.jpg)
ក្រុមអ្នកជាប់ពន្ធនាគារពេលនាំមកជំនុំជម្រះនៅសាលាដំបូងរាជធានីភ្នំពេញ កន្លងមក។ ហេង ជីវ័ន
ភ្នំពេញៈ ទោះបីការរីករាលដាលនៃវីរុសកូវីដ ១៩ នៃព្រឹត្ដិការណ៍សហគមន៍ ២០ កុម្ភៈ កំពុងបន្តរីករាលដាលខ្លាំង ប៉ុន្ដែក្រុមការងារអនុវត្ដយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្តនៅតែបន្តអនុវត្ដយុទ្ធនាការនេះ ដោយគ្រោងបញ្ចប់នាខែឧសភាខាងមុខដដែល។ នេះបើតាមលោក ជិន ម៉ាលីន អ្នកនាំពាក្យក្រសួងយុត្ដិធម៌។
លោក ជិន ម៉ាលីន បានប្រាប់ ភ្នំពេញ ប៉ុស្ដិ៍ ពីម្សិលមិញថា យុទ្ធនាការដោះស្រាយការកកស្ទះសំណុំរឿង គឺនៅតែដំណើរការជាធម្មតា តាមផែនការរបស់ខ្លួនគឺត្រូវអនុវត្ដរយៈពេល ១ ឆ្នាំដោយគិតចាប់ពីខែឧសភា ឆ្នាំ ២០២០ ហើយត្រូវបិទបញ្ចប់នៅខែឧសភា ឆ្នាំ ២០២១ ខាងមុខនេះ។
លោកបានថ្លែងថា៖ «ក្នុងតំបន់រីករាលដាលកូវីដ ១៩ សវនាការត្រូវពន្យារពេលខ្លះ ក៏ប៉ុន្ដែមិនមែនត្រូវពន្យារពេលគ្រប់សវនាការទេ។ សំណុំរឿងណាដែលអាទិភាព ចាំបាច់បន្ទាន់គឺត្រូវដោះស្រាយដដែល ប៉ុន្ដែត្រូវអនុវត្ដដោយផ្អែកលើវិធានការសុខាភិបាល និងសុវត្ថិភាពដោយមធ្យ័ត»។
លោក ជិន ម៉ាលីន បញ្ជាក់ថា៖ «យើងពន្យារពេលមែន ប៉ុន្ដែមិនឱ្យមានទំនាស់ខុសទៅនឹងនីតិវិធីច្បាប់ដែលមានជាធរមានទេ។ យើងពន្យារដោយករណី និងដោយកន្លែងតែប៉ុណ្ណោះមិនមែនពន្យារគ្រប់កន្លែងទាំងអស់នោះទេ។ យើងគ្រោងបិទបញ្ចប់យុទ្ធនាការនេះតាមផែនការរបស់យើងដដែល»។
ក្នុងរយៈពេល ២២២ ថ្ងៃ បន្ទាប់ពីប្រកាសអនុវត្តយុទ្ធនាការដោះស្រាយការកកស្ទះសំណុំរឿងនៅតាមសាលាដំបូងរាជធានី-ខេត្តរបស់ក្រសួងយុត្ដិធម៌គិតត្រឹមថ្ងៃទី ១៨ ខែ ឧសភា ឆ្នាំ ២០២០ ក្រុមការងារបានដោះស្រាយសំណុំរឿងព្រហ្មទណ្ឌដែលកកស្ទះជាង ៣៥ ១០០ សំណុំរឿងដែលស្មើនឹង ៨៩ ភាគរយ នៃសំណុំរឿងព្រហ្មទណ្ឌដែលកកស្ទះសរុប ៣៩ ១៥២ សំណុំរឿង និងបានជួយកាត់បន្ថយនូវភាពចង្អៀតណែនក្នុងពន្ធនាគារដោយសារតែមានការដោះលែងជនជាប់ឃុំប្រមាណ ២៦ ១០០ នាក់។
តាមរយៈយុទ្ធនាការនេះក៏បានដោះស្រាយសំណុំរឿងព្រហ្មទណ្ឌដែលចូលថ្មីក្នុងឆ្នាំ ២០២០ បានចំនួនជាង ៣៦ ៥០០ សំណុំរឿងផងដែរ។ នេះបើតាមក្រសួងយុត្ដិធម៌។
តាមរយៈបទពិសោធនៃការអនុវត្ដយុទ្ធនាការនេះលោក កើត រិទ្ធ រដ្ឋមន្ត្រីក្រសួងយុត្តិធម៌កាលពីថ្ងៃទី ២៦ ខែមិថុនា ឆ្នាំមុនក៏បានសម្រេចបង្កើតក្រុមការងារបច្ចេកទេសបង្កើតគោលនយោបាយដោះស្រាយទំនាស់ក្រៅប្រព័ន្ធតុលាការបន្ថែមទៀតផងដែរ ដើម្បីជានិរន្តរភាពក្នុងការបង្ខិតសេវាយុត្តិធម៌ឱ្យទៅជិតប្រជាពលរដ្ឋ និងកាត់បន្ថយការកកស្ទះសំណុំរឿងនៅតាមសាលាដំបូងរាជធានី-ខេត្ដ ដើម្បីបង្កើតនូវភាពសុខដុមរមនាដល់ពលរដ្ឋនៅតាមសហគមន៍។
លោក អំ សំអាត នាយករងអង្គការ លីកាដូ បានថ្លែងកាលពីម្សិលមិញថា តាមការសង្កេតកន្លងមក ប្រជាពលរដ្ឋក៏ដូចជាអ្នកមានឥទ្ធិពលមួយចំនួន តែងតែប្រើប្រាស់តុលាការ ដើម្បីស្វែងរកដំណោះស្រាយ បើទោះបីជាករណីវិវាទខ្លះអាចមានលទ្ធភាពបញ្ចប់ជម្លោះដោយការដោះស្រាយក្រៅប្រព័ន្ធតុលាការ ឬវិវាទដែលមិនគួរកើតឡើងក៏ដោយ។
លោកបានថ្លែងថា៖ «បញ្ហាទាំងអស់នេះហើយ ដែលបានចូលរួមចំណែកបង្កឱ្យមានការកកស្ទះសំណុំរឿងនៅតុលាការ និងបង្កឱ្យមានការបាត់បងទំនុកចិត្តលើប្រព័ន្ធយុតិ្តធម៌»៕
