ភ្នំពេញៈ អ្នកនាំពាក្យក្រសួងមុខងារសាធារណៈបានថ្លែងថាថវិកាជាតិប្រមាណជាង ៧ ពាន់លានរៀល ត្រូវបានបង្វែរចូលរដ្ឋវិញកាលពីឆ្នាំមុន បន្ទាប់ពីបានរកឃើញថា ប្រើប្រាស់មិនត្រឹមត្រូវ ខណៈអ្នកនាំពាក្យក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ចអះអាងថាកម្ពុជាលែងមានមន្ត្រីខ្មោច។
លោក យក់ ប៊ុនណា អ្នកនាំពាក្យក្រសួងមុខងារសាធារណៈបានប្រាប់ភ្នំពេញប៉ុស្តិ៍ពីម្សិលមិញថា ថវិកាជាតិប្រមាណ ៧ ១៩៨ ១៣៥ ៥១៤ រៀល ត្រូវបានបង្វែរចូលថវិការដ្ឋវិញ បន្ទាប់ពីក្រសួងរកឃើញបើកលើស និងបើកឲ្យមន្ត្រីដែលបានលុបឈ្មោះចេញហើយ។
លោកបានពន្យល់ថា ដោយសារក្នុងបញ្ជីមន្ត្រីរាជការទូទាំងប្រទេសត្រូវបានធ្វើបច្ចុប្បន្នភាព និងបានលុបឈ្មោះមន្ត្រីដែលមានតែឈ្មោះចេញ។ រីឯខ្លះទៀតបានទទួលមរណភាព ប៉ុន្តែមិនទាន់កាត់ចេញពីបញ្ជីប្រាក់បៀវត្សរ៍ជាហេតុនាំឲ្យការបើកប្រាក់បៀវត្សរ៍លើសនេះ។
លោកថា៖ «ករណីនេះព្រោះតែមន្ត្រីទាំងអស់ត្រូវបង្ហាញវត្តមានជាប្រចាំ និងត្រូវមានគណនីធនាគារត្រឹមត្រូវទើបអាចបើកប្រាក់បៀវត្សរ៍បានដូច្នេះពាក្យថា មន្ត្រីខ្មោចដែលពីមុនតែងឮនោះក្នុងពេលនេះគឺលែងមានទៀតហើយ»។
ការលុបឈ្មោះមន្ត្រីខ្មោចពីបញ្ជីក្របខ័ណ្ឌមន្ត្រីរាជការបានចាប់ផ្តើមពីឆ្នាំ ២០១៤ បន្ទាប់ពីកម្ពុជាបានរៀបចំបើកប្រាក់បៀវត្សរ៍តាមធនាគារដែលតាមលោក យក់ ប៊ុនណា ថា ឆ្នាំនេះ គ្រប់មន្ត្រីរាជការទាំងអស់ជាង ២១ ម៉ឺននាក់ គឺសុទ្ធតែមានគណនីធនាគារ និងបើកប្រាក់បៀវត្សរ៍របស់ពួកគេតាមធនាគារ។
មិនខុសពីការអះអាងនេះទេលោក ណុប ចាន់ណារិន្ទ អ្នកនាំពាក្យក្រសួងទំនាក់ទំនងរដ្ឋសភា ព្រឹទ្ធសភា និងអធិការកិច្ចបានថ្លែងក្នុងសន្និសីទសារព័ត៌មានស្ដីពី «វឌ្ឍនភាព និងទិសដៅការងារបន្ដរបស់ក្រសួងទំនាក់ទំនងរដ្ឋសភាព្រឹទ្ធសភា និងអធិការកិច្ច» នៅទីស្តីការគណៈរដ្ឋមន្ត្រីកាលពីថ្ងៃទី ២០ ខែកុម្ភៈ ថា ក្រោយការចុះធ្វើអធិការកិច្ចលើ ១៤ ក្រសួងកន្លងមកនេះ ក្រុមការងាររកមិនឃើញមន្ត្រីខ្មោចទៀតទេ។
