.jpg)
សកម្មភាពចុះឈ្មោះក្នុង QR Code ទប់ស្កាត់កូវីដនៅភ្នំពេញពីម្សិល។ ហុង មិនា
ភ្នំពេញៈ ក្រសួងប្រៃសណីយ៍ និងទូរគមនាគមន៍បានឱ្យ ដឹងថាក្នុងរយៈពេល ១២ ថ្ងៃ បន្ទាប់ពីមានការដាក់ឱ្យប្រើប្រាស់នូវប្រព័ន្ធ QRCode «ទប់ស្កាត់កូវីដ StopCovid» គឺមានទីតាំងចុះឈ្មោះចំនួន ៩៩ ២២៤ កន្លែង និងមានបុគ្គលស្កេនតាមទីតាំងផ្សេងៗជិត ៥ លានដង ប៉ុន្តែក៏បានរកឃើញករណីល្មើសនឹងវិធានកើតឡើងផងដែរ។
តាមសេចក្តីប្រកាសរបស់ក្រសួងនៅថ្ងៃម្សិលមិញបានឱ្យដឹងថា តាមរយៈការប្រើប្រាស់ប្រព័ន្ធនេះអ្នកស្កេនអាចទទួលបានដំណឹងភ្លាមៗ ប្រសិនបើមានពាក់ព័ន្ធនឹងជំងឺកូវីដ ១៩ ហើយម្ចាស់ទីតាំងអាចដឹងពីស្ថានភាពបុគ្គលម្នាក់ៗដែលទៅដល់ទីតាំងរបស់ខ្លួន។
ក្រសួងបានបញ្ជាក់ថា «តាមរយៈទិន្នន័យប្រព័ន្ធ QRCode» បានបង្ហាញថា ក្នុងចំណោមបុគ្គលដែលកំពុងធ្វើចត្តាឡីស័កដោយខ្លួនឯងនៅផ្ទះមានបុគ្គលខ្លះបានចាកចេញពីផ្ទះ ដោយចូលទីតាំងជាច្រើនកន្លែង ដែលជាការល្មើសនឹងវិធាននៃការធ្វើចត្តាឡីស័ក»។
ទន្ទឹមនឹងនេះ ក្រសួងប្រៃសណីយ៍ក៏បានអំពាវនាវដល់បុគ្គលដែលកំពុងធ្វើចត្តាឡីស័កដោយខ្លួនឯង មិនត្រូវចាកចេញពីផ្ទះ ឬកន្លែងធ្វើចត្តាឡីស័កជាកំហិតក្នុងអំឡុងពេល ១៤ ថ្ងៃ ដើម្បីបន្តការពារសុខភាពសាធារណៈ និងចូលរួមទប់ស្កាត់ការឆ្លងរាលដាលនៃជំងឺកូវីដ ១៩។
នៅថ្ងៃម្សិលមិញនេះដែរ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន បានឱ្យដឹងថា ក្រសួងបានរកឃើញនូវអ្នកមានវិជ្ជមានវីរុសកូវីដ១៩ដែលឆ្លងក្នុងព្រឹត្តិការណ៍សហគមន៍ ២០ កុម្ភៈ ចំនួន ២៤ នាក់បន្ថែមទៀត ដែលធ្វើឱ្យចំនួនសរុបអ្នកឆ្លងក្នុងសហគមន៍លើកទី៣ នេះកើនដល់ ៥០១ នាក់ ប៉ុន្តែក៏មានអ្នកជាសះស្បើយចំនួន ៧ នាក់ផងដែរ ដែលពួកគាត់ជាអ្នកឆ្លងក្នុងសហគមន៍លើកទី៣ នេះ។
