ភ្នំពេញៈ ក្រសួងសេដ្ឋកិច្ច និងហិរញ្ញវត្ថុសម្រេចបង្កើតក្រុមការងារចំពោះកិច្ចរៀបចំ និងគ្រប់គ្រងយន្តការជំនួយសង្គមដើម្បីជួយដល់ពលរដ្ឋក្រីក្រ និងជនងាយរងគ្រោះនៅក្នុងអំឡុងពេលប្រយុទ្ធនឹងជំងឺកូវីដ១៩ ក៏ប៉ុន្តែក្រុមការងារនេះនឹងរំលាយវិញ នៅពេលជំងឺឆ្លងនេះត្រូវបានបញ្ចប់ជាស្ថាពរ។
សេចក្តីសម្រេចដែលចុះហត្ថលេខាដោយលោកឧបនាយករដ្ឋមន្ត្រី អូន ព័ន្ធមុនីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុកាលពីថ្ងៃទី ៣ មេសា បានឲ្យដឹងថា ក្រុមការងារចំពោះកិច្ចនេះមានសមាសភាពមកពី ១៤ ក្រសួង ស្ថាប័ន ដែលដឹកនាំដោយលោកស្រី ងួន សុខា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុជាប្រធាន។
សេចក្តីសម្រេចដដែលបានឲ្យដឹងថា ក្រុមការងារនេះមានភារកិច្ចកំណត់អត្តសញ្ញាណគ្រួសារក្រីក្រ ក្រុមជនងាយរងគ្រោះ និងក្រុមជនដែលត្រូវការការគាំពារជាចាំបាច់ផ្សេងទៀតក្នុងអំឡុងពេលប្រយុទ្ធនឹងជំងឺកូវីដ ១៩។ បន្ថែមពីនេះក្រុមការងារនេះក៏ត្រូវរៀបចំគម្រោងវិធានការ និងគម្រោងសកម្មភាពអន្តរាគមន៍ដែលផ្តល់ការគាំពារដល់ក្រុមគោលដៅដើម្បីដោះស្រាយស្ថិរភាពនៃជីវភាពរបស់ពួកគេដែលជាអ្នកទទួលរងផលប៉ះពាល់ និងរងគ្រោះបំផុត។
ក្រៅពីនេះបើតាមក្រសួង ក្រុមការងារចំពោះកិច្ចនេះអាចប្រើប្រាស់មន្ត្រីក្រោមឱវាទក្រសួង ស្ថាប័ន ដើម្បីអនុវត្តភារកិច្ច ហើយអាជ្ញាធរពាក់ព័ន្ធត្រូវផ្តល់កិច្ចសហការក្នុងការបំពេញភារកិច្ចតាមការចាំបាច់។
ក្រសួងសេដ្ឋកិច្ចបានបញ្ជាក់ថា៖ «ក្រុមការងារចំពោះកិច្ចមានសិទ្ធិអញ្ជើញភាគីពាក់ព័ន្ធ និងវិស័យឯកជនចូលរួមប្រជុំតាមការចាំបាច់។ ក្រុមការងារចំពោះកិច្ចមានសិទ្ធិប្រើប្រាស់ត្រារបស់ក្រសួងសេដ្ឋកិច្ច និងហិរញ្ញវត្ថុសម្រាប់ដំណើរការការងាររបស់ខ្លួន។ តួនាទី និងភារកិច្ចរបស់ក្រុមការងារចំពោះកិច្ចដែលត្រូវបានកំណត់ក្នុងសេចក្តីសម្រេចនេះមានអានុភាពអនុវត្តរហូតដល់ការប្រយុទ្ធនឹងជំងឺកូវីដ ១៩ ត្រូវបានបញ្ចប់ជាស្ថាពរ»។
យ៉ាងណាក្ដីក្រសួងសេដ្ឋកិច្ច និងហិរញ្ញវត្ថុមិនបានបញ្ជាក់ថា ថវិកាដែលក្រុមការងារចំពោះកិច្ចនេះប្រើប្រាស់សម្រាប់ផ្តល់ការគាំពារដល់ក្រុមគោលដៅ រួមមានការឧបត្តម្ភជាសាច់ប្រាក់ និងមិនមែនជាសាច់ប្រាក់បានមកពីណានោះទេ។
