ភ្នំពេញ: ក្រសួងសាធារណការ និងដឹកជញ្ជូនបានជូនដំណឹងពីវិធានការតឹងរ៉ឹងដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ បន្ទាប់ពីក្រសួងរកឃើញមានករណីមិនទាន់អនុវត្តបទប្បញ្ញត្តិច្បាប់ និងលិខិតបទដ្ឋានគតិយុត្ត ខណៈសង្គមស៊ីវិលគាំទ្រចំណាត់ការនេះ។
សេចក្តីជូនដំណឹងរបស់ក្រសួងកាលពីចុងខែតុលាដែល ភ្នំពេញ ប៉ុស្ដិ៍ ទទួលបានពីថ្ងៃទី ២ វិច្ឆិកាឱ្យដឹងថា ដើម្បីពង្រឹងការអនុវត្តបទប្បញ្ញត្តិនៃច្បាប់ស្តីពីផ្លូវថ្នល់ និងលិខិតបទដ្ឋានគតិយុត្តពាក់ព័ន្ធឱ្យកាន់តែមានប្រសិទ្ធភាពខ្ពស់ក្នុងការការពារហេដ្ឋារចនាសម្ព័ន្ធផ្លូវថ្នល់ និងស្ពានឱ្យបានជាប់រឹងមាំគង់វង្ស និងធន់ជាប់តាមអាយុកាលបច្ចេកទេសសាងសង់ ក្រសួងសូមណែនាំដល់ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបររថយន្តធុនធ្ងន់ត្រូវអនុវត្តត្រឹមត្រូវ និងម៉ឺងម៉ាត់តាមបទប្បញ្ញត្តិដូចមានចែងក្នុងមាត្រា ២៦ នៃច្បាប់ស្តីពីផ្លូវថ្នល់។
សេចក្ដីជូនដំណឹងបន្តថា ក្នុងករណីនៅតែបណ្តោយឱ្យដឹកជញ្ជូន ឬផ្ទុកទម្ងន់លើសពី ២០ ភាគរយ ប្រធានស្ថានីយជញ្ជីងអចល័ត ឬប្រធានក្រុមជញ្ជីងចល័ត ត្រូវចាត់វិធានការតាមបទប្បញ្ញត្តិដូចមានចែងក្នុងមាត្រា ៦០ នៃច្បាប់ស្តីពីផ្លូវថ្នល់ដែលក្នុងនោះត្រូវដកបណ្ណបើកបរ និងព្យួរទុកចំនួន ២ ឆ្នាំ។ ឃាត់យានជំនិះទុក ១ ឆ្នាំ ដោយរក្សាទុកនៅទីតាំងណាមួយសមស្រប ហើយម្ចាស់យានយន្តត្រូវទទួលខុសត្រូវលើការលើកដាក់ទំនិញ និងបង់ថ្លៃឈ្នួលកន្លែង ទុកដាក់ថែទាំទំនិញ និងយានជំនិះដោយខ្លួនឯង និងបញ្ឈប់អាជីវកម្មដឹកជញ្ជូនរបស់ក្រុមហ៊ុនចំនួន ១ ឆ្នាំក្នុងករណីទទួលរងនូវការពិន័យអន្តរការណ៍ម្តងរួចហើយ នៅតែបន្តប្រព្រឹត្តល្មើស។
សេចក្ដីជូនដំណឹងបន្ថែមថា ម្ចាស់ក្រុមហ៊ុនដឹកជញ្ជូន ម្ចាស់រថយន្តធុនធ្ងន់ និងអ្នកបើកបរដែលរងការពិន័យត្រូវសហការជាមួយមន្ទីរសាធារណការ និងដឹកជញ្ជូនរាជធានីខេត្តក្នុងការលើកដាក់ទំនិញ និងបង់ថ្លៃឈ្នួលកន្លែងទុកដាក់ថែទាំទំនិញ និងយានជំនិះដោយខ្លួនឯងរហូតមានការសម្រេចជាថ្មី។ ប៉ុន្តែអាចមានសិទ្ធិប្តឹងតវ៉ាស្របតាមនីតិវិធីដូចមានចែងក្នុងបទប្បញ្ញត្តិមាត្រា ៤៧ នៃច្បាប់ស្តីពីផ្លូវថ្នល់។
