.jpg)
សេចក្ដីប្រកាសរបស់ក្រសួងសុខាភិបាល។ រូបថត សហការី
ភ្នំពេញ៖ ក្រសួងសុខាភិបាល បានប្រកាសនៅល្ងាចថ្ងៃចន្ទទី២៩ ខែមីនានេះថា ករណីបុរសជនជាតិខ្មែរ អាយុ៣៩ឆ្នាំម្នាក់ ដែលមានផ្ទុកមេរោគកូវីដ១៩ បានស្លាប់កាលពីយប់ថ្ងៃទី ២៨ ខែមីនា ឆ្នាំ២០២១ មិនមែនស្លាប់ដោយសារជំងឺកូវីដ១៩ទេ។
ក្រសួងបានឱ្យដឹងថា យោងតាមការផ្តល់ព័ត៌មាន របស់មណ្ឌលសុខភាពចាក់អង្រែ ជនរងគ្រោះរូបនេះ បានស្នាក់នៅឧទ្យានទន្លេបាសាក់ ខណ្ឌចំការមនរាជធានីភ្នំពេញ ហើយបានស្លាប់ដោយសារជំងឺស្ទះសរសៃឈាមបេះដូងភ្លាមៗ។
ក្រសួងសុខាភិបាលបានបញ្ជាក់ថា អ្នកជំងឺរូបនេះ ត្រូវបានយកសំណាកធ្វើតេស្តនិងមានលទ្ធផលឃើញវិជ្ជមានកូវីដ១៩ នៅថ្ងៃទី២១ខែមីនា ឆ្នាំ២០២១ ហើយត្រូវបានដាក់ឱ្យព្យាបាលនៅមណ្ឌលសុខភាពចាក់អង្រែ នៅថ្ងៃដដែល។
ក្នុងរយៈពេលព្យាបាលចំនួន ០៨ថ្ងៃកន្លងមក អ្នកជំងឺរូបនេះ មិនមានរោគសញ្ញាអ្វីដែលបង្ហាញពីការវិវត្តទាក់ទងនឹងជំងឺកូវីដ១៩ គួរឱ្យកត់សម្គាល់ឡើយ រហូតដល់យប់ថ្ងៃទី ២៨ខែមីនាឆ្នាំ២០២១ អ្នកជំងឺមានចេញរោគសញ្ញាឈឺចុកក្នុងទ្រូងខ្លាំងភ្លាមៗ ដែលក្រុមគ្រូពេទ្យបានទៅពិនិត្យមើលភ្លាមៗដែរ។
ប្រភពដដែលបានបន្តថា មួយសន្ទុះក្រោយមក អ្នកជំងឺបានបាត់បង់ស្មារតី បើទោះជាក្រុមគ្រូពេទ្យបានព្យាយាមសង្គ្រោះ តាមបច្ចេកទេសដោយធ្វើចលនាបេះដូង និងការប្រើប្រាស់ថ្នាំជំនួយបេះដូងទៅតាមបច្ចេកទេសក៏ដោយ ប៉ុន្តែនៅតែមិនអាចជួយសង្គ្រោះបាន។
ក្រសួងសុខាភិបាលបញ្ជាក់ថា ៖ «ក្រុមគ្រូពេទ្យបានសន្និដ្ឋានថា អ្នកជំងឺមានផ្ទុកវីរុសកូវីដ១៩នេះបានស្លាប់ដោយសារជំងឺស្ទះសរសៃឈាមបេះដូងភ្លាមៗ មិនមែនស្លាប់ដោយសារជំងឺកូវីដ ១៩នោះឡើយ»។
យោងតាមក្រសួងសុខាភិបាល គិតត្រឹមព្រឹកថ្ងៃទី២៩ ខែមីនា ឆ្នាំ២០២១នេះ កម្ពុជាមានអ្នកឆ្លងវីរុសកូវីដ១៩ សរុបចំនួន ២២៧៣ នាក់ អ្នកជាសះស្បើយចំនួន ១១៧២ នាក់ អ្នកកំពុងព្យាបាលចំនួន ១០៨៧ នាក់ និងអ្នកស្លាប់ចំនួន១១នាក់៕
