The Phnom Penh Post Search

Search form




Logo of Phnom Penh Post newspaper Phnom Penh Post - ក្រសួង​បង្កើត​ក្រុម​ការងារ​ពិនិត្យ​លើ​បណ្តឹង​បេក្ខជន​ប្រឡង​ធ្លាក់

ក្រសួង​បង្កើត​ក្រុម​ការងារ​ពិនិត្យ​លើ​បណ្តឹង​បេក្ខជន​ប្រឡង​ធ្លាក់

អនុរក្ស​ពិនិត្យ​សិស្ស​មុន​ពេល​ឲ្យ​ចូល​ក្នុងបន្ទប់​ប្រឡង​កន្លងមក​។
អនុរក្ស​ពិនិត្យ​សិស្ស​មុន​ពេល​ឲ្យ​ចូល​ក្នុងបន្ទប់​ប្រឡង​កន្លងមក​។ ហុង មិនា

ក្រសួង​បង្កើត​ក្រុម​ការងារ​ពិនិត្យ​លើ​បណ្តឹង​បេក្ខជន​ប្រឡង​ធ្លាក់

ភ្នំពេញៈ ក្រសួង​អប់រំ​បាន​សម្រេច​បង្កើត​ក្រុម​ការងារ​ពិនិត្យ​ទៅ​លើ​ពាក្យ​បណ្តឹង​របស់​បេក្ខជន​ប្រឡង​ធ្លាក់​បាក់​ឌុប​ដែល​ប្តឹង​តវ៉ា​សុំ​ការ​ពិនិត្យ​កំណែ​វិញ្ញាសា​ប្រឡង​ឡើង​វិញ​ក្រោយ​ទទួល​បាន​បណ្តឹង​របស់​បេក្ខជន​ជាង​ ១០០ នាក់​បន្ទាប់ពី​ប្រកាស​លទ្ធផល​បាន​ជិត ១០ ថ្ងៃ​មក​នេះ។

ក្រោយ​ការ​ប្រកាស​លទ្ធផល​ប្រឡង​បាក់ឌុប​ថ្ងៃ​ទី ១២ និង ១៣ ខែ​កញ្ញា​ក្រសួង​អប់រំ យុវជន និង​កីឡា​បាន​ជូន​ដំណឹង​ដល់​បេក្ខជន មាតាបិតា អាណាព្យាបាល អ្នក​ពាក់ព័ន្ធ ដែល​មិន​ពេញ​ចិត្ត​នឹង​លទ្ធផល​នៃ​ការ​ប្រឡង​មាន​សិទ្ធិ​ប្តឹង​តវ៉ា​ក្នុង​រយៈពេល ៣០ ថ្ងៃ​ចាប់ពី​ថ្ងៃ​ប្រកាស​លទ្ធផល​ប្រឡង។

រដ្ឋមន្ត្រី​ក្រសួង​អប់រំ យុវជន និង​កីឡា លោក ហង់ ជួនណារ៉ុន បាន​ឲ្យ​ដឹង​ថា​គិត​ត្រឹម​ថ្ងៃ​ម្សិលមិញ​នេះ​ក្រសួង​បាន​ទទួល​​បណ្តឹង​ពី​បេក្ខជន​ប្រឡង​ធ្លាក់ និង​​ស្នើសុំ​ពិនិត្យ​ឡើង​វិញ​សរុប​ជាង ១០០ នាក់​ហើយ​ និង​បាន​រៀបចំ​ក្រុម​គណៈកម្មការ​​ពិនិត្យ​លើ​បណ្តឹង​ទាំង​នោះ​មុន​សម្រេច​ពិនិត្យ​កំណែ​វិញ្ញាសា​ឡើង​វិញ។

លោក​ថា៖ «យើង​បាន​បង្កើត​គណៈកម្មការ ឬ​ហៅថា​ក្រុម​ការងារ​ទទួល​បន្ទុក​នេះ​តាមរយៈ​លិខិត​ឧទ្ទេស​នាម​ទៅ​កាន់​មន្ត្រី​មួយ​ចំនួន​ហើយ​​ពួកគេ​បាន​កំពុង​​ពិនិត្យ​មើល​ធ្វើ​កោសល្យវិច័យ​​លើ​រឿង​នេះ»។

