ភ្នំពេញៈ ក្រសួងសង្គមកិច្ចបានបញ្ចប់ការបើកប្រាក់ឧបត្ថម្ភដល់គ្រួសារក្រីក្រ និងងាយរងគ្រោះក្នុងអំឡុងកូវីដ ១៩ សម្រាប់ខែមិថុនាកាលពីថ្ងៃទី ២៤ កក្កដា ដោយចំណាយប្រាក់សរុបជាង ២៣ លាន ៦៣ ម៉ឺនដុល្លារទៅលើពលរដ្ឋជាង ៥៣ ម៉ឺនគ្រួសារ ខណៈពលរដ្ឋ ៣ ម៉ឺនគ្រួសារទៀតមិនបានមកទទួលប្រាក់ឧបត្ថម្ភ។
បើតាមសេចក្ដីជូនដំណឹងរបស់ក្រសួងសង្គមកិច្ច អតីតយុទ្ធជន និងយុវនីតិសម្បទាកាលពីថ្ងៃទី ២៤ កក្កដា បញ្ជាក់ថា គ្រួសារចំនួន ៥៣០ ៨៣៨ ដែលមានសមាជិក ២ ១៥៣ ១១៤ នាក់ បានទទួលថវិកាពីរាជរដ្ឋាភិបាលដែលមានទឹកប្រាក់សរុបជាង ៩៤ ប៊ីលាន ៥៥១ លានរៀល ឬស្មើនឹងជាង ២៣,៦៣ លានដុល្លារ។
ក្រសួងជូនដំណឹងដល់អ្នកដែលធ្លាប់ទទួលប្រាក់ឧបត្ថម្ភនៅខែមិថុនារួចហើយឲ្យទៅបើកប្រាក់ឧបត្ថម្ភសម្រាប់ខែកក្កដានេះនៅតាមបញ្ជរវីងណាមួយ ដោយមិនចាំបាច់ទៅសាលាឃុំជាថ្មីទៀតទេ។
ក្រសួងបន្តថា៖ «ចំពោះគ្រួសារក្រីក្រ និងងាយរងគ្រោះដែលបណ្ណសមធម៌មានសុពលភាព ហើយមិនទាន់ផ្ទៀងផ្ទាត់នៅខែមិថុនា និងគ្រួសារក្រីក្រដែលទើបទទួលបានបណ្ណសមធម៌ថ្មី សូមអញ្ជើញទៅផ្ទៀងផ្ទាត់នៅសាលាឃុំ សង្កាត់ណាមួយដើម្បីទទួលបានការឧបត្ថម្ភសម្រាប់ខែកក្កដាដែលការបើកផ្ដល់ខែកក្កដាចាប់ផ្ដើមពីថ្ងៃទី ២៥ កក្កដា ឆ្នាំ ២០២០ តទៅដែលការបើកនេះមានរយៈពេល ៣០ ថ្ងៃ»។
ក្រសួងសង្គមកិច្ចបានថ្លែងអំណរគុណដល់ក្រសួងពាក់ព័ន្ធចំពោះការចូលរួមអនុវត្តកម្មវិធីនេះបានយ៉ាងរលូន និងទទួលបានការសាទរពីមជ្ឈដ្ឋានជាតិអន្តរជាតិ។ ជាមួយគ្នានេះក្រសួងបានស្នើពលរដ្ឋបន្តសហការឲ្យបានជោគជ័យស្របតាមគោលនយោបាយរបស់រាជរដ្ឋាភិបាលក្នុងការជួយសង្គម «ដោយមិនទុកឲ្យប្រជាជនណាម្នាក់ចោលហើយមិនមានការយកចិត្តទុកដាក់ពីរដ្ឋាភិបាលនោះឡើយ»។
លោក តូច ចាន់នី អ្នកនាំពាក្យក្រសួងសង្គមកិច្ច អតីតយុទ្ធជន និងយុវនីតិសម្បទាបានបញ្ជាក់ពីម្សិលមិញថា តួលេខនៃអ្នកត្រូវទទួលបានប្រាក់ឧបត្ថម្ភនេះមាន ៥៦ ម៉ឺនគ្រួសារ ប៉ុន្តែជាក់ស្ដែងមានអ្នកមកបើកប្រាក់ តែជាង ៥៣ ម៉ឺនគ្រួសារប៉ុណ្ណោះ។ ចំណែក ៣ ម៉ឺនគ្រួសារទៀតមិនបានមកបើក។ តាមការគ្រោងទុក គ្រួសារចំនួន ៦១ ម៉ឺននឹងទទួលបានប្រាក់ឧបត្ថម្ភសម្រាប់ខែកក្កដានេះ បន្ទាប់ពីរកឃើញគ្រួសារក្រីក្រ ៥ ម៉ឺននាក់ទៀត ដោយប្រើទឹកប្រាក់សរុបប្រមាណ ២៨ លានដុល្លារ។