លោកស្រីបន្តថា ក្នុងចំណោមអ្នកឆ្លងទាំង ២៤ នាក់នេះ មានជនជាតិខ្មែរ ៧ នាក់ ជនជាតិចិន ១២ នាក់ និងជនជាតិវៀតណាម ៥ នាក់។ ការរកឃើញនេះមាននៅ ៥ រាជធានី-ខេត្ត គឺភ្នំពេញ កណ្តាល ព្រះសីហនុ កំពង់ចាម និងខេត្តកំពង់ធំ។
គិតត្រឹមព្រឹកម្សិលមិញ កម្ពុជារកឃើញអ្នកឆ្លងកូវីដ ១៩ សរុបចំនួន ១ ០១១ នាក់ ក្នុងនោះអ្នកឆ្លងក្នុងព្រឹត្តិការណ៍សហគមន៍ ២០ កុម្ភៈ មានចំនួន ៥០១ នាក់ ខណៈអ្នកព្យាបាលជាសះស្បើយសរុបមាន ៥១៧ នាក់ និងអ្នកកំពុងសម្រាកព្យាបាលមានចំនួន ៤៩៣ នាក់។
ទាក់ទងនឹបញ្ហានេះ រដ្ឋបាលខេត្តកំពង់ចាមបានប្រកាសរកអ្នកដែលជាប់ពាក់ព័ន្ធផ្ទាល់ និងប្រយោលជាមួយនឹងបុរសជនជាតិខ្មែរម្នាក់ឈ្មោះ ម៉ី ស៊ីថាន អាយុ ២៧ ឆ្នាំ ដែលជាគ្រូបង្រៀនម៉ាស្សានៅសណ្ឋាគារស៊ីញជីង-ថៃ ក្នុងខេត្តព្រះសីហនុ ដែលបានធ្វើតេស្តឃើញវិជ្ជមានកូវីដ ១៩ ពីថ្ងៃទី ៧ ខែមីនា ដើម្បីឱ្យមកធ្វើតេស្ត និងធ្វើចត្តាឡីស័កឱ្យបានត្រឹមត្រូវ។ បច្ចុប្បន្នអ្នកជំងឺរូបនេះកំពុងតែសម្រាកព្យាបាលនៅក្នុងមន្ទីរពេទ្យខេត្តកំពង់ចាម។
បើតាមរដ្ឋបាលខេត្ត បុរសរូបនេះមានការពាក់ព័ន្ធច្រើនកន្លែងដោយសារគាត់បានធ្វើដំណើរមកពីខេត្តព្រះសីហនុតាំងពីថ្ងៃទី ៣ ខែមីនា ដោយឆ្លងកាត់កន្លែងមួយចំនួនក្នុងទីក្រុងភ្នំពេញ និងក្នុងខេត្តកំពង់ចាម។ គាត់បានជិះរថយន្តឈ្នួល ម៉ូតូឌុប ម៉ូតូកង់ ៣ (PassApp) និងចូលក្នុងផ្សារព្រៃទទឹងផងដែរ។
ដោយឡែកសម្រាប់អ្នកកំពុងសម្រាកព្យាបាលជំងឺកូវីដ ១៩ នៅមណ្ឌលចត្តាឡីស័កព្រែកព្នៅនឹងត្រូវបញ្ជូនមកកាន់មន្ទីរពេទ្យព្យាបាលកូវីដ ១៩ ដឺងហ្គ្រេតឌូក ដែលជាអតីតសណ្ឋាគារអាំងទែរកុងទីណង់តាល់ នៅព្រឹកថ្ងៃទី ៨ ខែមីនា ដើម្បីបន្តការថែទាំ និងព្យាបាលជំងឺ។
