The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​នឹង​ដក​លិខិត​ឆ្លងដែន​ពី​មន្ត្រី​ចប់​បេសកកម្ម

ក្រសួង​នឹង​ដក​លិខិត​ឆ្លងដែន​ពី​មន្ត្រី​ចប់​បេសកកម្ម

ទម្រង់​លិខិត​ឆ្លង​ដែន​ផ្លូវការ​មួយ​ប្រភេទ​របស់​ព្រះរាជាណាចក្រ​កម្ពុជា។
ទម្រង់​លិខិត​ឆ្លង​ដែន​ផ្លូវការ​មួយ​ប្រភេទ​របស់​ព្រះរាជាណាចក្រ​កម្ពុជា។ រូបថត ហ្វេសប៊ុក

ក្រសួង​នឹង​ដក​លិខិត​ឆ្លងដែន​ពី​មន្ត្រី​ចប់​បេសកកម្ម

ភ្នំពេញៈ ក្រសួង​ការបរទេស​ និង​សហប្រតិបត្តិការ​អន្តរជាតិ​បាន​ចេញ​គោលការណ៍​ដោយ​សម្រេច​ដកហូត​លិខិត​ឆ្លងដែន​ផ្លូវការ​មន្ត្រី​កម្ពុជា​យក​មក​ទុក​នៅ​ក្រសួង​ជា​បណ្តោះ​អាសន្ន​បន្ទាប់ពី​ត្រឡប់​ពី​បេសកកម្ម​នៅ​ក្រៅ​ប្រទេស​ដោយ​អះអាង​ថា​ដើម្បី​​ការពារ​សណ្តាប់ធ្នាប់​រដ្ឋបាល និង​កិត្យានុភាព​មន្ត្រី​រាជការ​ទាំង​មូល។

លិខិត​របស់​ក្រសួង​ការបរទេស​ចេញ​ផ្សាយ​កាលពី​ថ្ងៃ​ទី ៤ ខែ​មីនា ឆ្នាំ២០១៦ ដោយ​យោង​តាម​ចំណារ​របស់​លោក​នាយក​រដ្ឋមន្ត្រី ហ៊ុន សែន ចុះ​ថ្ងៃ​ទី ២ ខែ​មីនា​បាន​សម្រេច​ថា «ឱ្យ​មន្ត្រី​អន្តោប្រវេសន៍​កម្ពុជា​នៅ​គ្រប់​ច្រក​ទ្វារ​ព្រំដែន​កម្ពុជា​ដក​លិខិត​ផ្លូវការ​មន្ត្រី​ដែល​ចប់​បេសកកម្ម​ពី​បរទេស​ហើយ​បញ្ជូន​មក​រក្សា​នៅ​ក្រសួង​ការបរទេស​ហើយ​ក្រសួង​នឹង​ប្រគល់​លិខិត​ឆ្លងដែន​ផ្លូវការ​ទាំង​នោះ​វិញ​នៅ​ពេល​មន្ត្រី​ទាំង​នោះ​មាន​បេសកកម្ម​ទៅ​បរទេស​ជាថ្មី»។

បើ​តាម​លិខិត​នោះ​បាន​ស្នើ​ឱ្យ​ក្រសួង​មហាផ្ទៃ​ណែនាំ​មន្ត្រី​ក្រោម​ឱវាទ​ចាត់​វិធានការ​ប្រមូល​លិខិត​ឆ្លងដែន​ផ្លូវការ​ចាប់​អនុវត្ត​ពី​ថ្ងៃ​ទី ២១ ខែ​មីនា​នេះ។

អ្នក​នាំ​ពាក្យ​ក្រសួង​ការបរទេស​លោក ជុំ សុន្ទរី ប្រាប់​ភ្នំពេញ​ប៉ុស្តិ៍​ថា​លោក​បាន​ឃើញ​លិខិត​នោះ​ហើយ​តែ​លោក​មិន​ទាន់​ទទួល​ព័ត៌មាន​ច្បាស់លាស់​ពី​ថ្នាក់​លើ​នៅ​ឡើយ​ទេ។

លោក​ថា «សូម​អធ្យាស្រ័យ​រហូត​មក​ទល់​ពេល​នេះ​ខ្ញុំ​អត់​ទាន់​ទទួល​បាន​ព័ត៌មាន​អ្វី​ទេ​អ៊ីចឹង​ខ្ញុំ​មិន​អាច​បកស្រាយ​បាន​ទេ​តែ​ចាំ​ខ្ញុំ​មាន​នឹង​ប្រាប់​តាម​ក្រោយ»។

