The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​នឹង​ចុះ​វាយតម្លៃ​ពី ៣ ​ទៅ ៦ ​ខែ​​មុន​ចេញ​អាជ្ញាបណ្ណ​ឲ្យ​​​បូមខ្សាច់​​​ជាថ្មី

ក្រសួង​នឹង​ចុះ​វាយតម្លៃ​ពី ៣ ​ទៅ ៦ ​ខែ​​មុន​ចេញ​អាជ្ញាបណ្ណ​ឲ្យ​​​បូមខ្សាច់​​​ជាថ្មី

មន្ដ្រី​ក្រសួងរ៉ែ ថ្លែង​​ក្នុង​​សន្និសីទ​កាសែត​ស្តីពី​អាជីវកម្ម​បូមខ្សាច់​នៅ​ភ្នំពេញ​​ ​និង​​ខេត្ត​កណ្តាល​​​​​។
មន្ដ្រី​ក្រសួងរ៉ែ ថ្លែង​​ក្នុង​​សន្និសីទ​កាសែត​ស្តីពី​អាជីវកម្ម​បូមខ្សាច់​នៅ​ភ្នំពេញ​​ ​និង​​ខេត្ត​កណ្តាល​​​​​។ ម៉ៃ វីរៈ

ក្រសួង​នឹង​ចុះ​វាយតម្លៃ​ពី ៣ ​ទៅ ៦ ​ខែ​​មុន​ចេញ​អាជ្ញាបណ្ណ​ឲ្យ​​​បូមខ្សាច់​​​ជាថ្មី

ភ្នំពេញៈ ក្រសួង​រ៉ែ និង​ថាមពល នឹង​ចុះ​សិក្សា​ស្រាវជ្រាវ​ វាយតម្លៃ​ពី​ផលប៉ះពាល់​សង្គម​ សេដ្ឋកិច្ច​ និង​បរិស្ថាន​ក្នុង​ចន្លោះ​​​​​ពេល​ពី​ ៣ ​ខែ​ទៅ​ ៦ ​ខែ មុខ​នឹង​ រៀបចំ​ចេញ​អាជ្ញាប័ណ្ណ​ថ្មី​ទៀត សម្រាប់​​​​អាជីវកម្ម​បូមខ្សាច់​​នៅក្នុង​រាជធានី​ភ្នំពេញ និង​​នៅ​ខេត្ត​​កណ្តាល។

ថ្លែង​ក្នុង​សន្និសីទ​សារព័ត៌មាន ក្រោយ​កិច្ចប្រជុំ​ពិភាក្សា ពិគ្រោះ​យោបល់ ពាក់ព័ន្ធ​នឹង​ការផ្គត់ផ្គង់​តម្រូវការ​ខ្សាច់​ ជាមួយ​តំណាង​ម្ចាស់​អាជីវកម្ម​ខ្សាច់​ ៣០ ​​នាក់ មាន​ទីតាំង​​អាជីវកម្ម​ក្នុង​រាជធានី​ភ្នំពេញ និង​ខេត្ត​កណ្តាល កាលពី​ម្សិលមិញ​នេះ​រដ្ឋលេខាធិការ និង​ជា​អ្នក​នាំពាក្យ​ក្រសួង​រ៉ែ និង​ថាមពល លោក ឌិត ទីណា បាន​ឲ្យ​ដឹង​ថា លទ្ធផល​​រួម​នៃ​ជំនួប​នេះ គឺ​អាជីវករ ទាំង​អ្នក​​ផ្អាក​ការ​បូមខ្សាច់​ក្រោយ​អាជ្ញាប័ណ្ណ​ផុត​សុពលភាព​ និង​អ្នក​ដែល​បាន​លួចលាក់​​បន្ត​បូម​​ដោយ​ខុស​ច្បាប់​នោះ ឯកភាព​គ្នា​បញ្ឈប់​ការបូមខ្សាច់​ដោយ​អនាធិបតេយ្យ រហូត​​ដល់​ក្រសួង​ចេញ​អាជ្ញាប័ណ្ណ​ថ្មី​​ដល់​​ពួកគេ។

ជាមួយ​គ្នា​នេះ លោក ឌិត ទីណា បាន​ឲ្យ​ដឹង​​ថា ការឯកភាព​គ្នា​ដាច់​ដោយ​ឡែក​មួយ​ទៀត​​នោះ​ ពាក់ព័ន្ធ​នឹង​ការ​ប្រកប​អាជីវកម្ម​ដោយ​ស្មោះត្រង់ គឺ​អាជីវករ​​ព្រមព្រៀង​​ឲ្យ​ក្រសួង​បិទ​ភ្ជាប់​ត្រា​សម្គាល់ នៅលើ​ក្បាល​ម៉ាស៊ីន​បូមខ្សាច់ ដើម្បី​អាជ្ញាធរ​ត្រួតពិនិត្យ​ជា​ប្រចាំ​។