លោក ណារិន្ទ បានលើកឡើងថា បច្ចុប្បន្នមន្ត្រីខ្មោចលែងមានទៀតហើយ ព្រោះការធ្វើអធិការកិច្ចកន្លងមក គឺរកឃើញតែមន្ត្រីចុះបេសកកម្ម និងមន្ត្រីខ្លះព្យួរការងារដែលមិនជាប់ពាក់ព័ន្ធនឹងមន្ត្រីខ្មោចមានតែឈ្មោះ ហើយមិនធ្វើការនោះទេ។
លោក ណារិន្ទ បានឲ្យដឹងថា៖ «យើងបានចុះធ្វើ (អធិការកិច្ច) កិច្ចការងារហ្នឹងមានមន្ត្រីអធិការកិច្ចចុះទៅធ្វើ។ ប៉ុន្តែពី ១ ឆ្នាំទៅ ១ ឆ្នាំ ការធ្វើកិច្ចការងារនេះនៅតាមក្រសួងហ្នឹងមិនសូវបានទាំងអស់ទេ ព្រោះតែយើងធ្វើមួយក្រសួងៗ មានរយៈពេលយូរ ហើយបញ្ហាអស់នេះ យើងបានចេញ (សជណ) ទៅតាមប្រធានអង្គភាពផងដែរ»។
បន្ថែមពីនេះលោកបញ្ជាក់ថា ក្រសួងទំនាក់ទំនងព្រឹទ្ធសភា រដ្ឋសភា និងអធិការកិច្ចដែលមានតួនាទីធ្វើអធិការកិច្ចលើគ្រប់វិស័យសំដៅប្រឆាំងអំពើពុករលួយ ការរំលោភអំណាច និងបាតុភាពអសកម្មនានានៅតាមក្រសួងស្ថាប័នផងនោះនឹងបន្តចុះធ្វើអធិការកិច្ចទៅតាមក្រសួងស្ថាប័នមួយចំនួនទៀតក្នុងឆ្នាំ ២០២០ នេះ។
តាមតួលេខរបស់ក្រសួងមុខងារសាធារណៈបានឲ្យដឹងថា នៅក្នុងឆ្នាំនេះ កម្ពុជាមានមន្ត្រីរាជការប្រមាណ ២១៨ ៥៥២ នាក់ ខណៈកាលពីឆ្នាំមុនមាន ២១៨ ៤៨២ នាក់។
បើតាមសៀវភៅណែនាំស្តីពីកំណែទម្រង់រដ្ឋបាលសម្រាប់មន្ត្រីរាជការដែលបោះពុម្ពក្នុងឆ្នាំ ២០១០ មន្ត្រីរាជការត្រូវបំពេញការងារ ៨ ម៉ោងក្នុង ១ ថ្ងៃ ពីថ្ងៃចន្ទដល់ថ្ងៃសុក្រ ពីម៉ោង ៧:៣០ នាទីព្រឹក ដល់ម៉ោង ១១:៣០ និងពីម៉ោង ២ រសៀលដល់ ៥:៣០ ល្ងាច ហើយមន្ត្រីរាជការត្រូវបានហាមប្រាមមិនឲ្យធ្វើការងារផ្ទាល់ខ្លួនក្នុងអំឡុងម៉ោងការងារទេ ប្រសិនបើបំពាននឹងមានការដាក់ពិន័យទោសទណ្ឌ។
កាលពីឆ្នាំ ២០១០ មានមន្ត្រីខ្មោចប្រមាណ ៣០ ០០០ នាក់ ត្រូវបានលុបឈ្មោះចេញពីបញ្ជីបើកប្រាក់ខែក្នុងនោះប្រហែល ២៨ ០០០ នាក់ នៅថ្នាក់ខេត្ត និងក្នុងជួរនគរបាល និងកងទ័ព ហើយនៅក្នុងឆ្នាំ ២០១១ មានមន្ត្រីខ្មោច ៤ ០០០ នាក់ទៀត ត្រូវបានរកឃើញផងដែរ។
នេះបើតាមការចុះផ្សាយរបស់កាសែតភ្នំពេញប៉ុស្តិ៍កាលពីអំឡុងឆ្នាំ ២០១៤៕
វីដេអូ៖