យ៉ាង​នេះ​ក្តី​លោក ហង់ ជួនណារ៉ុន បាន​​​​បដិសេធ​អត្ថាធិប្បាយ​លម្អិត​ជុំវិញ​​ដំណើរការ​ត្រួតពិនិត្យរ​បស់​ក្រុម​ការងារ​នេះ​ដោយ​​ថា​ក្រោយ​ពិនិត្យ​ចប់​រួចរាល់​ក្រសួង​នឹង​ចេញ​ជា​សេចក្តី​ថ្លែងការណ៍​ប្រកាស​លទ្ធផល​ទៅកាន់​អ្នក​តវ៉ា​។

ផុន ម៉េង អាយុ ១៩ ឆ្នាំ សិស្ស​វិទ្យាល័យ​​បាក់ទូក និង​ជា​បេក្ខជន​ប្រឡង​ធ្លាក់​ដែល​បាន​ដាក់​បណ្តឹង​សុំ​ពិនិត្យ​ឯកសារ​ប្រឡង​​ឡើង​វិញ​បាន​ឲ្យ​ដឹង​ថា​ពាក្យ​ប្តឹង​របស់​ខ្លួន​គឺ​ស្នើសុំ​ពិនិត្យ​លើ​វិញ្ញាសា​ប្រឡង​ចំនួន​បី រួម​មាន ប្រវត្តិវិទ្យា ជីវវិទ្យា និង​រូបវិទ្យា។

ផុន ម៉េង និយាយ​ថា៖ «ខ្ញុំ​បាន​បំពេញ​ពាក្យ​សុំ​នៅ​​ទីស្តីការ​ក្រសួង​តាម​គំរូ​ពាក្យ​សុំ​ពិនិត្យ​ឡើង​វិញ​តែ​មិន​បាន​ភ្ជាប់​ឯកសារ​អ្វី​​ឡើយ​ហើយ​ក៏​គ្មាន​ការ​ទាមទារ​ដែរ​ខ្ញុំ​មិន​សូវ​មាន​សង្ឃឹម​ទេ​ព្រោះ​មិន​ដឹង​ថា​គេ​ទាក់ទង​យើង​វិញ​អត់ ឬ​ការ​ស្នើ​នោះ​​ត្រូវ​បាន​ពិនិត្យ​ឬ​អត់? តែ​ខ្ញុំ​គិត​ថា​ខ្ញុំ​ធ្វើ​បាន​ពេញ​ទាំងអស់​យ៉ាង​ហោច​ណាស់​ក៏​បាន​ជាប់​មិន​សម​នឹង​ធ្លាក់​នោះ​ទេ​»​។

លោក​រដ្ឋមន្ត្រី​ក្រសួង​អប់រំ​ធ្លាប់​បាន​បញ្ជាក់​កន្លង​ទៅ​ថា​ការ​ស្នើសុំ​ពិនិត្យ​កំណែ​វិញ្ញាសា​បេក្ខជន​ត្រូវ​មាន​ភ័ស្តុតាង​ជាក់លាក់​ដូចជា​លិខិត​បញ្ជាក់​ពី​គ្រូ​ទទួល​បន្ទុក​ថ្នាក់​ជុំវិញ​ការ​សិក្សា​របស់​បេក្ខជន​នោះ​ការ​ភ្ជាប់​មក​ជាមួយ​នូវ​ពិន្ទុ​ប្រឡង​ប្រចាំ​ឆមាស​ជាដើម​ដើម្បី​ជា​មូលដ្ឋាន​ទទួល​បាន​ការ​ជឿ​ទុក​ចិត្ត​ក្នុង​ការ​ពិនិត្យ​ឡើង​វិញ។

