.jpg)
អម្បូរសត្វស្វា ១ ប្រភេទដែលមានវត្តមានក្នុងដែនជម្រកសត្វព្រៃភ្នំសំកុះ។ រូបថត ក្រសួងបរិស្ថាន
ពោធិ៍សាត់ៈ ក្រសួងបរិស្ថានគ្រោងដាក់ម៉ាស៊ីនថតរូបស្វ័យប្រវត្តិចំនួន ១០ គ្រឿងថែមទៀត នៅដែនជម្រកសត្វព្រៃភ្នំសំកុះក្នុងភូមិសាស្ត្រខេត្តពោធិ៍សាត់ សម្រាប់សម្រួលដល់ការស្រាវជ្រាវវត្តមានសត្វព្រៃ និងតាមដានសកម្មភាពដាក់អន្ទាក់ និងបទល្មើសព្រៃឈើ។
រដ្ឋលេខាធិការ និងជាអ្នកនាំពាក្យក្រសួងបរិស្ថាន លោក នេត្រ ភក្ត្រា ថ្លែងថា ចាប់តាំងពីដើមឆ្នាំ ២០២០ មក ក្រសួងបរិស្ថានបានសហការជាមួយអង្គការសម្ព័ន្ធសត្វព្រៃ និងធម្មជាតិ (Wild Earth Allies) ចុះសិក្សាស្រាវជ្រាវសត្វព្រៃ ដំបូង បានដាក់ម៉ាស៊ីនថតរូបស្វ័យប្រវត្តិ (Camera-trap) ចំនួន ៩ គ្រឿង។
លោកបញ្ជាក់ថា ក្រសួងគ្រោងនឹងដាក់បន្ថែមម៉ាស៊ីនថតរូបប្រមាណ ១០ គ្រឿងទៀតក្នុងឆ្នាំ ២០២១ នេះ ខណៈម៉ាស៊ីនថតរូបសរុបដែលបម្រើឱ្យកិច្ចការស្រាវជ្រាវនេះមានចន្លោះពី ២០ ទៅ ២៥ គ្រឿង។
លោកបានថ្លែងទៀតថា៖ «ម៉ាស៊ីនថតរូបស្វ័យប្រវត្តិទាំងនេះមិនដាក់នៅតែមួយកន្លែងទេ នឹងធ្វើការផ្លាស់ប្តូររៀងរាល់ខែ បន្ទាប់ពីមានការដាក់នៅកន្លែងនីមួយៗ ហើយការផ្លាស់ប្តូរទីតាំងនេះយើងផ្តោតលើរដូវប្រាំង និងរដូវវស្សា ដើម្បីយើងអាចដឹងពីវត្តមានរបស់សត្វព្រៃ តើទីជម្រករដូវប្រាំងនៅកន្លែងណា និងនៅរដូវវស្សានៅកន្លែងណា»។
បើតាមលោក នេត្រ ភក្ត្រា លទ្ធផលដែលចាប់បានដោយម៉ាស៊ីនថតរូបក្នុងពេលកន្លងមកបង្ហាញឱ្យឃើញថា ដែនជម្រកសត្វព្រៃភ្នំសំកុះមានវត្តមានសត្វព្រៃកម្រជាច្រើនប្រភេទ។
យ៉ាងណាលោកថា នៅមានសត្វជាច្រើនទៀតដែលមិនទាន់ថតបាន ហេតុនេះម៉ាស៊ីនថតរូបស្វ័យប្រវត្តិនឹងដាក់បន្ថែមទៀតនៅពេលឆាប់ៗខាងមុខ។
លោក ភក្ត្រា ថ្លែងថា៖ «យើងពិនិត្យមើលនៅក្នុងកាមេរ៉ាស្វ័យប្រវត្តិក្នុងពេលកន្លងទៅ គឺយើងថតបានសត្វដំរីព្រៃ សត្វខ្ទីង ឈ្លូស ស្វាព្រាហ្មណ៍ ស្វាត្រោស ឆ្កែព្រៃ ខ្លាឃ្មុំធំ ស្ការធំ ក្ងោក កុកពាក់អំបោះ និងប្រភេទសត្វព្រៃមួយចំនួនទៀត»។
រដ្ឋលេខាធិការក្រសួងបរិស្ថានរូបនេះបញ្ជាក់ថា ការដាក់ម៉ាស៊ីនថតរូបដោយស្វ័យប្រវត្តិនៅក្នុងដែនជម្រកសត្វព្រៃសំកុះនេះគោលបំណងដើម្បីដឹងថា បច្ចុប្បន្ននៅមានវត្តមានសត្វព្រៃប្រភេទណាខ្លះ។ ជាមួយគ្នានោះក៏ដើម្បីតាមដានមើលសកម្មភាពរបស់មនុស្ស និងបទល្មើសផ្សេងៗនៅក្នុងតំបន់នោះផងដែរ។
អ្នកនាំពាក្យរូបនេះថ្លែងថា៖ «យើងចង់ដឹងថា តើទីតាំងកន្លែងតំបន់ហ្នឹងមានមនុស្សចូលច្រើនឬទេ ហើយមានសកម្មភាពអ្វីខ្លះ ដើម្បីយើងអាចផ្តល់របាយការណ៍ទៅដល់ក្រុមចុះល្បាតឱ្យពួកគាត់ងាយស្រួលចុះល្បាត។ ការទទួលបានព័ត៌មានពាក់ព័ន្ធជាមួយនឹងវត្តមានមនុស្ស សត្វ អីផ្សេងៗនៅតំបន់ហ្នឹង ដើម្បីយើងអាចក្តាប់បានក្នុងកិច្ចការងារអភិរក្ស»។
បើតាមលោក ភក្ត្រា ទិន្នន័យពីការសិក្សាស្រាវជ្រាវនេះនឹងយកទៅប្រើប្រាស់សម្រាប់ជាផ្នែកមួយក្នុងការកំណត់តំបន់គ្រប់គ្រងដែនជម្រកសត្វព្រៃភ្នំសំកុះ ជាពិសេសការកំណត់តំបន់ស្នូល និងតំបន់អភិរក្សដែលមិនអនុញ្ញាតឱ្យពលរដ្ឋមានការចេញចូលបានឡើយ។
លោកថា៖ «អ៊ីចឹងតំបន់ដែលមានសត្វព្រៃច្រើន គឺយើងនឹងចាត់ថាជាតំបន់ស្នូល និងតំបន់អភិរក្ស ដែលតំបន់ទាំងអស់នោះគឺមិនអាចមានការអនុញ្ញាតឱ្យចូលបានទេព្រោះវាជាទីជម្រករបស់សត្វព្រៃ។ បន្ទាប់ពីចាប់បានវត្តមានសត្វ យើងនឹងផ្សព្វផ្សាយដល់ប្រជាពលរដ្ឋ បង្ហាញភ័ស្តុតាងដល់ពួកគាត់ ថាពួកគាត់នឹងមិនអាចចូលបាន ឬកំណត់តំបន់ហ្នឹងទៅជាតំបន់សហគមន៍បានទេ»៕
