.jpg)
គ្រូពេទ្យយកសំណាកដើម្បីតេស្តរកមេរោគកូវីដ ១៩ កាលពីម្សិលមិញ។ រូបថត TYDA Page
ភ្នំពេញ៖ ក្រសួងសុខាភិបាលនៅថ្ងៃទី ១២ មេសានេះ បានរកឃើញអ្នកឆ្លងកូវីដ ១៩ ចំនួន ២៧៧ នាក់បន្ថែមទៀតនៅក្នុងខេត្ត-ក្រុងចំនួន ៧ ដែលសុទ្ធតែឆ្លងក្នុងព្រឹត្តិការណ៍សហគមន៍ ២០ កុម្ភៈ រីឯអ្នកជាសះស្បើយមានចំនួន ៦០ នាក់ ខណៈអ្នកស្លាប់ថ្មីមានម្នាក់។
តាមសេចក្ដីប្រកាសរបស់ក្រសួងសុខាភិបាលចំនួនអ្នកឆ្លងទាំងនេះ មាននៅរាជធានីភ្នំពេញចំនួន ២០៤ នាក់, ខេត្តស្វាយរៀង ចំនួន ៤៣ នាក់, ខេត្តកណ្តាល ២៣ នាក់, ខេត្តពោធិ៍សាត់ ៣ នាក់, ខេត្តព្រៃវែងចំនួន ២ នាក់, ខេត្តព្រះសីហនុ និងតាកែវ ១ នាក់ដូចគ្នា។
នៅក្នុងថ្ងៃនេះដែរ ក្រសួងសុខាភិបាលក៏បានប្រកាសពីការព្យាបាលជាសះស្បើយនៃអ្នកជំងឺកូវីដ ១៩ មានចំនួន ៦០ នាក់ផងដែរ។
ក្រៅពីនេះក្រសួងសុខាភិបាលបានប្រកាសពីករណីស្លាប់ស្ត្រីខែ្មរវ័យ ៦១ ឆ្នាំម្នាក់ កាលពីយប់ថ្ងៃទី ១១ ខែមេសាផងដែរ ដែលធ្វើឱ្យចំនួនអ្នកស្លាប់ដោយសារកូវីដ ១៩ នៅកម្ពុជាកើនដល់ ៣០ នាក់។
បើតាមសេចក្ដីប្រកាសរបស់ក្រសួងបានឱ្យដឹងថា ស្រ្តីរូបនេះរស់នៅសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញបានស្លាប់បាត់បង់ជីវិតនៅម៉ោង ១៨ និង ៣០ នាទី។ មុនពេលស្លាប់អ្នកស្រ្តីរូបនេះ ត្រូវបានរកឃើញមានវិជ្ជមានជំងឺកូវីដ ១៩ ហើយបានចូលសម្រាកនៅមន្ទីរពេទ្យហ្លួងម៉ែ កាលពីយប់ថ្ងៃ ៣០ មីនា ២០២១។ ប៉ុន្តែដោយសារអ្នកជំងឺមានស្ថានភាពធ្ងន់ធ្ងរហត់ដង្ហក់ខ្លាំង និងមានជំងឺទឹកនោមផ្អែមផង គ្រូពេទ្យមិនអាចជួយសង្គ្រោះបាន។
តាមការសន្និដ្ឋានរបស់ក្រុមគ្រូពេទ្យស្ត្រីរូបនេះបានស្លាប់ដោយសារវិបត្តិផ្លូវដង្ហើមស្រួចស្រាល់ធ្ងន់ធ្ងរ និងរលាកសួតទាំងសងខាងដោយសារជំងឺកូវីដ ១៩ លើអ្នកដែលមានជំងឺទឹកនោមផ្អែមប្រចាំកាយ។
គិតត្រឹមព្រឹកថ្ងៃទី ១២ ខែ មេសា ឆ្នាំ ២០២១ នេះ ក្រសួងបានរកឃើញអ្នកមានវិជ្ជមានវីរុសកូវីដ ១៩ សរុបទូទាំងប្រទេសចំនួន ៤ ៥១៥ នាក់ ក្នុងនោះអ្នកជាសះស្បើយមានចំនួន ២ ២១២ នាក់ អ្នកកំពុងព្យាបាល ២ ៣០៣ នាក់ និងស្លាប់ចំនួន ៣០ នាក់៕