លោក​ថ្លែង​ថា៖ «ឆន្ទៈ​រួម​របស់​ពួកគាត់​ ក៏​បាន​ទទួល​ឲ្យ​អាជ្ញាធរ​ចុះ​ពិនិត្យ​មើល​ក្បាល​បូម​របស់​ពួកគាត់ កាលណា​ម៉ាស៊ីន​បូម​បែក​​ត្រា​នោះ យើង​ដឹង​ថា មាន​អ្នក​ដែល​ធ្វើ​យុទ្ធនាការ​មិន​ស្រប​ច្បាប់​ហើយ​ដាក់​​ត្រា​ទាំងអស់ យើង​នឹង​រៀបចំ​ចុះ​ទៅ​ដាក់ និង​ពិនិត្យ​ទៀត​ទាត់​លើ​ទូក សាឡង់​របស់​ពួកគាត់​។ នេះ​ជា​យុទ្ធនាការ​នៃ​ការបង្ហាញ​នូវ​សុច្ឆន្ទៈ​របស់​អាជីវករ»។

លោក ឌិត ទីណា បាន​បន្ត​ថា ជា​ការឆ្លើយតប​ចំពោះ​សំណើ​​អាជីវករ​ឲ្យ​ពន្លឿន​ការ​ផ្តល់​អាជ្ញាប័ណ្ណ​បូមខ្សាច់​ថ្មី​នេះ ខាង​ក្រសួង​នឹង​ចាប់ផ្តើម​ធ្វើការ​សិក្សា​ស្រាវជ្រាវ វាយតម្លៃ​ពី​ផលប៉ះពាល់​សង្គម សេដ្ឋកិច្ច និង​បរិស្ថាន​ ដែល​មាន​រយៈពេល​ពី​ ៣ ​ខែ ទៅ​ ៦ ​ខែ មុន​នឹង​ចេញ​អាជ្ញាប័ណ្ណ ដើម្បី​បញ្ចៀស​ការ​ប្រឈម​នៃ​ការ​បាក់​ច្រាំង​៖ «យើង​បាន​ជម្រាប​ជូន​គាត់ អាច​​មាន​រយៈពេល​ពី ៣ ​ទៅ​ ៦​ខែ​ទៅ​តាម​ការសិក្សា​ជាក់ស្តែង ព្រោះ​អី​​ចំណុច​នេះ យើង​ត្រូវការ​ឲ្យ​ច្បាស់ ដើម្បី​ការ​ផ្តល់​អាជ្ញាប័ណ្ណ​ចេញ​ទៅ មិន​មាន​ការប៉ះពាល់​ធ្ងន់ធ្ងរ​ដល់​ការ​បាក់​ច្រាំង​»។

ទោះ​យ៉ាងណា​មុន​សន្និសីទ​សារព័ត៌មាន​នេះ បន្ទាប់ពី​កិច្ចប្រជុំ​បាន​​បញ្ចប់​ អាជីវករ​ភាគច្រើន បាន​បដិសេធ​ផ្តល់​បទសម្ភាសន៍​​ជាមួយ​អ្នកសារព័ត៌មាន​​ដែល​​ចំា​​​នៅ​ខាង​ក្រៅ ជុំវិញ​​​ការពិគ្រោះ​យោបល់​​នេះ​ទេ​។

លោក មួង សៅខន ម្ចាស់​អាជីវកម្ម​ខ្សាច់​ក្រុមហ៊ុន​ផល​ខ្មែរ​​អភិវឌ្ឍន៍ ក្នុង​ខេត្ត​កណ្តាល​ និង​ខេត្ត​ព្រៃវែង ដែល​បាន​ផ្អាក​អាជីវកម្ម​​ដោយ​​អាជ្ញាប័ណ្ណ​ផុត​សុពលភាព បន្ទាប់ពី​ប្រមុខ​រដ្ឋាភិបាល​សម្រេច​ឈប់​ផ្តល់​អាជ្ញាប័ណ្ណ​​​ដល់​អាជីវកម្ម​ខ្សាច់​នេះ ឲ្យ​ដឹង​ថា ការ​ផ្អាក​អាជីវកម្ម​​រយៈពេល​យូរ​មក​នេះ​បាន​នាំឲ្យ​ទាំង​អាជីវករ ប្រឈម​នឹង​​បញ្ហា​ហិរញ្ញវត្ថុ និង​ការផ្គត់ផ្គង់​កម្មករ ប៉ុន្តែ​លោក​ហាក់​គ្មាន​​ជម្រើស​អ្វី​ក្រៅពី​ការទន្ទឹម​រង់ចាំ ការអនុញ្ញាត​ផ្តល់​អាជ្ញាប័ណ្ណ​ថ្មី​នេះ​។

លោក​ថា ​៖ «ខ្ញុំ​និង​អាជីវករ​ផ្សេង​ទៀត​ គ្មាន​ការ​​ជ្រើសរើស​ទេ​ តែ​យើង​សង្ឃឹម​ថា ស្ថាប័ន​ដែល​ទទួល​នូវ​ភារកិច្ច​ថ្មី​នេះ គោរព​តាម​ច្បាប់​ទម្លាប់​ បើ​គាត់​គោរព ពួកខ្ញុំ​ក៏​គោរព​ដែរ​»។

