ភ្នំពេញៈ ក្រសួងមហាផ្ទៃបានសម្រេចបង្កើតនាយកដ្ឋានប្រឆាំងបទល្មើសបច្ចេកវិទ្យាដើម្បីស៊ើបអង្កេត និងបង្ក្រាបបទល្មើសនានា នៅលើប្រព័ន្ធ អ៊ីនធឺណិត ហើយក្នុងនោះក៏សំដៅចាត់វិធានការចំពោះសកម្មភាពដែលក្រសួងចាត់ទុកថា ជាការញុះញង់ ជេរប្រមាថ និងរើសអើងពូជសាសន៍តាមប្រព័ន្ធអ៊ីនធឺណិតផងដែរ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានឲ្យដឹងថានាយកដ្ឋានប្រឆាំងបទល្មើសបច្ចេកវិទ្យាត្រូវបានបង្កើតឡើងតាមរយៈអនុក្រឹត្យលេខ ១០៩ ស្តីពីការរៀបចំ និងការប្រព្រឹត្តទៅនៃក្រសួងមហាផ្ទៃ ចុះថ្ងៃទី ១៩ ខែសីហា ឆ្នាំ ២០១៥។
អនុក្រឹត្យនេះបានចែងថា នាយកដ្ឋានប្រឆាំងបទល្មើសបច្ចេកវិទ្យាមានតួនាទីជាសេនាធិការរៀបចំគោលការណ៍គោលនយោបាយយុទ្ធសាស្ត្រផែនការសកម្មភាពទប់ស្កាត់សំដៅរួមចំណែកការពារសន្តិសុខជាតិ និងសហការជាមួយស្ថាប័នរដ្ឋ និងឯកជនដែលផ្គត់ផ្គង់សេវាបច្ចេកវិទ្យា និងទូរគមនាគមន៍គ្រប់ប្រភទដើម្បីឲ្យមានការស្រាវជ្រាវស៊ើបអង្កេតប្រមូលភ័ស្តុតាង និងបង្ក្រាបបទល្មើសតាមប្រព័ន្ធបច្ចេកវិទ្យា។
នាយកដ្ឋាននេះក៏មានភារកិច្ចប្រមូល និងវិភាគទិន្នន័យប្រព័ន្ធទូរគមនាគមន៍សំដៅរកឲ្យឃើញបទល្មើស និងការគំរាមកំហែងដល់សន្តិសុខជាតិដើម្បីចាត់វិធានការតាមច្បាប់។
នាយកដ្ឋាននេះក៏មានតួនាទីស៊ើបអង្កេត និងចាត់វិធានការតាមផ្លូវច្បាប់ចំពោះសកម្មភាពញុះញង់ ជេរប្រមាថ និងរើសអើងពូជសាសន៍បង្កចលាចលក្នុងសង្គមតាមប្រព័ន្ធអ៊ីនធឺណិតគួបផ្សំនឹងបង្ក្រាបការជ្រៀតជ្រែកចូល និងបំផ្លិចបំផ្លាញប្រព័ន្ធព័ត៌មានវិទ្យាការបង្កើតមេរោគកុំព្យូទ័របំផ្លាញឯកសារ ឬការបង្ករំខានដល់ដំណើរការប្រព័ន្ធបច្ចេកវិទ្យា និងការធ្វើចារកម្មទិន្នន័យផងដែរ។
យ៉ាងណាក៏ដោយអ្នកនាំពាក្យអគ្គស្នងការដ្ឋាននគរបាលជាតិ លោក គៀត ច័ន្ទថារិទ្ធ បានថ្លែងថានាយកដ្ឋានដែលទើបបង្កើតថ្មីនេះមិនទាន់មានការចាត់តាំងប្រធាន ឬអនុប្រធានគ្រប់គ្រងនៅឡើយទេ។
លោកថា៖ «នាយកដ្ឋាននេះត្រូវបានស្នើយូរមកហើយប៉ុន្តែទើបបង្កើតថ្មីហើយឥឡូវកំពុងរៀបចំនៅឡើយ។ នាយកដ្ឋាននេះនឹងសហការជាមួយភាគីពាក់ព័ន្ធទាំងអស់ដើម្បីបង្ក្រាបបទល្មើសព្រោះថាបើមិនបង្ក្រាបទេនោះគឺនឹងបង្កគ្រោះថ្នាក់ដល់សង្គម»។
