍​ដទៃ​ទៀត ក្នុង​ទម្រង់​ចាក់​ផ្សាយ ដូចជា​មាន​កម្មវិធី​ជជែក ពិភាក្សា និង​ការ​សម្តែង​ពិត​ផង​ដែរ។

ខណៈ​ដែល​មាន​ទូរទស្សន៍​មួយ​ចំនួន​នៅ​កម្ពុជា ក៏​មាន​ការ​ចាក់​ផ្សាយ​ពី​កម្មវិធី​សាសនា​ផង​ដែរ​នោះ ទូរទស្សន៍​ថ្មី​នេះ នឹង​ក្លាយ​ជា​ទូរទស្សន៍​ដំបូង​គេ​បង្អស់ ដែល​នឹង​មាន​ការ​ចាក់​ផ្សាយ​ពី​ការ​អប់រំ​ប្រៀន​ប្រដៅ​របស់​ព្រះពុទ្ធ​ទាំង​ស្រុង។

លោក សុមុនី បាន​បញ្ជាក់​ដែរ​ថា «ពួក​យើង​បាន​ព្រម​ព្រៀង​គ្នា ដាក់​ឈ្មោះ​ប៉ុស្តិ៍​ទូរទស្សន៍​ថ្មី​នេះ​ថា «ទូរទស្សន៍​សាសនា» ដោយសារ​តែ​ពួក​យើង​មាន​គម្រោង​ចាក់​ផ្សាយ​តែ​អំពី​ព្រះពុទ្ធ​សាសនា ហើយ​នឹង​មាន​កម្មវិធី ដែល​នឹង​ដឹក​នាំ​ដោយ សមាជិក​នៃ គណៈសង្ឃ​កម្ពុជា​ផង​ដែរ»។

លោក ខៀវ កាញារីទ្ធ រដ្ឋមន្ត្រី​ក្រសួង​ព័ត៌មាន ក៏​បាន​បញ្ជាក់​ថា ទូរទស្សន៍​សាសនា​នេះ កំពុង​ឆ្ពោះ​ទៅ​មុខ ដោយ​លោក​ថ្លែង​ថា ក្រសួង​ធម្មការ និង​សាសនា​កំពុង​ធ្វើ​ការ​ជាមួយ​ក្រុមហ៊ុន​ខ្សែ​កាប​ចិន SuperNet ដែល​មាន​ទីតាំង​នៅ​ក្នុង​រាជធានី​ភ្នំពេញ។

ការ​ចាក់​ផ្សាយ​ជា​ផ្លូវ​ការ​សម្រាប់​ប៉ុស្តិ៍​ទូរទស្សន៍​​ថ្មី​នេះ ត្រូវ​បាន​រំពឹង​ថា​នឹង​ចាប់​ផ្តើម​នៅ​ចុង​ឆ្នាំ​នេះ ខណៈ​ដែល​ខ្លឹមសារ​នៃ​ការ​ចាក់​ផ្សាយ​នឹង​ស្ថិត​ក្រោម​ការ​ត្រួត​ពិនិត្យ​របស់​គណៈសង្ឃ នៃ​ក្រសួង​ធម្មការ និង​សាសនា។

យ៉ាងណា លោក សេង សុមុនី បាន​បដិសេធ​ចំពោះ​ទឹក​ប្រាក់​ដែល ក្រុមហ៊ុន SuperNet កំពុង​ធ្វើ​ការ​វិនិយោគ​លើ​ប៉ុស្តិ៍​ថ្មី​នេះ ប៉ុន្តែ​ក្រសួង​ធម្មការ និង​សាសនា​នឹង​ជា​អ្នក​គ្រប់គ្រង​ការ​ចាក់​ផ្សាយ​ទាំង​ស្រុង។

កាល​ពី​ខែ​មុន ក្រសួង​មហាផ្ទៃ​ក៏​បាន​ប្រកាស​ចំពោះ​ផែន​ការ​បង្កើត​ប៉ុស្តិ៍​ទូរទស្សន៍​សម្រាប់​ខ្លួន​ឯង​មួយ​ផង​ដែរ ដែល​គម្រោង​នេះ​ក៏​មាន​ការ​គាំទ្រ​ការ​វិនិយោគ​ដោយ​ក្រុមហ៊ុន​ចិន​ផង​ដែរ៕

អត្ថបទគួរចាប់អារម្មណ៍