សម្រាប់​លោក ឯក រង្ស៊ី ប្រធាន​ផ្នែក​ការិយាល័យ​ក្រុមហ៊ុន​សំណង់ Cambosaina concrete​(ក្រុមហ៊ុន​លាយ​បេតុង​) ដែល​បាន​ចូលរួម​កិច្ចប្រជុំ​នេះ​ក៏​បាន​លើក​ឡើង​នូវ​ការព្រួយបារម្ភ​សម្រាប់​រយៈពេល​វែង​នៃ​ដំណើរការ​អាជីវកម្ម​​បូមខ្សាច់ ដែល​នាំឲ្យ​ខ្សាច់​ឡើង​ថ្លៃ​ខ្លាំង​ប៉ះពាល់​ដល់​ការផ្គត់ផ្គង់​សំណង់​របស់​ក្រុមហ៊ុន​លោក និង​ក្រុមហ៊ុន​ដទៃ​ទៀត​។

លោក​យល់​ថា៖ «ដោយសារ​កង្វះ​ខ្សាច់​ទន្លេ សូម្បីតែ​ខ្សាច់​បូក​មាន​ការឡើង​ថ្លៃ ចាប់ពី​ ១១ ​ដុល្លារ​ ទៅ​ ១៣ ​ដុល្លារ​ តាំងពី​អំឡុង​ខែ​បី​មក​ម្ល៉េះ យើង​បារម្ភ​ថា វា​នឹង​កាន់តែ​ឡើង​ថ្លៃ​ទៀត ដល់​អ៊ីចឹង​ផលប៉ះពាល់​វា​ពាក់ព័ន្ធ​នឹង​អាជីវកម្ម ពិសេស​​លើ​ក្រុមហ៊ុន​បរទេស ហើយ​សកម្មភាព​នៃ​ការបិទ​អាជីវកម្ម ធ្វើឲ្យ​អសកម្ម​គ្រប់​រូបភាព​ការប្រើប្រាស់​ទុនវិនិយោគ​​ត្រូវ​ព្យូរ ប៉ះពាល់​ដល់​ការងារ និង​​ទៅលើ​កម្មករ»។

ប៉ុន្តេ​បើ​តាម​រដ្ឋលេខាធិការ​ក្រសួង​រ៉ែ និង​ថាមពល លោក ឌិត ទីណា បច្ចុប្បន្ន​នេះ​នៅ​រាជធានី​ភ្នំពេញ និង​នៅ​​ខេត្ត​កណ្តាល អាជ្ញាប័ណ្ណ​អាជីវកម្ម​បូមខ្សាច់​ទន្លេ នា​ពេល​បច្ចុប្បន្ន​នេះ មាន​តែ​ក្រុមហ៊ុន សុខ ទៀង ស្ថិត​នៅ​កោះ​អន្លង់ចិន ស្រុក​ស្អាង ខេត្ត​កណ្ដាល​មួយ​ប៉ុណ្ណោះ។​ចំណែក​អាជីវកម្ម​ខ្សាច់បូក មាន​ចំនួន ១៨ អាជ្ញាប័ណ្ណ។

លោក ឌិត ទីណា ក៏​បាន​អំពាវនាវ ឲ្យ​ពលរដ្ឋ​ចូលរួម​សហការ​ទប់ស្កាត់​បទល្មើស​បូមខ្សាច់​តាមរយៈ លេខ​ទូរស័ព្ទ​ ៧២៧ អាច​ផ្ញើ​ជា​រូបថត​តាម WhatsApp ទូរស័ព្ទ​លេខ ០៩៥-៧២៧ ៧២៧។

ថ្មីៗ​នេះ ​ក្រសួង​រ៉ែ និង​ថាមពល ក៏​បាន​​សម្រេច​បន្ត​ពន្យារ​អាជ្ញាប័ណ្ណ​បូមខ្សាច់​ដល់​អាជីវករ ដែល​មាន​អាជ្ញាប័ណ្ណ​ផុត​សុពលភាព​នៅក្នុង​តំបន់​អាជីវកម្ម​របស់​ខ្លួន ដែល​បាន​សិក្សា​រួច​​ស្រេច​ទៅលើ​ផលប៉ះពាល់​សង្គម​ សេដ្ឋកិច្ច​ និង​បរិស្ថាន ហើយ​រាល់​អាជ្ញាប័ណ្ណ​ថ្មី ក្នុង​តំបន់​ថ្មី គឺ​ទាមទារ​​ជា​ដាច់​ខាត​នូវ​ការ​វាយតម្លៃ និង​សិក្សា​ពី​ផលប៉ះពាល់​ជា​មុន​សិន​៕

អត្ថបទគួរចាប់អារម្មណ៍