កាលពីថ្ងៃទី ១៥ ខែតុលា ឆ្នាំ ២០១៤ ទីស្តីការគណៈរដ្ឋមន្ត្រីក៏បានសម្រេចបង្កើតក្រុមការងារជំនាញលើប្រព័ន្ធអ៊ីនធឺណិត (Cyber War Team) ដើម្បីត្រួតពិនិត្យ និងប្រមូលព័ត៌មានពីបណ្តាញសង្គម Facebook,Twitter, Google-Plus blogs, Youtube, និងគេហទំព័រផ្សេងៗទៀតក្នុងគោលបំណងការពារជំហរ និងកិត្យានុភាពរបស់រដ្ឋាភិបាល។
ប៉ុន្តែលោក ខៀវ សុភ័គ បានឲ្យដឹងថានាយកដ្ឋានប្រឆាំងបទល្មើសបច្ចេកវិទ្យាមានតួនាទីខុសគ្នាពីក្រុមការងារ Cyber War Team ដោយហេតុថានាយកដ្ឋាននេះដឹកនាំដោយមន្ត្រីនគរបាលយុត្តិធម៌មានសិទ្ធិអំណាចគ្រប់គ្រាន់ក្នុងការចុះបង្ក្រាបបទល្មើសផ្ទាល់។
លោកថា៖ «ក្រុមការងារនេះគឺសុទ្ធតែជាមន្ត្រីនគរបាលយុត្តិធម៌អ៊ីចឹងពួកគាត់មានសិទ្ធិក្នុងការស៊ើបអង្កេតស្នើកិច្ចសហការគឺពួកគាត់មានសិទ្ធិបង្ក្រាបខុសពីក្រុមជំនាញ Cyber War Team»។
អ្នកនាំពាក្យគណបក្សសង្គ្រោះជាតិលោក យឹម សុវណ្ណ បានបង្ហាញនូវក្តីបារម្ភចំពោះសកម្មភាពរបស់រាជរដ្ឋាភិបាលដឹកនាំដោយគណបក្សប្រជាជនដែលចាប់ផ្តើមរឹតត្បិតសេរីភាពតាមប្រព័ន្ធអ៊ីនធឺណិតក្រោយការបោះឆ្នោតឆ្នាំ ២០១៣។
លោកថា៖ «ខ្ញុំថានេះជាប្រព័ន្ធមួយនៃការបង្ក្រាបលើការបញ្ចេញមតិយោបល់ព្រោះថាជាក់ស្តែងយើងបានឃើញមន្ត្រី NGO ត្រូវបានចាប់ខ្លួនហើយក្រោយមកសកម្មជន និងថ្នាក់ដឹកនាំរបស់គណបក្សសង្គ្រោះជាតិក៏ត្រូវបានចាប់ខ្លួនហើយពេលនេះក៏មានបង្កើតក្រុមជំនាញគ្រប់គ្រងទៀតនេះជាក្តីបារម្ភមួយ»។
សម្រាប់មន្ត្រីសម្របសម្រួលបច្ចេកទេសសិទ្ធិមនុស្សនៃអង្គការលីកាដូលោក អំ សំអាត យល់ថាការបង្កើតនូវនាយកដ្ឋានប្រឆាំងបទល្មើសបច្ចេកវិទ្យានេះជាក់ស្តែងជាសញ្ញាណមួយដែលរដ្ឋាភិបាលធ្វើឡើងដើម្បីធ្វើឲ្យសេរីភាពបញ្ចេញមតិតាមបណ្តាញអ៊ីនធឺណិតកាន់តែរួញខ្លី និងជាផ្នែកមួយបើកផ្លូវឈានដល់ការបញ្ចេញនូវសេចក្តីព្រាងច្បាប់គ្រប់គ្រងបណ្តាញអ៊ីនធឺណិត (Cyber Law)។
លោក សំអាត បានគូសបញ្ជាក់ថា៖ «រដ្ឋាភិបាលបានបង្កើតក្រុមការងារជាបន្តបន្ទាប់គ្រប់គ្រងការបញ្ចេញមតិនៅលើប្រព័ន្ធបណ្តាញសង្គម។ នេះបង្ហាញយ៉ាងច្បាស់ដែលថារដ្ឋាភិបាលមានបំណងគ្រប់គ្រង និងរឹតត្បិតលើអ្នកដែលមានបំណងរិះគន់រដ្ឋាភិបាលខណៈបច្ចុប្បន្ននេះពលរដ្ឋជាច្រើនហ៊ានរិះគន់រដ្ឋាភិបាលតាមបណ្តាញសង្គមជាពិសេសហ្វេសប៊ុកជាជាងការនិយាយដោយបើកចំហខាងក្រៅ៕
