.jpg)
កម្មករចេញពីធ្វើការនៅរោងចក្រ ១ ក្នុងខណ្ឌឫស្សីកែវ កាលពីខែមេសា។ ហុង មិនា
ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈបកស្រាយថា រោងចក្រ សហគ្រាស ដែលឈានដល់ការបិទដំណើរការទាំងស្រុងដោយសារទទួលរងពីជំងឺរាតត្បាតកូវីដ ១៩ នឹងមិនត្រូវទទួលកាតព្វកិច្ចទូទាត់ «ប្រាក់សោហ៊ុយជំងឺចិត្ត» និង «ប្រាក់បំណាច់ទូទាត់ជួសការឲ្យដំណឹងមុន» ជូនកម្មករនោះទេ បន្ទាប់ពីបានព្យាយាមដោះស្រាយវិបត្តិនេះ តាមរយៈវិធានការស្របច្បាប់។
ការបកស្រាយនេះ ដើម្បីឆ្លើយតបទៅកាន់សមាគមរោងចក្រកាត់ដេរនៅកម្ពុជា (GMAC) ដែលបានស្នើឲ្យក្រសួងការងារបកស្រាយអំពីការទូទាត់ «ប្រាក់សោហ៊ុយជំងឺចិត្ត» និង «ប្រាក់បំណាច់ទូទាត់ជួសការឲ្យដំណឹងមុន» ដែលមានចែងក្នុងមាត្រា ៨២ មាត្រា ៨៧ ថ្មី និងមាត្រា ៩១ ថ្មី នៃច្បាប់ស្តីពីការងារ។
យោងតាមលិខិតដែលក្រសួងការងារ និងបណ្តុះបណ្តាលវិជ្ជាជីវៈ បានផ្ញើទៅកាន់ប្រធាន GMAC កាលពីថ្ងៃទី ២៩ មិថុនា បានឲ្យដឹងថា អនុលោមតាមមាត្រា ៧១ នៃច្បាប់ស្តីពីការងារ ការលំបាកផ្នែកសេដ្ឋកិច្ច ឬការលំបាកជាពិសេសណាមួយ ដែលនាំឲ្យព្យួរសកម្មភាពសហគ្រាសមិនលើសពី ២ ខែ គឺជាមូលហេតុ ដែលច្បាប់អនុញ្ញាតឲ្យមានការព្យួរកិច្ចសន្យាការងារក្រោមការត្រួតពិនិត្យរបស់អធិការកិច្ចការងារ។
លិខិតបន្តថា ក្នុងន័យនេះ ផលវិបាកផ្នែកសេដ្ឋកិច្ចកាន់តែធ្ងន់ធ្ងរនៅតាមបណ្តារោងចក្រសហគ្រាសមួយចំនួនក្នុងវិស័យវាយនភណ្ឌ កាត់ដេរ ផលិតស្បែកជើង ផលិតផលធ្វើដំណើរ និងកាបូប ដែលកើតឡើងដោយផ្ទាល់ពីការរាលដាលនៃជំងឺកូវីដ ១៩ នៅទូទាំងសកលលោក ក៏ជាមូលហេតុ ដែលអាចចាត់ទុកថា ត្រឹមត្រូវក្នុងការរំលាយកិច្ចសន្យាការងារបន្ទាប់ពីព្យួរកិច្ចសន្យាការងារផងដែរ។
លោក អ៊ុក ចាន់ធូ ប្រធាននាយកដ្ឋានអធិការកិច្ចការងារនៃក្រសួងការងារ និងបណ្តុះបណ្តាលវិជ្ជាជីវៈបញ្ជាក់ក្នុងលិខិតថា ដោយសារពេលនេះមានរោងចក្រមួយចំនួនបានរងផលប៉ះពាល់ពីជំងឺកូវីដ ១៩ ដែលជាហេតុនាំឲ្យមានការលុបចោលការបញ្ជាទិញទាំងស្រុង។ ការផ្អាកមិនទទួលយកនូវទំនិញ ដែលបានផលិតរួចហើយទាំងអស់ និងការដែលមិនទូទាត់ប្រាក់តាមកិច្ចសន្យាទិញលក់។
លោកបន្តថា ផ្អែកតាមស្មារតីនេះ ការទាមទារសោហ៊ុយជំងឺចិត្ត គឺមិនអាចអនុវត្តចំពោះការរំលាយកិច្ចសន្យាការងារដោយមូលហេតុត្រឹមត្រូវដូចខាងលើនោះទេ។ ចំណែកសោហ៊ុយជំងឺចិត្ត និងប្រាក់បំណាច់ទូទាត់ជួសការឲ្យដំណឹងមុន ក៏មិនត្រូវអនុវត្តនោះដែរ ក្នុងករណីនៃការបិទសហគ្រាស គ្រឹះស្ថាន ស្របតាមលក្ខខណ្ឌដែលត្រូវបានកំណត់។