ប៉ុន្តែ​អ្នក​នាំ​ពាក្យ​ទីស្តីការ​គណៈរដ្ឋមន្ត្រី​លោក ផៃ ស៊ីផាន ប្រាប់​ភ្នំពេញ​ប៉ុស្តិ៍​ថា​ការ​ដក​ហូត​លិខិត​ឆ្លងដែន​នេះ​ដើម្បី​គ្រប់គ្រង​ផ្នែក​រដ្ឋបាល និង​ទប់ស្កាត់​មន្ត្រី​រដ្ឋាភិបាល​មួយ​ចំនួន​ដែល​ឆ្លៀត​ឱកាស​យក​លិខិត​ឆ្លងដែន​ផ្លូវការ​របស់​រដ្ឋ​ទៅ​បម្រើ​ប្រយោជន៍​ផ្ទាល់​ខ្លួន។ លោក​ថា «លិខិត​ដែល​ដក​ហូត​ជា​កម្មសិទ្ធិ​របស់​ក្រសួង​ការបរទេស​មិនមែន​ជា​កម្មសិទ្ធិ​ផ្ទាល់​ដូច​លិខិត​ឆ្លងដែន​ធម្មតា​នោះ​ទេ​ហើយ​លិខិត​នោះ​ផ្តល់​សម្រាប់​ការ​ធ្វើ​ដំណើរ​ដល់​មន្ត្រី​ដែល​បំពេញ​បេសកកម្ម មិនមែន​ផលប្រយោជន៍​បុគ្គល​ផ្ទាល់​ទេ​ដែល​កន្លង​ទៅ​មាន​មន្ត្រី​ខ្លះ​រំលោភ​ការ​ទុក​ចិត្ត​របស់​រដ្ឋាភិបាល»។

លោក​បាន​ព្រមាន​ថា​ប្រសិន​មន្ត្រី​រដ្ឋាភិបាល​ដែល​បាន​ទៅ​បំពេញ​បេសកកម្ម​នៅ​ក្រៅ​បរទេស​ធ្វើ​ការងារ​ខុស​ពី​ទិសដៅ​នៃ​ការ​អនុញ្ញាត​នឹង​ទទួល​ការ​ផ្តន្ទាទោស​តាម​ច្បាប់។ លោក​បញ្ជាក់​ថា​ការ​ដកហូត​នេះ​ពុំ​មាន​ប៉ះពាល់​ដល់​សិទ្ធិ​បុគ្គល​នោះ​ទេ​តែ​ដើម្បី​ការពារ​សណ្តាប់ធ្នាប់​ផ្នែក​រដ្ឋបាល​ប៉ុណ្ណោះ។

បើ​តាម​លោក ផៃ ស៊ីផាន លិខិត​ឆ្លងដែន​មាន​បី​ប្រភេទ​ទី ១ លិខិត​ឆ្លងដែន​ប្រភេទ​ការទូត​ផ្តល់​ឱ្យ​សម្រាប់​មន្ត្រី​ចេញ​ទៅ​ញឹកញាប់​នៅ​ក្រៅ​ប្រទេស និង​ទទួល​បន្ទុក​កិច្ចការ​បរទេស ទី ២ ​លិខិត​ឆ្លងដែន​ប្រភេទ​បេសកកម្ម និង​ទី ៣ លិខិត​ឆ្លងដែន​ប្រភេទ​ធម្មតា​ដែល​ប្រជាពលរដ្ឋ​អាច​មាន​គ្រប់​រូប។

យ៉ាង​ណា​ក៏ដោយ​ លោក​បញ្ជាក់​ថា ​ការ​ចេញ​លិខិត​ឆ្លងដែន​សម្រាប់​មន្ត្រីកាទូត ឬ​បេសកកម្ម​នានា​មិន​ចេះ​តែ​ចេញ​ផ្តេសផ្តាស​នោះ​ទេ​បុគ្គលិក​ណា​ថ្នាក់​ដឹកនាំ​កំពូល​របស់​ក្រសួង​នីមួយៗ​ធ្វើ​លិខិត​ស្នើ​ទៅ​ក្រសួង​ការបរទេស​ដើម្បី​ឱ្យ​ចេញ​លិខិត​នោះ។

នាយក​ប្រតិបត្តិ​សម្ព័ន្ធ​គណនេយ្យភាព​សង្គម​កម្ពុជា​លោក សន ជ័យ ថ្លែង​ថា​ការ​រឹតបន្តឹង​នេះ​ជា​រឿង​ល្អ​មួយ​ដើម្បី​ទប់ស្កាត់​មន្ត្រី​រដ្ឋាភិបាល​ខិលខូច​មួយ​ចំនួន​ដែល​កេង​ប្រវ័ញ​ការងារ​រដ្ឋ​ទៅ​បម្រើ​ការងារ​ខ្លួន​ឯង។

លោក​ថា «ការ​ដកហូត​នេះ​គ្រាន់តែ​ជា​ជម្រើស​មួយ​ដើម្បី​ឱ្យ​មាន​ការ​គ្រប់គ្រង​លិខិត​របស់​មន្ត្រី​បាន​ល្អ​ជាពិសេស​រៀបចំ​ការ​ប្រើប្រាស់​លិខិត​ឆ្លងដែន​របស់​មន្ត្រី​ឱ្យ​ចំ​គោលដៅ​ចៀសវាង​យក​ទៅ​ប្រើប្រាស់​ជា​លក្ខណៈ​បុគ្គល​ដែល​អាច​រង​នូវ​ការ​រិះគន់​ផង​ដែរ»៕

អត្ថបទគួរចាប់អារម្មណ៍