មិន​ខុស​ពី​បេក្ខជន​ដទៃ​ទៀត ធី សុវណ្ណថា ដែល​ជា​បេក្ខជន​ប្រឡង​ធ្លាក់​ចំនួន​ពីរ​ឆ្នាំ​ជាប់​គ្នា​ក៏​បាន​ដាក់​ពាក្យ​ស្នើ​សុំ​ពិនិត្យ​វិញ្ញាសា​កំណែ​ឡើង​វិញ​ដែរ។ ក្នុង​លិខិត​ស្នើសុំ សុវណ្ណថា បាន​បញ្ជាក់​ពី​ហេតុផល​នៃ​​ការ​ស្នើសុំ​គឺ​នាង​អះអាង​ត្រូវ​បាន​រំខាន​ដោយ​មាន​ក្រុម​អ្នក​សង្កេតការណ៍​ថតរូប និង​មាន​អ្នក​សួរ​ពី​ឈ្មោះ​លេខ​តុ​របស់​នាង​ពេល​ប្រឡង​ហើយ​នាង​សង្ស័យ​លើ​កំណែ​អយុត្តិធម៌ ឬ​កំហុស​បច្ចេកទេស។

ក្រសួង​អប់រំ យុវជន និង​កីឡា​បាន​ជូនដំណឹង​ថា​ក្នុង​ករណី​​ពិនិត្យ​ឃើញ​ថា​ការ​ប្រឡង​មាន​ភាព​មិន​ប្រក្រតី​លើ​កិច្ចការ​របស់​បេក្ខជន និង​លើ​ការ​អនុវត្ត​ភារកិច្ច​របស់​គណៈ​មេប្រយោគ និង​គណៈកម្មការ​ផ្សេងៗ​ក្រសួង​ត្រូវ​បង្កើត​គណៈកម្មការ​ដើម្បី​ធ្វើ​កោសល្យ​វិច័យ។

លោកគ្រូ ខាត់ សុធី សមាជិក​គណៈកម្មការ​កំណែ​វិញ្ញាសា​នៅ​វិទ្យាល័យ​ព្រះស៊ីសុវត្ថិ​សម្រាប់​មុខវិជ្ជា​ អក្សរសាស្ត្រ​ខ្មែរ និង​ជា​គ្រូ​បង្រៀន​នៅ​វិទ្យាល័យ​ព្រែកលៀប​បាន​ឲ្យ​ដឹង​ថា ​ការ​កែ​វិញ្ញាសា​ប្រឡង​របស់​គ្រូ​កំណែ​គឺ​មិន​អាច​ខុស​នោះ​ឡើយ​សម្រាប់​មុខវិជ្ជា​ដែល​មាន​ចម្លើយ​ពិត​តែ​សម្រាប់​មុខវិជ្ជា​សង្គម​គឺ​អាច​មាន​ល្អៀង​បន្តិច​អាស្រ័យ​លើ​ការ​យល់​ឃើញ​​របស់​គ្រូ​កំណែ​ប៉ុន្តែ​ភាព​ល្អៀង​នេះ​មិន​ជា​បញ្ហា​ធំ​នោះ​ទេ​។

ប្រធាន​ស្តីទី​សមាគម​គ្រូបង្រៀន​កម្ពុជា​ឯករាជ្យ​លោកស្រី ឆាយ យ៉ាវី បាន​រិះគន់​ចំពោះ​យន្តការ​ប្តឹង​តវ៉ា​​សុំ​ពិនិត្យ​នេះ​ដោយ​លោកស្រី​ថា​ហាក់​មាន​លក្ខណៈ​បិទបាំង និង​គ្រាន់តែ​ជា​លេស​របស់​ក្រសួង​តែ​មិន​មាន​ចំណាត់​ការ​ច្បាស់លាស់​នោះ​ទេ។

លទ្ធផល​ប្រឡង​បាក់ឌុប​ឆ្នាំ ២០១៥ បេក្ខជន​ប្រឡង​ជាប់​មាន​ចំនួន ៤៦៥៦០ ​នាក់​ត្រូវ​ជា ៥៥,៨៨ ភាគរយ​នៃ​បេក្ខជន​វត្តមាន​សរុប ៨៣ ៣២៥ នាក់​ក្នុង​នោះ​និទ្ទេស A មាន​ដល់​ទៅ ១០៨ នាក់​បើ​ធៀប​នឹង​លទ្ធផល​ឆ្នាំ​ ២០១៤ ការ​ប្រឡង​លើក​ទី ១ ដែល​បេក្ខជន​ជាប់​មាន​ប្រមាណ​តែ ២៥ ភាគរយ​ហើយ​និទ្ទេស A មាន​ត្រឹម ១១ នាក់​៕

អត្ថបទគួរចាប់អារម្មណ៍