លោក ស៊ិន ចន្ធី ប្រធានសមាគមភ័ស្ដុភារកម្មកម្ពុជា (Cambodia Logistic Associations) បានថ្លែងកាលពីម្សិលមិញថា លោកគាំទ្រចំណាត់ការនេះ ប៉ុន្ដែលោកអំពាវនាវដល់មន្ត្រីជំនាញអនុវត្តច្បាប់ឱ្យមានតម្លាភាព យុត្តិធម៌ ដោយមិនត្រូវគិតពីបក្ខពួក និងមិនគួរលើកលែងចំពោះអ្នកមានលុយ ឬគ្មានលុយអន្តរាគមន៍ទេ។
លោកបានគាំទ្រចំពោះការអនុវត្តច្បាប់បែបនេះ ដើម្បីចូលរួមថែរក្សាផ្លូវថ្នល់ដែលរាជរដ្ឋាភិបាលខិតខំចំណាយថវិកាជួសជុល និងសាងសង់ជារៀងរាល់ឆ្នាំ។ ជាពិសេសចូលរួមកាត់បន្ថយបញ្ហាគ្រោះថ្នាក់ចរាចរណ៍នៅលើដងផ្លូវនានា ព្រោះបញ្ហាចរាចរណ៍នេះគឺទាមទារឱ្យមានការចូលរួមទាំងអស់គ្នា។
លោកបញ្ជាក់ថា៖ «ការអនុវត្តច្បាប់នេះ គឺមិនប៉ះពាល់ដល់ការដឹកជញ្ជូនទេ ព្រោះបើដឹកលើសទម្ងន់ គឺលើសត្រឹមតិចតួចទេ អ៊ីចឹងវាអត់ចំណេញអីច្រើន អ៊ីចឹងយើងងាកមកគោរពច្បាប់វិញល្អជាង។ រីឯសមាជិកដឹកជញ្ជូនពួកខ្ញុំ គឺខ្ញុំតែងតែប្រាប់ ឬបង្រៀនអ្នកបើកបរយើងល្អណាស់។ ដូច្នេះខ្ញុំស្នើឱ្យអនុវត្តច្បាប់ស្មើៗគ្នាពោលគឺមិនត្រូវដោះលែងអ្នកនេះហើយទៅចាប់អ្នកនោះទេ»។
លោក គឹម បញ្ញា នាយកអង្គការមូលនិធិបង្ការរបួសអាស៊ីប្រចាំកម្ពុជា (AIP) បានគាំទ្រចំណាត់ការរបស់ក្រសួងសាធារណការ និងដឹកជញ្ជូននេះ ប៉ុន្ដែលោកជំរុញឱ្យក្រសួង គួរតែកោះហៅតំណាងក្រុមហ៊ុនដឹកជញ្ជូនមកប្រជុំប្រាប់ពីវិធានការ និងដោះស្រាយបញ្ហាដែលនៅសេសសល់ក៏ដូចជាផ្ដល់អនុសាសន៍ណែនាំជុំវិញការដឹកជញ្ជូនទំនិញរបស់ក្រុមហ៊ុន។
លោកថា៖ «ការដឹកលើសទម្ងន់នេះគឺវាមានហានិភ័យខ្ពស់បំផុតក្នុងការបង្កគ្រោះថ្នាក់ចរាចរណ៍ដល់អ្នករួមដំណើរលើដងផ្លូវ ជាពិសេសគឺធ្វើឱ្យខូចខាតហេដ្ឋារចនាសម្ព័ន្ធផ្លូវថ្នល់។ ប្រសិនបើយើងបានណែនាំហើយ ប៉ុន្ដែក្រុមហ៊ុននៅតែមិនអនុវត្តទេ គឺស្ថាប័នជំនាញត្រូវតែដកអាជ្ញាប័ណ្ណពីក្រុមហ៊ុនដឹកជញ្ជូន ហើយដកហូតរថយន្តទុកមិនឱ្យធ្វើចរាចរណ៍បន្តទៀតក្នុងរយៈពេលកំណត់ណាមួយ ព្រោះជាការព្រមានដល់ក្រុមហ៊ុនដឹកជញ្ជូនផ្សេងៗទៀត»៕
វីដេអូ៖