.jpg)
លោក ហង់ជួន ណារ៉ុន ពេលបើកវិញ្ញាសាប្រឡងបាក់ឌុបកន្លងមក។ រូបថត ហ៊ាន រង្សី
ភ្នំពេញៈ ក្រោយពីការប្រឡងសញ្ញាបត្រមធ្យមសិក្សាទុតិយភូមិហៅថា បាក់ឌុប ត្រូវបានបញ្ចប់រយៈពេលប្រមាណ ២ ខែមក ក្រសួងអប់រំ យុវជន និងកីឡា នឹងចាប់ផ្តើមដំណើរការចែកជូនវិញ្ញាបនបត្របណ្តោះអាសន្នដល់សិស្សដែលប្រឡងជាប់ចាប់ពីសប្តាហ៍ក្រោយតទៅដោយមិនតម្រូវឱ្យបង់ប្រាក់នោះទេ។
លោក រស់ សុវាចា អ្នកនាំពាក្យក្រសួងអប់រំបានប្រាប់ភ្នំពេញប៉ុស្តិ៍កាលពីម្សិលមិញថា ដំណើរការចែកវិញ្ញាបនបត្រនេះគឺយោងទៅលើលិខិតដែលបានផ្ញើជូនប្រធានមន្ទីរអប់រំរាជធានី-ខេត្ត។
យោងតាមលិខិតរបស់ក្រសួងអប់រំកាលពីថ្ងៃចន្ទ ផ្ញើជូនប្រធានមន្ទីរអប់រំរាជធានី-ខេត្ត ឱ្យដឹងថាក្រសួងជំរុញការផលិតវិញ្ញាបនបត្របណ្តោះអាសន្ននេះដើម្បីចែកជូនសិស្សដែលបានប្រឡងជាប់បាក់ឌុប ក្រោយពីការប្រកាស និងផ្ទៀងផ្ទាត់លទ្ធផលប្រឡងរួចមក។
យោងតាមលិខិតដដែលនេះ ក្រសួងអប់រំបានណែនាំឱ្យប្រធានមន្ទីរអប់រំរាជធានី-ខេត្ត ចាត់តំណាងរបស់ខ្លួនឱ្យមកទទួលយកវិញ្ញាបនបត្រនៅនាយកដ្ឋានកិច្ចការប្រឡងរបស់ក្រសួងអប់រំ ចាប់ពីថ្ងៃទី ២១ ខែតុលាតទៅ ដើម្បីយកទៅចែកជូនសិស្សដែលប្រឡងជាប់ដោយឥតគិតថ្លៃ។ «ប្រធានមន្ទីរអប់រំ យុវជន និងកីឡារាជធានី ខេត្ត ត្រូវកោះប្រជុំថ្នាក់ដឹកនាំមន្ត្រីជំនាញរបស់មន្ទីរ និងនាយក នាយិកាសាលាដែលមានបេក្ខជនទើបប្រឡងជាប់ដើម្បីរៀបចំយន្តការចែកវិញ្ញាបនបត្របណ្តោះអាសន្ន និងធ្វើសេចក្តីជូនដំណឹងលម្អិតបន្ថែម»។
ការប្រឡងបាក់ឌុបឆ្នាំនេះ ប្រព្រឹត្តទៅពីថ្ងៃទី ១៩ ដល់ថ្ងៃទី ២០ ខែសីហាដោយមានបេក្ខជនដែលប្រឡងជាប់ចំនួន ៧៩០៥២ នាក់ស្នើនឹង ៦៨,៦២ ភាគរយក្នុងចំណោមបេក្ខជន ១១៧- ០៤៣ នាក់ដែលចុះឈ្មោះប្រឡង។
លោក ឡាយ បូរ៉ា ប្រធានមន្ទីរអប់រំ ខេត្តក្រចេះថ្លែងពីថ្ងៃពុធថា បន្ទាប់ពីមន្ទីររបស់លោកទទួលបានវិញ្ញាបនបត្រនេះលោកនឹងអញ្ជើញនាយកសាលាមកប្រជុំ និងធ្វើការណែនាំឱ្យចែកវិញ្ញាបនបត្របណ្តោះអាសន្ននេះដល់សិស្សនៅតាមសាលារៀន ហើយវិញ្ញាបនបត្រនេះមិនមានការបង់ប្រាក់ទេ។
លោកថ្លែងថា៖ «អ្នកណាថា ត្រូវការបង់លុយប៉ុណ្ណេះៗ អាហ្នឹងចាប់បានទទួលខុសត្រូវខ្លួនឯង។ កន្លងមកខ្ញុំហាមឃាត់អ៊ីចឹង ព្រោះវិញ្ញាបនបត្រកន្លងមក ក្រសួងមិនដែលត្រូវការយកលុយពីសិស្សពីអ្នកប្រឡងជាប់ទាំងអស់ទេ»។
លោកស្រី អ៊ុក ឆាយ៉ាវី ប្រធានសមាគមគ្រូបង្រៀងកម្ពុជាឯករាជ្យថ្លែងពីថ្ងៃពុធថាកាលពីមុនសិស្សានុសិស្សត្រូវទៅដកយកវិញ្ញាបនបត្រនៅឯក្រសួងផ្ទាល់តែឥឡូវពួកគាត់អាចមកដកនៅតាមសាលារៀនបានហើយឃើញថា សិស្សានុសិស្សមានភាពងាយស្រួលជាងមុន។ ប៉ុន្តែការចែកវិញ្ញាបនបត្របណ្តោះអាសន្នថ្មីៗនេះឃើញថា មានភាពយឺតយ៉ាវនៅឡើយ ព្រោះសិស្សានុសិស្សត្រូវការយកឯកសារនេះដើម្បីដាក់ពាក្យស្វែងរកសាលារៀន និងស្វែងរកការងារធ្វើផ្សេងៗ។
លោកស្រីថ្លែងថា៖ «ការយឺតយ៉ាវបែបហ្នឹងយើងឃើញថា សិស្សានុសិស្ស គាត់ត្អូញត្អែរជាច្រើន...»៕
