ភ្នំពេញៈ ក្រុមការងារព័ត៌មានវិទ្យា (IT) របស់ក្រសួងសាធារណការ និងដឹកជញ្ជូនបាននិងកំពុងធ្វើប្រព័ន្ធកម្មវិធី App ថ្មីមួយទៀត ដើម្បីថតនូវរាល់ព័ត៌មានពាក់ព័ន្ធនឹងបទល្មើសចរាចរណ៍ទាំងអស់របស់អ្នកបើកបរនៅកម្ពុជាដើម្បីដកពិន្ទុលើបណ្ណបើកបរ មុនពេលឈានទៅដល់ការពិន័យ ឬបញ្ឈប់លែងឱ្យបើកបរចាប់ពីរយៈពេល ៦ ខែទៅ ១ ឆ្នាំ។
លោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូនបានថ្លែងនៅក្នុងពិធីបើកសន្និបាតបូកសរុបលទ្ធផលការងារប្រចាំឆ្នាំ ២០២០ និងលើកទិសដៅការងារឆ្នាំ ២០២១ កាលពីម្សិលមិញថា ការបង្កើតប្រព័ន្ធ App ថ្មីនេះអាចនឹងត្រូវបញ្ចប់ក្នុងខែមិថុនា ឆ្នាំ ២០២១ ខាងមុខនេះ។ នៅពេលការងារនេះបញ្ចប់នឹងយកទៅបង្ហាញលោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោកមុននឹងឈានដល់ការដាក់ឱ្យប្រើប្រាស់ជាផ្លូវការ។
លោកថ្លែងថា៖ «កម្មវិធី App នេះនឹងដកពិន្ទុលើបណ្ណបើកបរ។
ច្បាប់យើងបានចែងថា ៥ ឆ្នាំក្រោយពីច្បាប់ចូលជាធរមាននឹងមានការដកពិន្ទុនូវអ្នកបើកយានយន្តខុសច្បាប់។ ឧទាហរណ៍បើកបរលើសល្បឿនខុសច្បាប់បើកបរមិនឈប់ភ្លើងស្តុបក្រហម បើកបរក្នុងស្ថានភាពស្រវឹង បើកអត់ពាក់ខ្សែក្រវាត់។ល។ កន្លែងនេះត្រូវដកពិន្ទុ»។
លោក ស៊ុន ចាន់ថុល បានពន្យល់ថា ប្រព័ន្ធ App ថ្មីនេះនឹងកត់ត្រាពិន្ទុដោយខ្លួនឯង ហើយនៅពេលដកពិន្ទុគ្រប់ហើយដែលមានចំនួន ១២ ពិន្ទុ គឺមិនអនុញ្ញាតឱ្យបើកបរតទៅទៀតនោះទេ។
លោកបន្ថែមថា មិនមែនគ្រាន់តែផាកពិន័យជាប្រាក់ហើយរួចខ្លួនទេ គឺត្រូវដកពិន្ទុថែមទៀតកុំឱ្យមានការប្រើបណ្ណបើកបរអាចចាប់ពី ៦ ខែ ទៅ ១ ឆ្នាំ ទៅតាមច្បាប់ដែលមានចែង។
បើតាមលោក ស៊ុន ចាន់ថុល ក្រុមការងារក្រសួងនឹងរៀបចំឱ្យចប់នៅក្នុងខែមិថុនា ហើយនឹងយកទៅធ្វើបទបង្ហាញជូនលោក ស ខេង នៅក្នុងខែកក្កដា ឆ្នាំ ២០២១។ បន្ទាប់មកទៀតនឹងត្រូវចាប់ផ្តើមផ្សព្វផ្សាយឱ្យបងប្អូនពលរដ្ឋដែលប្រើប្រាស់ផ្លូវសាធារណៈឱ្យបានដឹងថា កម្ពុជាមានច្បាប់ មានសម្ភារ និងមាន App ត្រឹមត្រូវដើម្បីចាប់ផ្តើមដកពិន្ទុ។
លោក ស៊ុន ចាន់ថុល បញ្ជាក់បន្ថែមថា ការបង្កើត App សម្រាប់ដកពិន្ទុចំពោះអ្នកល្មើសច្បាប់ចរាចរណ៍នេះ ក៏បង្កភាពងាយស្រួលដល់ក្រុមហ៊ុនធានារ៉ាប់រងផងដែរក្នុងការលក់កញ្ចប់ធានារ៉ាប់រងក្នុងតម្លៃថ្លៃដែលទៅមុខទៀតនឹងមានការផ្ទេរព័ត៌មានទៅវិញទៅមករវាងក្រសួងសាធារណការ និងដឹកជញ្ជូន និងក្រុមហ៊ុនធានារ៉ាប់រង។
លោក គង់ រតនៈ អ្នកជំនាញ និងជាអ្នកពិគ្រោះយោបល់លើបញ្ហាចរាចរណ៍ផ្លូវគោក បានស្វាគមន៍ចំពោះការធ្វើទំនើបកម្មរបស់ក្រសួងសាធារណការ និងដឹកជញ្ជូនក្នុងការបង្កើត App ថ្មីនេះ សម្រាប់តាមដានរាល់បទល្មើសចរាចរណ៍របស់អ្នកប្រើប្រាស់ផ្លូវសាធារណៈ។
លោក គង់ រតនៈ បានថ្លែងថា៖ «សម្រាប់ខ្ញុំចំពោះការធ្វើទំនើបកម្មដូចជា App ដើម្បីឱ្យមានការគ្រប់គ្រងទៅលើឥរិយាបថ ឬកំណត់ត្រានូវកំហុសរបស់អ្នកបើកបរដែលល្មើសហ្នឹង គឺជារឿងល្អ ពីព្រោះថាមកទល់ឆ្នាំនេះ ពលរដ្ឋភាគច្រើនមានលទ្ធភាពក្នុងការប្រើប្រាស់ទូរស័ព្ទស្មាតហ្វូន ជាពិសេសសំដៅទៅលើសមត្ថកិច្ចដែលមានតួនាទីក្នុងការប្រើប្រាស់ជាចាំបាច់»។
យ៉ាងណាក្ដី លោក គង់ រតនៈ បានបញ្ជាក់ថា ចំពោះការបង្កើតប្រព័ន្ធកម្មវិធី App នេះមានសុក្រឹតភាពប៉ុនណា ឬការអនុវត្តរបស់សមត្ថកិច្ចបានកម្រិតប៉ុនណានោះគឺជារឿងមួយផ្សេងទៀត ប៉ុន្តែអ្វីដែលក្រសួងផ្តួចផ្តើមឱ្យមាន App គឺបង្កឱ្យមានភាពងាយស្រួលដល់ការប្រមូលបាននូវកំណត់ត្រាកំហុសឆ្គងរបស់អ្នកបើកបរ ជាពិសេសគឺអាចដឹងពីកម្រិតចំណេះដឹងនៃអ្នកបើកបរដែលបានប្រឡងយកបណ្ណបើកបរកន្លងមក៕