The Phnom Penh Post Search

Search form

Logo of Phnom Penh Post newspaper Phnom Penh Post - ក្រសួង​បង្កើត​គណៈកម្មការ​ការពារ​សន្តិសុខ​តាម​ព្រំដែន




ក្រសួង​បង្កើត​គណៈកម្មការ​ការពារ​សន្តិសុខ​តាម​ព្រំដែន

ក្រសួង​បង្កើត​គណៈកម្មការ​ការពារ​សន្តិសុខ​តាម​ព្រំដែន

ភ្នំពេញៈ ក្រសួង​ការពារ​ជាតិ​បាន​សម្រេច​បង្កើត​គណៈកម្មការ​កិច្ច​សហប្រតិបត្តិការ​រក្សា​សន្តិសុខ​របៀប​រៀបរយ​តាម​បណ្តោយ​ព្រំដែន​ កម្ពុជា-ឡាវ​ ដើម្បី​ថែរក្សា​សន្តិភាព​នៅ​ព្រំដែន​ទប់ស្កាត់​បទល្មើស​ឆ្លង​ដែន​ និង ​សហការ​​វាស់វែង​បោះ​បង្គោល​ព្រំដែន​ឲ្យ​ស្រប​​តាម​គោល​​នយោបាយ​របស់​រដ្ឋាភិបាល​នៃ​ប្រទេស​ទាំង​ពីរ។

ប្រកាស​ស្តី​ពី «ការ​បង្កើត​គណៈកម្មការ​កិច្ចសហ​ប្រតិបត្តិការ​រក្សា​សន្តិសុខ​របៀប​រៀបរយ​តាម​បណ្តោយ​ព្រំដែន​ ​កម្ពុជា-ឡាវ» ចុះ​ហត្ថលេខា​ដោយ​រដ្ឋមន្ត្រី​ក្រសួង​ការពារ​ជាតិ​លោក ទៀបាញ់ ​កាលពី​ថ្ងៃ​ទី ២០ ខែ​វិច្ឆិកា​ឆ្នាំ ២០១៥ បាន​ឲ្យ​ដឹង​ថា​គណៈកម្មការ​ថ្មី​នេះ​មាន​សមាសភាព​មន្ត្រី​យោធា​ជាន់​ខ្ពស់​នៃ​ក្រសួង​ការពារ​ជាតិ​ចំនួន ១២ ​រូប​ក្នុង​នោះ​នាយរង​សេនាធិការ​ចម្រុះ​នាយក​ទីចាត់ការ​ការងារ​ព្រំដែន​លោក សៀក សុជាតិ ជា​ប្រធាន។

តាមរយៈ​ប្រកាស​នេះ​លោក សុជាតិ ក៏​បាន​ដឹកនាំ​កិច្ចប្រជុំ​ដាក់​ផែនការ​នៅ​ថ្ងៃ​ទី ២៥ ខែ​វិច្ឆិកា​ ម្សិលមិញ​ ដើម្បី​ត្រៀម​សម្រាប់​កិច្ចប្រជុំ​គណៈកម្មការ​ចម្រុះ​នៃ​ប្រទេស​ទាំង​ពីរ​ដោយ​មាន​ការ​ចូលរួម​ពី​សមាជិក​ភាគី​អន្តរ​ក្រសួង​ជំនាញ និង​កង​ឯកភាព​ស្ថាប័ន​ពាក់ព័ន្ធ​ផង​ដែរ។

ប្រធាន​ការិយាល័យ​ទំនាក់​ទំនង​ការងារ​ព្រំដែន​ កម្ពុជា-ថៃ​ លោក ពេជ្រ វណ្ណា បាន​ឲ្យ​ដឹង​ក្រោយ​កិច្ច​ប្រជុំ​នេះ​ថា​ក្រៅពី​ការ​ប្រកាស​ជា​ផ្លូវការ​នៃ​សមាស​ភាព​សមាជិក​ក៏​មាន​កិច្ច​ពិភាក្សា​លើ​ការ​ជ្រើសរើស​តំណាង ២២ រូប​ដែល​នឹង​ត្រូវ​ជួប​ប្រជុំ​ជាមួយ​ភាគី​ឡាវ​នៅ​ថ្ងៃ​ទី ២៧ ខែ​វិច្ឆិកា​ដើម្បី​ប្រកាស​សមាសភាព​ទាំង​សង​ខាង​ និង​ចាត់ចែង​ការងារ។

លោក វណ្ណា បញ្ជាក់​ថា៖ «តាម​ពិត​ទៅ​កន្លង​មក​យើង​មាន​ទំនាក់ទំនង​ជាមួយ​ភាគី​ឡាវ​ជា​លក្ខណៈ​កងកម្លាំង កងពល​ក្នុង​ភូមិ​ភាគ​ដែល​ឈរ​ជើង​នៅ​តាម​ច្រក​ព្រំដែន​ក្នុង​កិច្ចសហការ​ប្រទេស​ទាំង​ពីរ​ហើយ​យើង​គ្រោង​បង្កើត​គណៈកម្មការ​ចម្រុះ​យូរ​មក​ហើយ​តែ​ទើប​តែ​សម្រេច​នៅ​ពេល​នេះ»​។

យោង​តាម​ប្រកាស​គណៈកម្មការ​នេះ​មាន​តួនាទី​ការពារ​ព្រំដែន​ប្រទេស​ទាំង​ពីរ​ឲ្យ​ក្លាយ​ជា​​ព្រំដែន​សន្តិភាព និង​សហប្រតិបត្តិការ​ព្រម​ទាំង​ការពារ​សន្តិសុខ​តាម​បណ្តោយ​ព្រំដែន​ទប់ស្កាត់ និង​ដោះស្រាយ​នូវ​រាល់​ឧក្រិដ្ឋកម្ម​ភេរវកម្ម​ឆ្លង​ដែន​ការ​ជួញដូរ​គ្រឿងញៀន​ការ​ជួញដូរ​មនុស្ស​ការ​ឆ្លងដែន​ខុស​ច្បាប់ ការ​រត់​ពន្ធ ការ​កាប់​ព្រៃឈើ​ខុស​ច្បាប់​ហើយ​គណៈកម្មការ​នេះ​មាន​តួនាទី​​ចូលរួម​សហការ​ជាមួយ​ក្រុម​បច្ចេកទេស​វាស់វែង​បោះ​បង្គោល​ព្រំដែន​របស់​គណៈកម្មការ​ចម្រុះ​ព្រំដែន​កម្ពុជា-ឡាវ តាម​ការ​ចាត់តាំង​ និង​បញ្ជា​ផង​ដែរ​៕

អត្ថបទគួរចាប់អារម្មណ៍