ទន្ទឹមនឹងនេះស្ថាប័នអង្គការសហប្រជាជាតិចំនួន ៤ កំពុងអនុវត្តកម្មវិធីរួមគ្នាជាមួយរាជរដ្ឋាភិបាលគាំទ្រដល់ពលរដ្ឋត្រឡប់ពីថៃវិញ ដែលរស់នៅខេត្តបន្ទាយមានជ័យ បាត់ដំបង និងសៀមរាបសម្រាប់រយៈពេលសាកល្បង ៦ ខែចាប់ពីខែនេះទៅ។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃបានថ្លែងកាលពីម្សិលមិញថា អង្គការដែលចូលរួមក្នុងកម្មវិធីនេះមាន អង្គការទេសន្តរប្រវេសន៍អន្តរជាតិ IOM អង្គការសុខភាពពិភពលោក WHO មូលនិធិសហប្រជាជាតិសម្រាប់ប្រជាជន UNFPA និងអង្គការយូនីសេហ្វ។ កម្មវិធីនេះនឹងអនុវត្តនៅស្រុកទាំង ៣៥ នៃខេត្តទាំង ៣ នេះ។
លោកស្រីថ្លែងថា កម្មវិធីនេះគឺការបង្ការទប់ស្កាត់កូវីដ ១៩ ការអប់រំសុខភាព និងការផ្ដល់សម្ភារពាក់ព័ន្ធនឹងអនាម័យ និងការទប់ស្កាត់។ ក្នុងកម្មវិធីនេះក៏មានការដោះស្រាយជីវភាពផងដែរ ដោយជ្រើសរើសតាមលក្ខខណ្ឌមួយចំនួននៅក្នុងឃុំ-សង្កាត់ដែលអាចធ្វើបាន។
លោកស្រីបន្តថា ផលសម្រេចបាននៃគម្រោងនេះអាចចាត់ទុកថា ជោគជ័យ ប្រសិនបើពលករចំណាកស្រុកពីថៃដែលស្ថិតក្នុងគម្រោងនេះមានភាពនឹងនរក្នុងការរស់នៅដូចពលរដ្ឋទូទៅ និងមិនពុះកញ្ជ្រោលត្រឡប់ទៅវិញដែលប្រឈមនឹងគ្រោះថ្នាក់ដោយការចាញ់បោកគេ និងត្រូវចាប់បញ្ជូនត្រឡប់មកវិញ។
លោកស្រីថ្លែងថា៖ «ជោគជ័យទី ៣ មានន័យថា គាត់អាចការពារខ្លួនគាត់មិនឲ្យឆ្លងជំងឺកូវីដ ១៩ ដោយសារតែគាត់មិនប្រថុយប្រថាននឹងគ្រោះថ្នាក់នៅ ខណៈពេលកំពុងមានការឆ្លង។ បើគាត់ចល័តចុះឡើងគាត់ប្រឈមនឹងការឆ្លងមេរោគនេះ»។
លោកស្រីថ្លែងថា ការជួយដល់ពលរដ្ឋនៅក្នុងខេត្តទាំង ៣ នេះស្មើនឹងជួយដល់ពលរដ្ឋ ៦០ ភាគរយ នៃពលរដ្ឋជាង ១០ ម៉ឺននាក់ ដែលត្រឡប់ពីប្រទេសថៃ។ នៅពេលដែលកម្មវិធី ៦ ខែនេះបានជោគជ័យ អង្គការសហប្រជាជាតិ និងរដ្ឋាភិបាលអាចនឹងពង្រីកទៅក្របខ័ណ្ឌទូទាំងប្រទេស៕