លោក ហ៊ុន ម៉ាណែត អគ្គមេបញ្ជាការរងកងយោធពលខេមរភូមិន្ទ និងជាកូនប្រុសច្បងរបស់លោក ហ៊ុន សែន បានលើកឡើងក្នុងបណ្តាញសង្គមរបស់លោកពីម្សិលមិញថា ក្នុងរយៈពេលតែ ៣៣ ម៉ោងប៉ុណ្ណោះ [យើង] បានរួមគ្នាសម្រេចនូវបេសកកម្មដ៏ធំមួយគឺការកែប្រែសណ្ឋាគារ The Great Duke (អតីតសណ្ឋាគារអាំងទែរកុងទីណង់តាល់) ដែលបានបិទទ្វារអស់រយៈពេលប្រមាណ ២ ឆ្នាំមកហើយឱ្យក្លាយទៅជាមន្ទីរពេទ្យសម្រាប់ព្យាបាលអ្នកជំងឺកូវីដ១៩កម្រិតស្រាលដែលអាចដាក់អ្នកជំងឺបានប្រមាណ ៥០០ នាក់។
លោកបញ្ជាក់ថា៖ «ខ្ញុំសូមអរគុណដល់បងប្អូនក្រុមការងារទាំងអស់ពីអង្គភាពកងទ័ព កងរាជអាវុធហត្ថ នគរបាលជាតិ ក្រសួងសុខាភិបាល ក្រសួងការងារ សាលារាជធានីភ្នំពេញ អគ្គិសនីកម្ពុជា (EDC) រដ្ឋាករទឹក ក្រុមហ៊ុនឯកជន និងមិត្តភក្ដិទាំងអស់ ដែលបានចូលរួមយ៉ាងសកម្មនៅក្នុងការរៀបចំនេះ...»។
លោក ហ៊ុន ម៉ាណែត បានបន្តថា ការដាក់ឱ្យដំណើរការទីតាំងសណ្ឋាគារនេះជាមន្ទីរពេទ្យសម្រាប់អ្នកជំងឺកូវីដ១៩កម្រិតស្រាលគឺដើម្បីផ្តល់លទ្ធភាពដល់ក្រសួងសុខាភិបាលក្នុងការប្រមូលផ្តុំធនធានមនុស្សសម្ភារ,បរិក្ខារ និងបច្ចេកទេសចាំបាច់មួយចំនួនបម្រើដល់ការជួយសង្គ្រោះមនុស្សឱ្យបានទាន់ពេល និងធានាទប់ស្កាត់ការរីករាលដាលកាន់តែធ្ងន់ធ្ងរនៃជំងឺនេះនៅក្នុងសហគមន៍។
ទន្ទឹមនឹងនេះដែរក្រសួងសុខាភិបាលក៏បានជូនដំណឹងទៅដល់ពលរដ្ឋដែលបានចាក់វ៉ាក់សាំងកូវីដ ១៩ លើកទី ១ នៅមន្ទីរពេទ្យថ្នាក់ជាតិ រាជធានីភ្នំពេញ ដែលបច្ចុប្បន្នកំពុងជាប់នៅខេត្តព្រះសីហនុគឺអាចទៅទទួលវ៉ាក់សាំងលើកទី ២ នៅមន្ទីរពេទ្យបង្អែកខេត្តព្រះសីហនុបាន។
ក៏ប៉ុន្តែក្រសួងបានបញ្ជាក់ថាបុគ្គលនោះត្រូវផ្តល់ព័ត៌មាន ៣ ថ្ងៃ មុនទៅដល់ក្រុមចាក់វ៉ាក់សាំងនៅខេត្តព្រះសីហនុដែលនឹងត្រូវស្នើសុំ ព្រមទាំងបញ្ជូនព័ត៌មានអ្នកដែលត្រូវចាក់លើកទី ២ ទៅក្រុមបច្ចេកទេសព័ត៌មានវិទ្យានៅក្រសួងសុខាភិបាលផងដែរ។
គិតពីថ្ងៃទី ១០ ខែកុម្ភៈ ដល់ថ្ងៃទី ៧ ខែ មីនា ឆ្នាំ ២០២១ នេះក្រសួងសុខាភិបាលបានចាក់វ៉ាក់សាំងកូវីដ ១៩ បានចំនួន ៧១ ១៨៥ នាក់ និងក្រសួងការពារជាតិចាក់វ៉ាក់សាំងជូនកងកម្លាំងប្រដាប់អាវុធបានចំនួន ៩៦ ៣០២ នាក់៕