លោកថា៖ «ក្នុងស្ថានភាពវិបត្តិធ្ងន់ធ្ងរដែលកើតឡើង ដោយសារការរីករាលដាលជាសកលនៃជំងឺកូវីដ ១៩ នេះ សោហ៊ុយជំងឺចិត្ត និងប្រាក់បំណាច់ទូទាត់ជួសការឲ្យដំណឹងមុន មិនត្រូវអនុវត្តចំពោះរោងចក្រ សហគ្រាស ដែលឈានដល់ការបិទដំណើរការរោងចក្រសហគ្រាសទាំងស្រុង បន្ទាប់ពីបានព្យាយាមដោះស្រាយវិបត្តិនេះតាមរយៈវិធានការស្របច្បាប់នានា រួមទាំងការព្យួរកិច្ចសន្យា និងឬការរំលាយ កិច្ចសន្យាការងាររបស់កម្មករនិយោជិតរួចមក»។
លោក កាំង ម៉ូនីកា អគ្គលេខាធិការរង GMAC ពីម្សិលមិញថ្លែងថា ទោះរដ្ឋាភិបាល និងភាគីនិយោជកយល់ច្បាស់នូវបញ្ហាប្រឈមផ្នែកហិរញ្ញវត្ថុរបស់កម្មករ ក្នុងបរិបទនៃវិបត្តិជាសកល ដែលបណ្តាលមកពីការរាលដាលនៃជំងឺកូវីដ ១៩ ក៏ដោយកម្ពុជាត្រូវប្រកាន់ខ្ជាប់នូវគោលការណ៍ និងបទប្បញ្ញត្តិនៃច្បាប់ដែលមានជាធរមាន ដែលធានាផ្តល់ភាពត្រឹមត្រូវ និងយុត្តិធម៌ដល់គ្រប់ភាគី។
លោកថា៖ «ជាមួយគ្នានេះដែរ ការបំភ្លឺរបស់ក្រសួងការងារ និងបណ្តុះបណ្តាលវិជ្ជាជីវៈខាងលើ មិនមែនជាសេចក្តីសម្រេចថ្មីនោះទេ។ ប៉ុន្តែគឺជាការបញ្ជាក់ឲ្យកាន់តែ ច្បាស់នូវការប្រតិបត្តិតាមគោលការណ៍ និងបទប្បញ្ញត្តិនៃច្បាប់ដែលកំពុងមានជាធរមាន»។
លោក ប៉ាវ ស៊ីណា ប្រធានសហជីពចលនាកម្មករ ចាត់ទុកសេចក្តីសម្រេចរបស់ក្រសួងការងារនាពេលចុងក្រោយនេះ គ្មានតម្លាភាពចំពោះកម្មករ។ លោកថា មិនមែនមានតែនិយោជកនោះទេដែលរងផលប៉ះពាល់ ដោយវិបត្តិកូវីដ។ ក្រសួងការងារគួរតែបង្កើតកិច្ចពិភាក្សារវាងអ្នកពាក់ព័ន្ធ មុនសម្រេចដកអត្ថប្រយោជន៍ផ្សេងៗដែលកម្មករនឹងទទួលបាន។
លោក ស៊ីណា បញ្ចេញទស្សនៈចង់ឲ្យភាគីនិយោជកបង្ហាញពីផលប៉ះពាល់ដែលបណ្តាលមកពីជំងឺកូវីដ ដោយគ្មានការបញ្ជាទិញ និងមិនមានការទូទាត់ប្រាក់ពីអ្នកបញ្ជាទិញឲ្យបានច្បាស់ថា មានផលប៉ះពាល់ប៉ុនណា? ចៀសវាងយកលេសក្នុងន័យកេងចំណេញផលប្រយោជន៍ផ្ទាល់ខ្លួន។
លោកបញ្ជាក់ថា៖ «យើងចង់ឲ្យមានតម្លាភាព ព្រោះថាគ្រប់យ៉ាងវាបញ្ហាផលប៉ះពាល់កាន់តែធ្ងន់ធ្ងរទៅលើកម្មករហើយ។ មកដល់ម៉ោងនេះ យើងមិនមានរបាយការណ៍ណាជាក់លាក់ថា GMAC បានបង្ហាញ [ពីផលប៉ះពាល់] ប៉ុន្មាននោះទេ។ យើងចង់ឃើញរបាយការណ៍នេះទាំងអស់ពីរោងចក្រដែលមានផលប៉ះពាល់ហ្នឹង ដើម្បីយើងជជែកគ្នា ហើយសហជីពក៏មានសមត្ថភាពរបស់ខ្លួនក្នុងការទាក់ទងជាមួយអ្នកបញ្ជាទិញនេះដូចគ្នាដែរ»។
លោកថា នៅពេលក្រសួងការងារផ្តល់លទ្ធភាពខ្លាំងដល់ភាគីនិយោជក គឺពួកគេនឹងមានឱកាសកាន់តែច្រើនយកហេតុផលបញ្ឈប់កម្មករ និងគេចចេញពីការទូទាត់អត្ថប្រយោជន៍ដល់កម្មករ៕
វីដេអូ៖