មាស សុខសេនសាន លើកឡើងថា ក្រមការងារនេះគឺគ្រាន់តែវាយតម្លៃកំណត់អត្តសញ្ញាណជនដែលអាចទទួលបានប្រាក់ឧបត្តម្ភបន្ថែម ដែលរដ្ឋាភិបាលនឹងផ្តល់ជូនប៉ុណ្ណោះ។ លោកបន្តថាក្រុមនេះមិនមានសិទ្ធិចាយវាយថវិការនោះទេ ខណៈថវិកាដែលនឹងផ្តល់ជូនជនងាយរងគ្រោះ និងគ្រួសារក្រីក្រអាចប្រមូលបានពីរដ្ឋ និងប្រាក់សប្បុរសជននានា។
លោក កែវ អ៊ួលី ប្រធាននាយកដ្ឋានអត្តសញ្ញាណកម្មគ្រួសារក្រីក្រនៃក្រសួងផែនការ និងជាសមាជិកនៃក្រុមការងារនេះបានប្រាប់ភ្នំពេញប៉ុស្តិ៍ពីម្សិលមិញថា ដោយសារក្រុមការងារនេះទើបតែបង្កើត ដូច្នេះលោកមិនអាចលម្អិតបានទេដោយត្រូវរង់ចាំការប្រជុំជាលើកដំបូងនៅថ្ងៃទី ៩ មេសា ខាងមុខសិន។
ក៏ប៉ុន្តែលោក អ៊ួលី បានបង្ហើបថា ក្រុមគោលដៅអាចជាជនរងគ្រោះដែលមាននៅក្នុងបញ្ជីជនក្រីក្រស្រាប់ និងជនដែលងាយប្រឈមដទៃទៀតដែលគ្មានការងារធ្វើនៅក្នុងអំឡុងផ្ទុះជំងឺកូវីដ១៩នេះ។
លោកបញ្ជាក់ថា៖ «ខ្ញុំមិនទាន់ដឹងច្បាស់ទេថា យើងនឹងធ្វើអន្តរាគមន៍ទៅក្រុមគោលដៅណាច្បាស់ទេ ប៉ុន្តែជាទូទៅយើងមើលអ្នកក្រីក្រ ដែលយើងអាចគាំទ្រមុន ដែលគាត់មានបញ្ហាពាក់ព័ន្ធនឹងចំណូលទាប។ ខ្ញុំមិនទាន់អាចនិយាយអ្វីឲ្យច្បាស់ជាងហ្នឹងទេ ព្រោះកិច្ចការនេះទើបតែបង្កើត ហើយមិនទាន់បានប្រជុំអីសោះ...»។
លោក សន ជ័យ ប្រធានអង្គការសម្ព័ន្ធគណនេយ្យភាពសង្គមកម្ពុជាបានលើកឡើងថាកន្លងទៅលោកឃើញមានការបង្កើតគណៈកម្មការមួយរួចហើយជុំវិញបញ្ហាការរីករាលដាលជំងឺកូវីដ ១៩ នេះ ដែលមិនគួរបង្កើតក្រុមការងារបន្ថែមទេ។
លោកថា ការបង្កើតក្រុមការងារ និងគណៈកម្មការច្រើនបែបនេះគឺធ្វើឲ្យមានការបាត់បង់ប្រយោជន៍។ ប៉ុន្តែលោកចង់ឲ្យក្រុមការងារដែលមានស្រាប់បន្ថែមទំនាក់ទំនងល្អជាមួយមន្ត្រីមូលដ្ឋានដែលនឹងអាចក្តោបព័ត៌មានក្រុមងាយរងគ្រោះ និងពលរដ្ឋដែលត្រូវការជំនួយ។
លោកថា៖ «បើមានក្រុមការងារចំពោះកិច្ចអីផ្សេងទៀត វាចេះតែច្រើនទៅ។ យើងគួរពង្រឹងហើយបែងចែកការទទួលខុសត្រូវនៅក្នុងគណៈកម្មការដែលមានស្រាប់ហ្នឹងទៅ ក្នុងនោះគួរបែងចែកឲ្យមានការទទួលខុសត្រូវជាក់លាក់បន្ថែមការទទួលខុសត្រូវមួយចំនួនដោយធ្វើយ៉ាងម៉េចឲ្យពួកគេមានទំនាក់ទំនងជាមួយមូលដ្ឋានឲ្យបានច្បាស់លាស់។ ពីព្រោះសព្វថ្ងៃយន្តការរបស់រដ្ឋបាលថ្នាក់ក្រោមជាតិដូចជាឃុំសង្កាត់ក្រុងស្រុកខណ្ឌនេះ គឺពួកគេក្តោបបានព័ត៌មានទាក់ទងនឹងប្រជាពលរដ្ឋហើយ»៕
វីដេអូ៖